Иван Андреевич Римский «Шоныд сетан Коми компания» акционер котырлöн Кулöмдiнса юкöнын уджалö кöть регыд на, кык воысь муртса дыр, но асьсö петкöдлiс нин зэв кывкутысьöн да уджас нырччысьöн. Сыктывкарса автомеханическöй техникумын механикö велöдчöм бöрын локтiс татчö, сы вöсна мый танi жö прöйдитiс практика, босьтчис уджавны слесарöн. Уджсьыс орöдчывтöг водзö велöдчис Екатеринбургын, кыпöдiс квалификациясö. Талун сiйö зiльö механикöн нин. И колö шуны, мый уджсö ассьыс тöдö лючки бура. А уджыс зэв кывкутана: колö дöзьöр улын кутны став техникасö, кодъяс весиг район пасьтаса налöн участокъясын, тшöкыда кытшовтны найöс. Сылöн видзöдлас улын ставыс 25 техника, колö, мед найö пыр вöлiны «кок йылынöсь», лючки уджалiсны, жугалiсны кö, пыр жö корсьны запчасьт. Важмисны кö, колö вочасöн выльмöдны найöс. Мöд ног и оз вермы лоны, öд налöн кöнкö кö лоас неминуча, а коммунальнöй овмöсыд могмöдö йöзöс ваöн и шоныдöн, да татшöмторйыд вермас лоны виччысьтöг, техника мед пыр вöлi дась петны туйö бырöдны артмöм мытшöдсö.

– Кольöм воын на со воис МТЗ подула тайö экскаваторыс, – сёрнитiгмоз петкöдлiс Иван Андреевич. – Нöшта и кыскасьысь КАМАЗ да УАЗ «буханка», бöръясö мöдöдiм Немдiн юкöнö, Югыдъягö. Тайö экскаваторсö мöдöдам сэтчö жö, налöн сэнi жугалiс да. Таысь кындзи таво бара на воис выль экскаватор, Китайса, виччысям нöшта выль УАЗ «Фермер». Тадзи вочасöн выльмöдам автопарк.

Том специалистлöн нöшта мог кывкутны и уджалысьяс – водительяс да слесаръяс вöсна, медым бура уджалöм могысь найöс могмöдöма вöлi став колананас, пыртны мыйкö выльтор. Сэкжö видзöдны, мед ас кадö найö и шойччисны – тöждысьö налöн дзоньвидзалун вöсна.

Водзö вылö Иван Андреевич мöвпалö водзö на велöдчыны, паськöдны-сöвмöдны сямсö ли босьтны содтöд специальносьт. Олöмад пö ставыс ковмылас, тöдчöдiс сiйö.
Галина Нестерова.
Снимок гижысьлöн.