Томъясöс туйдысьяс

«Помöсдiн» овмöдчöминса юралысь Анатолий Егорович Уляшевлöн вöзйöмöн сиктса администрация дорын лöсьöдiсны сиктса медбур войтырöс пасйöм могысь Почёт пöв. Быд во сиктлöн чужан лун паныдö сэтчö öшöдöны сиктса медбур уджалысьяслысь да сиктын водзмöстчысьяслысь снимокъяссö, сетöны налы та йылысь свидетельство.
2021-öд воын пасйöма Помöсдiн школаын 46 во математика велöдысь Раиса Александровна Уляшеваöс да начальнöй классъяс велöдысь Вера Евлогиевна Пашнинаöс, Бадьёльйылысь библиотекаса уджалысь Нина Афанасьевна Уляшеваöс, Помöсдiнса культура керкаöн веськöдлысь Валентина Владимировна Соколюкöс, том войтырлöн «Аскиалун» котырöн веськöдлысь Илона Александровна Артееваöс, Помöсдiн фермаысь бригадир Мария Вячеславовна Уляшеваöс, тракторист Андрей Дмитриевич Курочкинöс, «Монди СЛПК» акционер котырлöн профсоюзын зiльысь Светлана Ивановна Поповаöс, врач-терапевт Сергей Серафимович Дёминöс, вöралысьяс да чери кыйысьяслысь «Помöсдiн» котырöн воддза веськöдлысь Валерий Вячеславович Поковичöс.

Спортивнöй слава

Татшöм нимпаса почёт пöв эм жö Помöсдiнын. Сэнi пасйöма сиктса медбур спортсменъясöс, кодъяс дзирдыштiсны район да вылiджык тшупöда вермасьöмъясын. Татшöмъяснас таво лоисны Помöсдiн школаын велöдысьяс Галина Андреева да Татьяна Чисталёва, полицияса участкöвöй уполномоченнöй Никита Игнатов, «Ривьера-С» ичöт кывкутана котырысь Геннадий Куковякин, студенткаяс Юлия Уляшева да Марианна Пашнина, Бадьёльйылысь старöста Виктор Уляшев, техник-метеоролог Юлия Попвасева, вузасьысь Алёна Мартынова да садса воспитатель Татьяна Уляшева.

Öлек грездын лоис пос

Вежавидзысь войтыр Борис Игнатов да Владимир Третьяков Öлекын вужвыйöн выльмöдiсны Помöс ю вомöн öшалысь пос. Öнi позьö смела вуджласьны да нимкодясьны татчöс серпасъяснас, снимайтчыны. Корöй ёртъяснытö да козьналöй налы чужанiнлысь синпöртана мичлунсö.

Юöра пасъяс

Помöсдiнын дасьтöны сувтöдны сиктса тöдчанаинъяс индан юöра пасъяс. Найö индасны туйсö Пресвятöй Богородицалöн Успеньелы сиöм вичколань, Тимофей Чисталёвлöн республика тöдчанлуна культурнöй наследиеö пыртöм керкалань, Изеркиль Порошкинлöн да Тима Веньлöн керкаяслань. Сувтöдасны и А.С.Пушкин нима парклань, Домна Каликовалöн памятниклань, Вениа-мин Чисталёвлöн бюстлань да Земскöй школалань индöдъяса пас.

Водзмöстчысьяс

Сиктса водзмöстчысьяс Помöсдiнын öтувтчисны унасикас котырö. В.А.Рогожников юрнуöдö сиктса Сöветöн, И.А.Артеева — том войтырöн, А.А.Глуханич — «Зумыд ош» котырöн, Н.И.Игнатов — вöралысьяс да чери кыйысьяслöн котырöн, Н.И.Карманова — «Помöсдiн» асвеськöдлан котырöн.
Сöмын асвеськöдлан котырлöн водзмöстчöмöн выльысь ловзьöдiсны Эжва ю бокысь ключ. Посйисны матыстчан кырсö да мичмöдiсны гöгöрсö. Локтан вося гожöмын кöсйöны восьтны сиктын музей, сьöмсö та вылö шедöдiсны нин. Меститчас сiйö купеч керкаын, кöнi бöръя кадсö вöлi школа.

Пионерболын — коймöдъяс

Кольöм тöлысьö Кулöмдiнса «Олимпик» вынйöр песанiнын «Жить здорово» бала олöмö пöртöмöн нуöдiсны «Пионербол-50 +» финалын вермасьöм. Помöсдiнса котыр, кытчö пырисны Ирина Александровна Игнатова, Тамара Степановна Карманова, Нина Ивановна Карманова, Светлана Ивановна Попова, Светлана Евгеньевна Мартынова да Галина Сергеевна Шомысова, тренер Юрий Алексеевич Поповлöн юрнуöдöмöн босьтiс коймöд места.

Ухтаысь зарниöн

Ноябр шöрын Ухтаын мунiс 2009-2010-öд воын чужöм зонкаяс костын волейболысь республикаса Первенство. Командаяслöн вöлi позянлун петкöдлыны асьнысö медвына ворсысьяскöд вермасьöмын да козьнавны нимкодьлун на вöсна «висьысьяслы». Помöсдiнса волейболысь ворсан котыр сьöлöмсяньныс зiльöмöн босьтiс медводдза места. Позьö шуны, мый кокниа вермисны Воркутаысь (3:0), Ухтаысь (3:0) да Сыктывкарысь (3:1) командаясöс. Артём Третьяковöс шуисны медбур ворсысьöн. А сыкöд тшöтш командаас пырисны Лев Козловец, Ярослав Дёмин, Святослав Уляшев, Лев Игнатов, Матвей Шомысов, Руслан Шомысов, Роман Уляшев. Командалöн медводдза тренерöн вöлi Виктор Игоревич Уляшов, а öнi найöс велöдö ворсны Евгения Анатольевна Уляшева. Чолöмалам ставнысö да ыджыд вермöм сиам и Рытыв-Войвывса федерация кытшлöн Первенствоын петкöдчигöн.
«Помöсдiн» овмöдчöминса администрация.