Ыджыд лун — рочöн Пасха. Тайö лунö ловзис Иисус Христос, кодi вермис кулöм да вештiс грекъяссö мувывса став йöзлысь. Гажыс петкöдлö сöстöммöдчöм да омöльсьыс мынтöдчöм. Та вöсна и пасйыссьö гажаа, син ёран мичаа да уна йöзöн. Ыджыд лунö öта-мöдöс вочаалiсны «Христос ловзис!» кывъясöн. Воча шулiсны: «Збыльысь ловзис!». Кутлiсны да окавлiсны öта-мöднысö, мыйöн петкöдлiсны пыдди пуктöм да муслун. Ыджыд лунö буркывйöн вежöдöм сёян-юанлöн вöлi ыджыд вын, сiйö вермис отсавны сьöкыдлунъяс дырйи, мездылiс висьöмъясысь.
Зинаида Третьякова (шуйгавылас) да Анжелика Бугримова Пожöг шöр школаса 7-öд классын велöдчысьяс. Анжелика — отличница, Зинаидалöн сöмын «5» да «4». Чужöмсяньныс пыр öтлаынöсь: öти потанын весиг узьлывлiсны. Урок бöрын окотапырысь котралöны ворсны баскетболысь . Нывъяс озырöсь район тшупöда уна медальöн. Некымын во нин велöдчöны йöктыны, киподтуяöсь — вöчасьöны сюмöдысь. Сюся пырöдчöны быдсяма балаö. Неважöн Анжелика лоис Россия тшупöдын «Гуся космос» конкурсын вермысьöн.
Владимир Шомысов.
Снимок гижысьлöн.

Редакциясянь: Таво Ыджыд лун пасъянног вежыштам. Коронавирус паськалöмысь видзчысьöмöн корам кутчысьны вичкоö мунöмысь. Юöртам, мый Юрган телеканал петкöдлас Перым Степан соборысь Ыджыд лунся службасö веськыд эфирын, позяс видзöдны öтуввезйын веськыд эфирын и Комиинформ лентаысь.
Видзöй асьнытö да матыссаястö!