Ыджыд лун — Енлы эскысьяслöн медся важ пасъян лунъясысь öти. Му вöдитысьяслöн сiйö йитчöма шондi петöмкöд, вöр-ва ловзьöмкöд, виччысяна урожайкöд, гортса пемöсъяскöд да семьялöн дзоньвидзалункöд. Ёна важöн йöз эскисны, мый Христос ловзян лунö шондi чеччö ворсöдчöмöн. Найö кыйöдлiсны сылысь йöктöмсö джуджыд мыльк либö кыр йылö кайöмöн. Важöн нин казялöма: Ыджыд лунö кö сöстöм енэжын ворсöдчö шондi, то гожöм лоö мича, арыс озыр. Зэрас кö — кöтöдас гожöм пуксьытöдз.
Ыджыд лунлы воча войö юкмöсысь босьтлiсны ва, грекъяс, лёк мöвпъяс, лёк шуалöмторъяс вöтлöм могысь резйывлiсны сыöн олан жыръяс.
Енлы эскысьяс шуöны, мый бур кывйöн вежöдöм Ыджыд лунся сёян-юан ыджыд вына да вермö отсавны сьöкыдлунъясö, мездö висьöмъясысь.
Отец Тихон вежавидзысь да йöзöс гöгöрвоысь вичкоын служитысь. Храмö волысьяс да енлы эскысьяс вылö донъялöны батюшкаöс став сьöлöмсянь служба нуöдöмысь, вичко ловзьöдöм-мичмöдöмысь. Сöмын тай унаысь деливö овлö — оз став кöсйöмыд пырысьтöм-пыр пöртсьы олöмö. Кисьтны-бырöднытö кокниджык вöлöма — зэв регыдöн и жуллисны Ен керкатö. Пожöгса Живоначальнöй Троица вичкоö о.Тихон воис 2010-öд воö, а сыöдз дас нёль во вöлi батюшкаöн Мысса Предтечи да Крестителя Господня вичкоын, кытчö индывлiсны 1996-öд вося юнь тöлысьö Уллянаса манастырын кык во служитöм бöрын. Праздник водзвылын о.Тихон чолöмалö газет лыддьысьясöс вичкоса медыджыд гажöн:

• Дзик быд во Ыджыд лун виччысям выль олöм пансьöм моз. Кутам надея выль вынъяс, миянгöгöрса радейтöм да бур оласног вылö. Ыджыд лун — тайö Иисус Христослöн кулöм бöрсяыс Помтöм Олöмö вудж-öм. Енлöн Пи, став мувывса олысьяслöн Пи шедöдiс вермöм кувсьöм вылын зэв сьöкыд кадö. Абу кокни кад миян и öнi. Воысь дырджык ыджыдалö сьöкыд висьöм, олöмыс уналöн öшалiс, колöкö, öнöдз на öшалö вöсни сi вылын. Сувтö юалöм: мый лоас водзö? Гашкö, став олöмным миян, челядьдырсянь верстьööдз вермöмъ-ясным, матысаöс радейтöм, ёртъясöс пыдди пуктöмыс весьшöрö? Абу, абу!
  Христослöн ловзьöм йылысь тайö юалöмсö стöча восьтö Евангелиеысь бур юöрыс! Миянлы сöмын колö гöгöрвоны бур юöрлысь висьталанторсö: тайö югыдлун, тайö лача, тайö Енлöн вын, тайö став радлунъяснас да сьöкыдлунъяснас морт олöмын медшöр могыс! Лыддьöй Лукаöн гижöм Евангелие.
  Праздникöн ставнытö! Христос Воскресе!
  Владимир Шомысов.
  Снимок гижысьлöн.