Озъягысь Кирилл Васильевич да Ирина Яковлевна Есевъяслöн ыджыд семьяыс зэв ёртасьысь да уджач. Сiйö и гöгöрвоана, öд кутшöмöсь бать-мамыс, сэтшöмöн быдмöны и челядьыс. Ирина Яковлевна чужис-быдмис тайö посёлокын. Школа помалöм бöрын паныдалiс муса мортсö, вочасöн тöдмасисны матöджык, сьöлöманыс öзйис муслун. 2005-öд воын гижсисны, семйитчисны. Кирилл Васильевич медсясö зiлис пилитчанiнын, корсюрö ветлывлiс уджавны бокиö, мукöд районъясö. Налöн шоныд позйын регыдöн нин кылiс челядьлöн гажаа дзользьöм. И дзолюкъясыс, налöн виртусьясыс, сьöлöм гажöдысьясыс воысь воö содiсны. Талун гозъялöн 11 челядь нин. Медся ыджыдыс, 18 арöса Валерия, велöдчö Кировса юридическöй колледжын, Алёна — öкмысöд, Ольга — кöкъямысöд, Ларион — квайтöд, Илья — витöд, Арсений — нёльöд, Амилия — мöдöд классъясын, квайт арöса Изабелла да вит арöса Александр ветлöны садйö, а кык арöса Милана да 11 тöлысся Демид олöны мамыскöд.

 Уна челядя семья олö кык жыръя патераын, кодöс вичмöдлiсны Кириллы, кыдз батьтöм-мамтöмлы. Оланiныс кöть и дзескыд, но пыр гöгöр пöрадок. Бать-мам челядьöс ичöтсяньыс велöдöны уджö. Найö мыйöн вермöны отсасьöны гортаныс. Зонкаяс дöзьöритöны пемöсъяс бöрся, пыртлöны пес-ва, нывъяс отсасьöны мамыслы пелькöдчыны да пусьыны-пöжасьны. Ёртасьöны спорткöд, зонкаяс торйöн нин радейтöны футбол, петкöдчöны районса ордйысьöмъясын, а нывъяс — йöктыны. Став семьяöн öтув ыдждöдлöны чужан лунъяс, да мед бытьысь вöлiны быдöнлы сьöлöм сертиныс торт, мича сисьяс.

 2019-öд воын Ирина Яковлевна пасйысис крестьянин овмöс кутысьöн. Скöтыс абу уна, талун кежлö колис öти мöс да кык öш, водзтi кутiсны куим мöс. Посёлокад сьöкыд виддзöн, да ылынöсь на, сы вöсна турунсö ковмылö босьтны мукöд сиктъясысь. Есевъяслы, кыдз уна челядя семьялы, отсалöм могысь машина ньöбны да керка кыпöдны республикасянь вичмöдiсны сьöм. Босьтiсны УАЗ буханка, кодöн öнi став котырöн ветлöдлöны вöрö тшак-вотöсла. Чукöртöмторсьыс вöчöны тöв кежлö нур, а лишаланасö сдайтöны, век нин содтöд сьöм.

 Есевъяс босьтчисны кыпöдны выль оланiн, 10 метра пасьта да 12 метра кузьта ыдждаöс, мансардаöн. Сöмын тай медалöм уджалысьыс эз артышт да эз тöрöдчы вичмöдöм отсöга сьöмö, да стрöитчöмсö да пытшкöс уджъяс вöчöмсö ковмас сигöртны аслыныслы да асланыс сьöм вылö нин. Эскöны, мый во помас пырасны нин выль оланiнö. Кöсйö-ö Ирина Яковлевна тупкыны крестьянин овмöссö, нöшта видз-му овмöс министерствосянь кö оз во некутшöм субсидия, та вылö сiйö вочавидзис: «Ог. Öти-кö, колö уджалан стаж, мöдкö, челядьлы ас йöв да яй. Лоас кö позянлун, ми дасьöсь, мöдарö, содтыны на скöт юр лыдсö».
Анастасия Ярова,
видз-му овмöс юкöнöн веськöдлысь.
Снимокъяс Есевъяслöн чукöртöмысь.