Кулöмдiнса шöр школаысь ичöт класса челядьöс велöдысь Валентина Степановна Поповалысь нимсö гижисны Сыктывкарын велöдысьяслöн Слава аллеяын.

Ань 38 во нин сьöлöм шоныдсö, зумыд тöдöмлунъяс сетö садйысь воöм нывкаяслы да зонкаяслы, медводдза лунсяньыс öтувтö найöс, да топыда ёртасьöмöн, öта-мöдлы отсасьöмöн «восьлалöны» нёль во чöж. Валентина Степановна туйдö челядьöс бурö, быдöн дорö сибöдчö аслыснога. Кужö ышöдны лöньясöс, да мöдарö, лöньöдны визув да вильышъясöс. Кулöмдiнса школаын Валентина Степановна медводдзаöн босьтчис велöдны челядьöс быд боксянь сöвмöдан «Школа 2100» программа серти. Уджас пыр пыртö выльтор, урокъяс вылын быдтасъясыслöн öзйöны синъясныс, зэв азыма ставсö сюркнялöны пель саяныс, быдöн лэптö ки, мед вочавидзны да босьтны бур оценка. И тадзи быд урок вылын. Велöдчысьяс пырöдчöны да тшöкыда вермöны районса да республикаса конкурсъясын да олимпиадаясын. Валентина Степановналöн пыр эмöсь сöмын «5» вылö велöдчысьяс. 2009–öд воын аслас сямöн да тöдöмлунъясöн петкöдчылiс «Вося велöдысь» районса конкурсын, лоис мöдöн.

Бур йитöда батьмамкöд, öтув уджалöны, венöны сьöкыдлунъяс. Медводдза воясын ковмылiс шоча ветлыны бать-мам ордö гортöдзныс, сёрнитны, видзöдлыны, кыдзи олöны-вылöны. Челядькöд петавлöны вöр-ваö. Буретш танi и тыдовтчö нывка да зонкаяслöн öтувъялуныс, öта-мöдлы отсасьöмыс. Ворсiсны-шойччисны бур-пöт. Сылöн мелi кияс пыр мунiс да витöд классö вуджис челядьлöн 10 сайö котыр. Оз вунöдны шань да мелi велöдысьöс, корöны адззысьлöмъяс вылö. Нимкодь Валентина Степановналы, мый сылöн быдтасъяс пиысь кодсюрö тшöтш бöрйисны велöдысьлысь удж.

– Велöдысьöн лоны ышöдiс нывъёртöй. Быдмигöн кужи ас гöгöр öтувтны ас тшöтшъяясöс, юрнуöдi наöн. Пыри Коми педиститутö. Диплом босьтöмöн ыстiсны эськö Немдiнö, но вöлiс позянлун, да кольччи Кулöмдiнса школаö. Медводдза воясын туйдысьяснас вöлiсны ыджыд сяма велöдысьяс Татьяна Витальевна Макарова да Валентина Владимировна Чаланова. Эг сорси, мый бöрйи сьöлöмöн радейтана уджсö, – висьталiс Валентина Степановна, кодöс уна вося да бур уджысь почёт грамотаясöн пасйисны Россия федерацияса да республикаса велöдан министерствояссянь.

Татьяна Чувьюрова.

Снимок Антон Поповлöн.