Талун — Культураса уджалысьлöн лун

[ A+ ] /[ A- ]

Кыпыд олöмö ышöдысь

Ольга Николаевна Дорогань 2000-öд восянь зiльö Шöръягса клубын, котыртö посёлокын быдсяма гажсö, велöдö сьывны-йöктыны челядьöс и верстьööс. Тшöкыда петавлöны асланыс котыръясöн районса да ылысджык сценаяс вылö. И видзöдысьяс найöс пыр вочаалöны зэв пöся.
Ольга Николаевна нюмбана, зiль, аслас уджö выльторъяс пыртысь, пыр мыйöкö велöдчö уджъёртъясыслысь, унасикас мастер-классъясын, прöйдитö курсъяс. Со и коронавирус паськавлан кадö, уна йöза уджтасъяс нуöдöм дугöдлiгöн, уджысь орöдчывтöг велöдчис «Краснодарса каналан культура институтын» Event-менеджмент профессия дорö содтöд тöдöмлунъяс босьтан программа серти да тайöс лыддьö аслыс зэв тöдчанаöн.
Ыджыд вын Ольга Николаевна пуктö быдмысь войтырöс культура боксянь сöвмöдöмö да та могысь найöс быдсяма уджтасö пырöдöмö. Мед эськö ичöтик вöрса посёлокысь челядь вермисны паськыдджыка тöдмасьны асланым районöн да странаöн. Со и зiльö петкöдчыны челядькöд быдсяма конкурсъясын. 2019-öд воын челядьлöн «Непоседы» йöктан котыркöд петкöдчисны «Коми кадриль» йöктöмöн сценавывса да художествоа искусстволöн «Планеталöн радлун» VIII-öд войтыръяскостса фестиваль-конкурсын да став Россияса хореографическöй искусстоволöн “Йöкты и мед став мирыс виччысьлас” II-öд фестиваль-конкурсын Сочиын да лоисны мöдöд тшупöда лауреатöн, а сiдзжö босьтiсны первой да мöд тшупöда дипломъяс. Тайö петкöдчöмъяс бöрас Шöръягса челядьöс корисны Москваö, ветласны нин буретш матысса кадö. Кыдзи висьталö Ольга Николаевна, сылы окота паськыда нимöдны ассьыс посёлоксö, сэтчöс енбиа войтырсö да петкöдлыны ыджыд мирсö быдмысь войтырлы.
О.Н.Дороганьлысь зiля уджа-лöмсö пасйöма районса администрациялöн Почёт грамотаöн, Россия Федерацияса культура министерстволöн аттьöалöмöн.
Ольга Васильева.
Снимок Артур Гарновлöн.

Комментарии:

Добавить комментарий

Свежий выпуск: 28 марта

Осторожно — мошенники!