Шудыс — ыджыд семьяын

[ A+ ] /[ A- ]


Шань бать-мамыдлöн и челядьыс авъяöсь. Збыльысь, тадз и эм. Донысь Надежда Константиновна да Николай Павлович Холоповъяслöн (кувсьылiс нин) ныла-пиаыс этшнас бурöсь, вежавидзысьöсь. Степан пиыс ассьыс шудсö аддзис Ухтаысь. Наталья нылыс Иван верöсыскöд эз пов-зьыны сьöкыдлунысь да быдтöны вит челядьöс.

  • Сьöкыд кутны ыджыд семьятö? — юалi Иван Николаевичлысь.
  • Абу кокни. Уджала öтнам, а гöтырöй пукалö ичöт нывкöд. Сьöм, дерт, оз тырмы унатор вылö, но челядьöс йöзсьыс лёкджыка ог пасьтöдöй, чöскыда вердам, пестö дасьтам ас кадö,- вочавидзис айлов. Семья олö öтвылысь, ставöн чеччöны водз: челядьыс мунöны школа-садйö, Иван Николаевич удж вылö. Наталья Николаевна да челядьлöн ыджыд мам Надежда Константиновналöн луныс кольö тöдлытöг: колö удитны вöчны гортгöгöса удж, пуны, пелькöдны керка, пеславны кöлуй да мукöдтор. А рытнас отсалöны вöчны гортса удж школаын велöдчысь Ильялы да Кристиналы. И быд лун тырöма тöждъясöн. Сьöкыд, дерт, видзöдны быдöн бöрся. Кор кодкö кытчöкö мунас, батьмам гажтöмтчöны. Ставныс кö гортаныс, то сьöлöм выланыс долыд. Рытнас быдöн мыйкö вöчö. Гырысьджык челядь дасьтысьöны аскиа урокъяс кежлö, а поснияс ворсöны чачаясöн. Öтлаын видзöдöны телевизор.Кор локтi Холоповъяс дорö , найö пырысь-пыр жö корисны юны чай. Майбыр, восьса йöз. Ыджыд керкаын сöстöм, шоныд. Ставныс радейтöны, тöждысьöны öта-мöд вöснаыс. Надежда Константиновна нимкодясис, мый сöмын бур, шуда семьяын быдмасны авъя челядь. Ыджыд мам век орччöн, бать-мамлöн уджалiгöн либö челядьлöн висигöн тöждысьö став вöснаыс. Аддзö кад петавны град йöрö и вотчыны.
    Наталья Николаевна школаын вöлi кывкутысь нывкаöн, велöдчис окотапырысь, радейтiс сьывны, йöктыны, пырöдчис аканьясöн ворсан театрö да мукöд котыртöм гажъясö. Ань висьталöс, мый бать-мам радейтiсны чоя-вокаöс. Налöн уджачлуныс, öта-мöдсö пыдди пуктöмыс велöдiсны нывкаöс лоны сэтшöмöн жö. Школа помалöм бöрын Наташа велöдчис штукатур-малярö, но уджыс эз во сьöлöм вылас. Ветлiс велöдчыны пусьысьö да ичöт нылыс чужтöдз том мам уджалiс садйын. Иван Николаевич чужис Ручын ыджыд семьяын: ставныс сизим чоя-вока. Школа помалöм бöрын велöдчис бульдозеристö да нёль во ПМК-ын вöлi машинистöн. Наташакöд тöдмасисны 2014-öд воын, а сэсся гижсисны. Иван Николаевич быд лун лэччывлö уджавны Кулöмдiнö. Бать-мам оз кольны бокö сиктса олöмысь: ветлöны челядьныскöд Кулöмдiнын либö Донын котыртöм гажъяс вылö. Найö тöждысьöны дзоньвидзалун вöсна: гожöмнас гырысьджыкъясыс шойччöны лагеръясын. Бать-мам велöдöны челядьсö öткодя. Найö тö-дöны, мый быдтасъяскöд колö сёрнитны, колö гöгöрвоны кöсйöмъяссö, шогсьöмъяссö, лоны бур ёртöн да велöдысьöн. Школаын либö садйын кö бура донъялiсны, то Наталья Николаевна да Иван Николаевич ошкöны. Витнанныслöн асланыс этш. Медся ыджыдныс Илья велöдчö Кулöмдiнын 6-öд классын. Урокъяс бöрын отсасьö гортсаяслы: ваялö ва, пыртлö пес, весалö лым, а сэсся котöртö шойччыны социокультурнöй шöринö. Зонка гожöмнас кыйö чери. Кристина нывныс ветлö Дон школаса 4-öд классö, серпасасьö, сьылö-йöктö окотапырысь. Мамыс висьталiс, мый нывка пуктö уна вын да кад, мед босьтны тöдöмлун. Куим арöса Петя да вит арöса Катя сиктса садйынöсь, чоя-вока радейтöны серпасасьны. Медся ичöтныс Виктория — öкмыс тöлысся. Наталья Николаевна нылукыскöд пукалö гортас.
    Челядь чужöм бöрын том семья олiс торйöн, а сэсся кутiсны овны Надежда Константиновнакöд тшöтш. Колис кад, чужисны посниджыкъяс. Гозъя мöвпыштiсны выль оланiн йылысь. Öтувъя сёрнитöм бöрын ставсö бура артыштiсны да мамкапитал вылö Кулöмдiнын кутiсны кыпöдны керка, вайöдiсны вевт улöдз. Унджык уджыс, дерт, сюрис Иван Николаевичлы. Быд прöст здукö мыйкö вöчис сэнi. Отсасисны унаöн: и рöдвуж, и ёртъяс, кодкö уджöн, кодкö сöветöн. Уджыс уна на, но во мысти чайтöны овмöдчыны. Зэв бур, мый государтво ыджыд тöжда уна челядя семьяяс вöсна.
    «Челядь — миян озырлун, шудлун. Ми на вöсна олам, уджалам, эскам, мый пöрысьмам да найö лоöны орччöнöсь»,- тадзи кывкöрталiсны Наталья Николаевна да Иван Николаевич Холоповъяс.
    Нина Калистратова.
    Снимокыс гижысьлöн.

Комментарии:

Добавить комментарий

Свежий выпуск: за 21 мая