Сыктывкарса медколледжын велöдчысь Пожöгдiнса Владислава Лопырева мöдöдысь пырöдчис «Том профессионалъяс» республикаса конкурсö, таво босьтiс эзысь медаль. Кольöм воын петкöдчис «Социальный уход», а таво «Лечебная деятельность» юкöнын.
Владислава нёльöд во велöдчö фельдшерö. Конкурсын вермöмыс висьталö зумыд тöдöмлун да босьтöм нин сям йылысь. Быд юкöнын колiс «нёрпалысьлысь» тöдмавны оласног, водзтi висьöмъяс йылысь, кывзыны элясьысьсö либö сылысь матыссасö. Видлавны «шыöдчысьöс» гöгöрбок, ылöсавны висьöмыслысь петкöдчöм, арлыд да висьöм тöд вылö босьтöмöн урчитны бурдöдöм.

Конкурслöн медводдза лунö еджыд халата миян бурдöдысь дорö «локтiс» ыджыд кынöма нин нöбасьысь ань. Сюся видлалiс акушер моз, тöдмалiс, кодöс «виччысьö» да кыдзи кынöмас асьсö кылö да куйлö кагаыс. «Волiс» и сакарысь висьысь. Гöгöрвоöдiс, мыйö кутчысьны тайö нёрпалысьыслы. Велöдiс вöдитчыны глюкометрöн, тонометрöн, вöсньöдчöм могысь öтлаын лöсьöдiсны физкультура вöчанног.

Мöд лунас колiс петкöдлыны тэрыб отсöг сетанног. Фельдшерско-акушерскöй пунктö Владислава Романовна дорö «вайисны» туйвывса неминучаö веськалöм да ёна доймалöм мортöс. Бурдöдысь водтöдiс, сувтöдiс вир петöм, видлалiс гöгöрбок. Вöчис дой лöньöдан укол, вурис доймöминсö, шинаöн гартiс кок чегöминъяссö. Дорйис висьысьöс. Нöшта видлалiс мöд шыöдчысьöс, донъялiс вылын давлениея мортлöн висьöмыслысь тшöкыдлунсö, велöдiс, мыйысь видзчысьны да кыдзи кутчысьны висьöм топöдiгöн.

Конкурслöн бöръя лунö аскиа фельдшер дорö «локтысьлöн» висьöм петкöдчöмыс вöлi пневмония сяма, да пöрöс паськалöмöн ковмис кышавны чумаысь видзан паськöм. И тадзи куим час чöж, сёрнитöмöн да юасьöмöн тöдмалiс мортыслысь водзтi висьöм, висянног, кывзiс элясьöм да пуктiс стöч диагноз, урчитiс бурдöдчанторъяс. И тайö вöлi медся сьöкыд петкöдчöм.

Владиславалы медся сьöлöм вылас воис бурдöдан удж юкöнын уджалöм-ыс. «Нёрпалысьöс» зэвтöма холециститöн кузя висьöмыс. Сьöлöмыс висьö али холецистит тöдмалöм могысь пыр жö вöчис электрокардиограмма, нинöм лёкыс эз тыдовтчы, да сетiс бурдöдысьлысь колана отсöг. Урчитiс бурдöдчанног.

«Том професионалъяс» конкурсын аскиа бурдöдысьяс орйдысисны Сыктывкарса медколледжын ноябр 24-öд лунсянь декабр 3-öд лунöдз. Тайö туйвизяс пырöдчисны Воркута, Ухта да Сыктывкарса медколледжъясын велöдчысьяс. Конкурссö котыртiсны республикаса правительство, велöдöм, наука да том йöзкöд уджалан министерство, Сыктывкарса политехническöй техникум бердын «Том профессионалъяс» республикаса шöрин, сьöмöн отсалiс «Монди СЛПК» акционер котыр.

— Аттьöала велöдысьясöс, конкурс чöж «висисны» миян вöсна, отсасисны. Зэв бура петкöдчисны, быттьö збыль висьысьясöс ворсысьяс, зэв бура могмöдiсны став колананас, весиг фельдшерско-акушерскöй пунктыс вöлi быттьö öнiя бурдöданiн кодьöн. Дерт, ёна лöсьöдчöмöн да мукöд вылас видзöдöмöн велöдчи унаторйö, ставыс лöсялас аскиа уджын, — кывкöртiс Владислава Лопырева.
Асланым корреспондент.
Снимок В.Лопыревалöн чукöртöмысь.