Владимир Валентинович Артеев кок вылас сувтiс, пызан-диванö кутчысьöмöн да кöстыльяс отсöгöн босьтчис ветлöдлыны 12 арöсöн. Медводз гортас, мöд вонас петiс йöрö нин, сэсся улича вылö. Усьласьлiс, доймавлiс, но эз няргы, асьсö песiс водзö. Босьтчис ветлыны ылöджык и ылöджык, Выльгорт помöдз, Помöсдiнöдз.

• Мудза да сэсся пуксьыштла, шойччышта да водзö. Медшöрыс – мунны, мед кö кöстыльясöн, но ас кокъясöн. Дерт, ёнджыкасö ветла гожöмын. Кытчöкö кö колö мунны быть, шуам бурдöдчанiнö, пета тöлын кöть арын, — ловнас оз усь том морт.
  Бурдöдысьяс эз казявны, колöкö эз кöсйыны дойдны Раиса Егоровна мамыслысь сьöлöмсö, эз висьтавны, а арöс тырöмöн да став врачьяс дорын петкöдчигöн и юöртiсны, мый кагалöн висьöны кокъясыс. Кытчö сöмын эз нулы ань писö. Тшöкыда лэччылiсны юркарö, ветлiсны Уфаö, Самараö, весиг Украинаö, но сiйö эз сувт кок вылö. Дзоля дырйи зонка вöлi кокни на да ки вылас и новлöдлiс. Но сiйö быдмис. Тöдчымöн лоис кокни, кор Владимир босьтчис ветлöдлыны кöстыльяс отсöгöн.
  Садйö эз ветлы. Кор Раиса Егоровна уджалiс, олiс Егор Семёнович ыджыд батьыскöд. Сiйö и велöдiс ворсны шахматысь, шашкиысь, шегйысь. Ёна картыасьлiсны. Вöлi зарни киясаöн да пыр мыйкö да вöчис. Кöрттув, мöлöт да ножовка сетлiс и внукыслы. Кокыд кö пö оз новлöдлы, мед уджалiсны юрыд да киясыд, олöмад пö ковмас.
  Школаö эз жö мун. Велöдчис гортас. Ичöт классъясын тöдöмлун сетiсны Альбина Ивановна да Реция Михайловна Поповаяс. Владимир найöс пыр виччысис, сылы вöлi окота тöдмавны выльтор. Витöд классянь öкмысöдöдз волывлiс Нина Николаевна Глуханич. Велöдiс математика, роч кыв да литература, коми кыв да литература, история да геометрия. Владимир медся ёна радейтiс артасьны. Велöдысь казялiс зiльöмсö да сетлiс содтöд, мед зонка сöвмис и ачыс. Мамыс судзöдлiс вель уна книга. Но эз ёна лыддьысь, радейтлiс сöмын «боевикъяс». Гортас жö и волiсны сiйö кадын школаса директор Ф.Э Линдт, завуч Р.А.Уляшева, вöлi и ачыс Нина Николаевна, нуöдiсны экзамен. Мамыс уналаö ыстылiс документъяс, мед пиыс велöдчис водзö. Но вермытöм зонмöс эз босьтны, докуметъяс мöдöдлiсны бöр. Сэки дистанционнöя эз на велöдны. Весиг бурдöдысьяслöн висьысьясöс донъялан, мортыс вермас-ö уджавны либö велöдчыны, комиссияöн веськöдлысь Е.В.Климович шуис, мый Владимирлöн эмöсь позянлунъяс велöдчыны водзö да тайöс вöчны быть.
  Зонкалысь ветлыны ыджыд кöсйöмсö казялiс спорт школаын велöдысь Николай Николаевич Карманов да кöсйис ышöдны спортö. Лавкаысь босьтöм лыж вылö ачыс вöчлiс пуклöс. Видлам пö, гашкö артмас. Раиса Егоровналы вöлi нимкодь, мый висьысь пи вöсна тöжда и велöдысь. Сэки Выльгортын машинаыд вöлi этша на да улича вылын да чой йывсянь и исласис. Николай Николаевич 17 арöса Владимирöс нулiс весиг юркарö, кöнi вермытöмъяс ордйысисны лыжиöн котралöмын. Сэнi зон аддзис да тöдмасис аскоддьöмъясыскöд, кодъяс ловнас оз усьны да водзмöстчöны спортын. Но кылiс, мый лыжиöн котралöм абу сылöн да дугöдчис.
  Ёна да пыр ветлöдлöмöн кутiс ёртасьны сиктса зонъяскöд, дзоляджык Елена чойыслöн öти классын велöдчысьяскöд. На дорö ветлö, волывлöны и Володя дорö. Александр Шомысовкöд да Артур Уляшевкöд ворсö шахматöн. Пöвсö бергöдлöмöн шашкиысь ворслö öтнас. Быдмигас чойыскöд, мамыскöд да Галина Егоровна вежаньыскöд шегъясьлiс.
  Кад лэбö да шуис велöдчыны водзö. Мамыскöд ньöбисны машина да 2014-öд воын мунiс юркарö велöдчыны водительö. Буретш сэки автошколаысь велöдысьяс волывлiсны Помöсдiнö, но тайö эз во сьöлöм вылас. Öд колiс эськö ветлöдлыны Кулöмдiнöдз, велöдчыны журъявны туйяс кузя, сэтчö жö мунны экзаменъяс вылö. Сёрнитчис Елена чойыскöд, а сiйö помалiс коми пединститут, олiс да велöдiс карса школаын ичöт классъяс, да лэччис Сыктывкарö. Сэки танi этша на ветлiс такси, а карад пö коран да öшинь улад локтöны да нуöны кытчö колö. Сдайтiс туйвывса правилöяс кузя да автодромын экзаменъяс, а карса туйяс кузя муртса сорсьыштiс да мöдысь эз нин ветлы. Гортас кадысь кадö велöдö туй вылын урчитöмторъяс да кöсйö нöшта видлыны. Сiйö жö воын районса йöзöс уджöн могмöдан шöрин пыр Сыктывкарса кооперативнöй техникумын куим тöлысь велöдчис бухгалтерö. Олiс öтувъя оланiнын. Велöдчыны ветлöдлiс подöн. Километра туй вуджис часöн. Шойччан лунъясö олiс чойыс дорын. Удж сюрлiс юркарын, но ичöт удждон. Кöртымавны кö оланiн, чойыслöн аслас семья да эз кöсйы дöсадитны найöс, эз коль эськö сьöм тыр-бура олöм вылö. Уджöн могмöдан шöрин ыстiс Помöсдiн вожын кык котырö, кодъяс буретш корсисны бухгалтеръясöс, но ыстысисны кутшöмкö помка вылö да эз босьтны. Буретш бухгалтерлöн уджалан программа серти велöдiсны вöдитчыны компьютерöн, гортас ньöбисны ноутбук да велöдiс и мамсö, пасйис «Вконтактеын». Интернетö пыралöмöн тöдмалö уна выльтор. Владимир кöсйö нöшта велöдчыны вурсьысьö. Шыöдчис уджöн могмöдан шöринö да, тыдалö, велöдчыны окотитысьыс оз чукöрмы да эз на ыстыны. Унаторйö на пö колö велöдчыны.
  Зон кык во сайын шуис овны ас-кежысь. Пöрысь ыджыд мамыслöн кольлiс керка, да мамыс, дядьыс да Галина Егоровна вежаньыс дзоньталiсны сiйöс. Вежисны öшиньяс, резьöдiсны ыджыд пач, да Раиса Егоровналöн вокыс вöчис выльöс, дзоляöс. Йиркас тувъялiсны пöв, мавтiсны, шпалеритiсны стенъяссö. Дерт, том морт кылiс, мый оз кольны öтнассö. Пес пыртны волöны медся матыссаясыс, ёртъясыс, ломтö-гудралö ачыс нин. Ачыс жö пражитлö калбасöн картупель, чипанкольк. Сёян вайöны и мамыс да вежаньыс, на дорö жö корсюрö петалö нуръясьны. Рытъяснас видзöдö телевизор, пукалö интернетын.
  Владимир радейтö кыйны чери. Коркö öтнас, коркö ёртъясыскöд ветлö Помöс ю дорö. Кык километра кымын мунö муяс кузя. Мыш вылас нурясянторъясöн ноп.
• Векджык мöдöдча мича лунъясö да войколöн. Но öтчыд зэрмис, гымалiс. А вöлiм ёрткöд, кöтасим. Пестiм бипур да косьтысим. Асывланьыс локтiм гортö, — казьтылiс зон. Мамыс тшöтш велöдчылiс водительö да вотчыны машинаöн ветлöны Ягкöдж сайö, босьтлöны и Владимирöс. Туй боксьыс и вотö тшак да тусьяс.
  Восьса сьöлöма, варов да шань морт. Нимкодясьö гöсьтъяслы. Оз радейт, кор сiйöс жалитöны. Мый вермö вöчö ачыс. Мамыскöд да вежаньыскöд колльöдiс менö. Сэсся бара на петiс туйö.
  Марина Дадашова.
  Гижысьлöн снимок вылын: Владимир мамыскöд.