Май 25-öд лунö Кебанъёльса олысьяс пырöдчим «Компас и мы» паса нуöданторйö, кодöс сиим «Российский азимут — 2024» ориентирование кузя спорт фестивальлы. Мунiс мöдысь нин «Зарница» ворсöмöн посёлоксаяслы зэв бура тöдса Сапун кыр йылын. Нимкодь, мый таво витсянь сизимдас арöсöдз окотитысьыс чукöрмис унджык. Локтiсны семьяясöн. Елизавета Васильевна Гуляева петкöдчис Марина Владимировна Есева нылыскöд да сылöн челядьыскöд. Алексей Михайлович да Татьяна Васильевна Уляшевъяслöн карсянь локтiсны внукъясыс, а налöн бать-мам сюся видзöдiсны ворсöм бöрся. Быд нуöданторйын петкöдчöны Олег Михайлович да Татьяна Константиновна Дёминъяслöн семья.

 Радын сулалiгöн котыръяслöн командиръяслы йöзöдiсны приказ: корсьны гуся документъясöн пакет, знамя да вайны штабö. Картаöн да компасöн вöдитчöмöн «Красные» да «Синие» котыръяслы колiс вуджны 11 юкöн: плац вылын ветлыны стройöн, вуджны мытшöдъяса туй, кык пурйöн «вуджны» ю, компас серти тöдмавны лыдöн петкöдлöм письмöлысь вежöртассö, гранатаöн пасьвартны вöрöглысь бронемашина, киöн вермасьны вöрöгкöд, стöча лыйсьыны винтовкаысь, уськöдны вöрöглысь самолёт, перъявны минаяс, корсьны гуся документъяса пакет да знамя.

 Минаяс корсигöн грымöбысь доймалiс öти боеч. Санитаръяс кардъялiсны, гартiсны да нуисны госпитальö. Челядь велöдчисны вöдитчыны компасöн, тöдмасисны карта вылын пасйöдъясöн, ставсö вöчисны верстьöкöд радын. Боечьяс öта-мöдлы отсасьöмöн зэв бура вуджисны мытшöдсö, петкöдлiсны сюсьлун, писькöслун, тэрыблун, знамя вылö лэптöмöн да сьылöмöн воисны штабö. Командиръяс висьтасисны вöчöм удж йылысь. Ставныслы сетiсны ворсöмын петкöдчöм йылысь сертификат. «СОГАЗ» котырысь О.М.Боброва челядьлы козьналiс мича журналъяс, уна рöма шаръяс да гöсьнечьяс. Олöмаяслöн котырöн веськöдлысь Н.Н.Плескач чöсмöдлiс юмовторъясöн.

 «Полевöй кухняын» ставнысö виччысис чöскыд пажын. Ыджыд пызан сайын кылiс шмонитöм да сералöм, миян вежöрö кольöм пионералан кад казьтылöм. Вунöдлiм гортса помасьлытöм удж да чукöртчылiм семьяясöн, челядькöд, внук-внучкаяскöд, бура коллялiм кад.

 Ворсöм котыртны отсалöмысь ветеранъяслöн котыр нимсянь аттьöалам М.В.Семенюкöс, В.В.Плескачöс, А.Д.Молочковöс. Аттьö водзмöстчöмысь и челядьлы и верстьöлы. Аддзысьлытöдз!
Нина Плескач.
Снимокъяс гижысьлöн чукöртöмысь.