Кулöмдiнса школаын квайтöд классын велöдчысь Елизавета Игнатова зэв восьса да нырччысь нывка. Инас оз öшйи, пыр мыйкö колö вöчны. Во да джын сайын Лиза кылiс Россияса челядьлöн öтмунöм йылысь да пыр жö матыстчис Лариса Петровна Зезегова школаса вожатöй дорö. Сiйö кадсяньыс öтмунöмын да пыр водзмöстчö.
2019-öд воын арся каникулъяс дырйи Немдiнö чукöртчылiсны районысь нырччысь челядь. Найöс велöдiсны гижны бала, висьталiсны, мый сiйö сэтшöмыс и мыйла колö.
Корисны мöвпыштны. Сэнi и Лиза нывъёртъясыскöд шуисны вöчны районса шöр больничаын куйлысь нывкаясöс да зонкаясöс ворсöдöм кузя бала. Тöдмöдны кутшöм гаж пасйöны апрель медводдза лунö, а сы бöрын быдногыс ворсöдны-гажöдны посниясöс. Öд сэнi куйлiгöн ёна гажтöм. И тайö баланас вермисны, налы козьналiсны Россияса öтмунöм паса футболкаяс.
Тавося мартын нывкалы юрас воис мöвп лöсьöдны нöшта бала. Шыöдчис Лариса Петровна дорö, кодi индiс сылы колана туйвизь. Тадзи Лизалöн артмис Кулöмдiнын казьтылан пасъясöн челядьöс тöдмöдöм кузя бала. Шöр мöвпыс татшöм: челядь котыръяс кутасны ветлöдлыны пасъяс дорö. Висьталасны кор да кодлы найöс сиöма. Сiдзжö, сэнi налы нуöдасны юалöмъяса ворсöм. Бала дасьтыны отсалiсны Лизалöн бать-мамыс, кодъяс висьталiсны некымын пас йылысь, найöс аддзылiсны вöчигас.
Кутасны отсасьны ас кöсйöмöн окотитысьяс. Мöвпыштöмторсö Лиза кöсйö збыльмöдны гожöмнас.
-Ме видзöда аслам ёртъяс вылö да казяла, мый унаöн оз тöдны миян сиктлысь олан туйсö. А тайö ышöдас найöс корсьысьны, туясьны. Нöшта ыджыд бур лоö казьтылан пасъясöн кö тöдмöдны ичöт класса велöдчысьясöс. Öд ворсiгöн челядь унджыктор сюркнялöны пель саяныс, — висьтасис Елизавета.
Зэв нимкодь юöрöн лоис, мый нывкалысь тайö мöвпсö йöзöдiсны «Вконтактеын» республика тшупöда конкурсын. Апрель тöлысьын вöчасны кывкöртöдъяс. Нывка ёна окотитö петны вермысьяс лыдö.
Лизаöс бура пасйис и Лариса Петровна:

• Кыдзи пырöдчис öтмунöмö, сiдз и босьтчис зiля петкöдчыны быдпöлöс уджын, нырччысь нывка. Юасьö пыр, мый лоö матысса кадö.
  Уджтасъясö пырöдчöм кындзи, нывка радейтö серпасасьны да велöдчö снимайтчыны. Тöвнас вöлi челядьлöн Россияса öтмунöмлöн нöшта на öти чукöртчöм, кöнi ныв-зонмöс велöдiсны снимайтчыны да чукöртны-тэчны вöчöмсö. Сыöдз Лиза велöдчис ачыс интернетысь корсьысьöмöн.
• Челядьлöн Россияса öтмунöм восьтö ыджыд позянлунъяс. Öнiя кадö позьö петкöдчыны интернет пыр зэв унапöлöс конкурсын. Мый ме окотапырысь и вöча. Тöдмалан уна выльтор, — содтiс Елизавета.
  Сиам нывкалы шедöдны уна вермöм, мöвпыштны да лöсьöдны уна на бур да тöдчана бала да пöртны олöмö найöс, ышöдны и мукöдöс.
  Галина КЛЮЖЕВА.
  Снимок гижысьлöн.