Кулöмдiнысь Иван Фёдорович Поповлы мойвиис. Том мортöс ас дорас корис асшöр уджалысь Роберт Васильевич Третьяков, могмöдiс выль техникаöн. Лоас пö позянлун уджавны туй овмöс став пöлöс техника вылас. Талун сöвтчан техникаöн, кöдздöдöмöн да лым усьöмöн сiйöс вежас ныр вылö, а сэсся олöмыс петкöдлас.

Иван Фёдорович Кулöмдiнысь. Школа помалöм да армия бöрын уджалiс лавкаын, сэсся брикет вöчаланiнын. Ыджыдджык Евгений вокыс велöдчис экскаваторса машинистö, уджалö Ухтаын «Боксит Тимана» котырын. Да ыззьöдiс, велöдчи пö и тэ, татшöм специальносьтыд пö быдлаын зэв колана, и уджыд лоас пыр. Иван аслас тшöт весьтö Сыктывкарын курсъяс вылын велöдчис сöвтчан техникаса водительö, практика вылö волiс «КомиИнвестПром» котырö. Сертификат босьтöмöн пырис туй вöчан да дзоньталан Кулöмдiнса юкöнö да сэнi зiлис квайт во. Пуксьылiс туй овмöс став техника вылö. Ветлiс командировкаясö республика пасьта, дзоньталiсны-вöчисны и асфальта и му туйяс, колiгöн ачыс дзоньталiс и техникасö.

— Сöвтчан техника кындзи менам категорияыс лöсялö уджавны экскаватор, каток да «Белорусь» трактор вылын. Кыдзи вокöй шулiс, специальносьтöй и збыльысь колана. Сьöлöм вылын долыд, мый меным дöверитiсны выль техника. Тöдса, мый Роберт Васильевич туйяс вöчö-дзоньталö «Йöзкостса бюджет» балаö да «Гöгöртас бурмöдöм» программаö пырöдчöмöн. А найö олöмö кутасны пöртсьыны и водзö, сiдзкö, и уджыс лоас, водзö кутам бурмöдны-лöсьöдны туйяс, — пасйис Иван Фёдорович.
Марина Дадашова.
Снимок гижысьлöн.