Каникул — карантин

[ A+ ] /[ A- ]


Таво челядьлы тувсовъя каникулъясыд виччысьтöг водз быйкнитiсны, да помыс налöн весиг оз на и тыдав. Медым велöдчан программаяс кыдзкö пöртны олöмö, школьникъяс тöдöмлун босьтöны öтуввез пыр, сэтысь жö кыскöны велöдысьöн дасьтöм гортса уджъяс. Школаад лунтыръясöн партаяс саяд пукалöмыд тöдлытöг вешйис бокö. Дерт, татшöма велöдчöмнад джуджыд тöдöмлунтö он кöвъяв. Нöшта на уна оланiнъясын öтуввезъя йитöдыд абу, да и компьютер-ноутбук вылад уджтöмалысь бать-мамлöн сьöмыд оз жö чукты. Челядь, кодi оз на вежöрт, мый велöдчöмыд ковмас водзö олöмас, чунь пырыс видзöдöны татшöм тöдöмлун босьтöм вылад. Сöмын водзмöстчысь, уджысь прöстджык да быдтасъяс вöсна тöждысьысь бать-мам мырдöнсорöн да гöлöс лэптöмöн пуксьöдлöны быдтасъяссö пызан сайö кельыдлöз экран водзö югзьöдыштны вежöрнысö. Но танi бара люкасян уна мытшöдкöд. Кöть лыддьыссьö миян канмуын дон босьттöг челядьöс велöдöм, окота сертиыд он на и босьт öтуввезсьыд тöдöмлунтö — быдлаын корöны сьöм. Кодсюрö буриника нажöвитчö йöзлöн öнiя шог вылас. Зэв стöч комияслöн шусьöг: беддьыд кык пома. Öтар помыс тшöктö велöдчыны, а мöдарыс колскö нырад.
Но медсьöкыдыс тадзи олiгад лунтыръясöн челядьöс нёль пельöса жырйын шом-мöдöм. Найö пöрысь пöль-пöч моз бексö сиралöмöн оз пукавны, мед пыр легöма да мыйкö пустуйтöма-вöчöма. Таын сиктсаыдлы кокнидджык, лун сьöвмöснас кöть йылöмыс петыштлöны горт дор йöрас пыркöдыштны ыззьöм ловъяссö. А карса олысьяслы ме ньöти ог вежав, öд унджыкыс ки пыдöс пасьта инын суткиясöн жмутвидзöны. Ме öнi тöлысь нин гипса кока да ок кыдзи найöс гöгöрвоа. Дзик быттьö космосö шыбитöмаöсь корабльöн. Он, небось, некытчö ас окотасьыд быйкнит — гöгöр стен, а петны он лысьт, верман вирус кöвъявны.
Кодi удитiс, десантöн шыбитiсны быдтасъяссö бать-мам дорас ылi грездъясö. Колöкö, сьöлöм выланыс и кокнидджык, но сэнi тайö йылöмсö видзысьяслы олöмсö кывйыд оз бергöдчы шуны ма панялöмöн: колö сы ыджда терпенньö да вейяс, хлыста кер пысалан трос кызта.
Висьöм асыкалiс нин дзоньнас му шарсö, но унаöн некыдз оз кöсйыны гöгöрвоны, мый колö йöршытчöмöн олыштны да видзчысьны сiйöс разöдöмысь. А кывйö сетчытöмъяссö, збыльысь, буди, колö плешкас буриника котшöдыштны, мед чипан ыджда юр вемныс пыркнитчыштас, да гöгöрвоасны, мый вöчсьö на гöгöр.
Владимир Шомысов.

Комментарии:

Добавить комментарий

Свежий выпуск: 28 марта

Осторожно — мошенники!