«Ленин туйöд», 1970 вося март 19-öд лун

Самолёт кыпöдчö енэжö

Туйö петiгöн ми бöръям дженьыд трöпаяссö. Видзам кад, медым сiйö не воштыны весьшöрö. Тимшерö и Усть-Немö, Помöсдiнö и Сыктывкарö, Москваö и Ленинградö мунiгöн миянöс мездöны самолётъяс.
Усть-Куломса аэропортсянь нюжöдчöмаöсь «сынöдса трöпаяс» районса уна сиктъясö да посёлокъясö. Артыштны кö — кымын морт лэбö командировкаясö, шойччан керкаясö, мамъяс дорö гöститны — лыдтöм-тшöттöм.
…Самолёт кыпöдчис вылö и вылö. Пассажиръяс да самолёт бöрся сюся видзöдöны аэропортса уджалысьяс. На сайын уна сё пассажирлöн олöмыс. Самолётын лэбигöн ми видзöдам пилотъяс вылö, надейтчам на вылö. Ми öд ог и казялöй, мый аэропортысь диспетчер Николай Логинов — сiйö тшöтш жö пилот, но пилот — му вылын. Николай аслас жырсяньыс видзöдö, кыдзи лэбö самолётным, юасьö лэбöдысь лётчикъяслысь, ставыс-ö лючки-ладнö.

Николай Логинов Усть-Куломса аэропортын уджалö мöд во нин, а локтiс сiйö татчö Печорскöй объединённöй отрядысь.
Сынöдса машинаö сöвтöдз на тыр синъясöн тэ видзöдiн тэрыбиник, мичаник да лöсьыд статя нывбаба вылö. Виччысин, кор сiйö включитас микрофон да юöртас:
«…Самолёт 309-öд рейсö петны дась. Пассажиръяс петöй пуксявны самолётö…». А сэсся Зоя Ивановна Ракина видзöдлас пассажиръяслöн списокас — юалас, ставныс-ö эмöсь. И со ми самолётынöсь.
Да, ми ог вунöдöй аттьöавны билет ньöбöм бöрын Мария Ефимовна Поповаöс. Кыдз и Зоя Ивановна, Мария Ефимовна зэв жö шань да пöсь сьöлöма уджалысь. Уна сё морт волö сы ордö, и быдöнкöд мелi, ас коланiнас стрöг. И З.И.Ракина и М.Е.Попова аэропортын уджалöны уна вояс чöж. Найöс уважайтöны ас коллективын, уна пöсь кывъясöн шыöдчöны и пассажиръяс.
Неважöн, Сöветскöй Армияын служитöм бöрын, воис татчö Кулöмдiнса зон Феликс Гуляев. Локтöм бöрас сiйö велöдчыштiс Сыктывкарын, öнi сiйö — горюче-смазочнöй материалъяс кузя техник. Кыдз авъя да визув зонмöс, ёртъясыс бöрйисны Феликсöс комсомольскöй организацияса секретарöн.
Самолётсö лэбигкежлö лöсьöдö том морт Валерий Колобов. Сiйö неважöн локтiс Троицко-Печорскöй техническöй авиационнöй училищеысь. Том специалистлы пельпом сертиыс уджыс, вöчö сiйöс прöстöя, бура, сьöлöмсяньыс.
Аэропортлань матыстчигöн на ми ылысянь аддзам сынöдын везъясьöм антеннаяс, поводдя да тöв петкöдлысь устройствояс. Найö отсалöны метеостанцияса уджалысьяслы тöдмавны, кутшöм поводдя лоö аски либö матысса лунъясö.
Уна вояс чöж нин метеостанцияын нималöны техник Наталья Николаевна Рассыхаева, Мария Михайловна Липина. Мария Михайловнаöс сылöн бур уджысь унаысь нин ошкывлiсны почётнöй грамотаясöн. Ыджыд награда виччысьö сiйöс и В.И.Ленинлöн чужан лун водзвылын.
Овлöны сэтшöм лунъяс, кор сынöдса «кöрт лэбачьяс» оз вöрзьöдчыны му вылысь. Тайö сэк, кор метеостанцияса уджалысьяс юöртöны, мый поводдяыс лёкмас и кыпöдчыны самолётъяслы сынöдö некыдз оз позь. Сэк пассажиръяс виччысьöны поводдясö аэровокзалын. Öтияс лыддьöны «Союзпечатьлöн» киоскысь ньöбöм книгаяс, газетъяс да журналъяс. Аэропортын эм связьлöн отделение. Позьö и сёрнитны телефон пыр гöтырыдкöд, тöдсаясыдкöд, радейтана нывкöд… А сюммас кö кынöмыд — танi эм буфет да столовöй. Столöвöйяс öнi пусьö уналы нин тöдса пусьысь, кондитер да кулинар А.А.Клыкова. Сiйö аслас пöдругаяскöд вердас чöскыд пельменьясöн либö котлетöн, юктöдас морсöн либö яблочнöй сокöн да лунтыр кежлö сетас кыпыд настроение.
…Öдсö босьтiгöн самолётлöн моторыс кузя равöстлö, но кор иллюминатор пыр миянöс кытшалö мича кельыдлöз енэж, сьöлöмным бытть тшöтш жö лэбö сынöдтi самолёткöд орччöн. Ми радöсь, мый лэбам гортö, ми радöсь, мый мунам вöчны ыджыд задание.
Усть-Кулом.
В.Попова.

Снимокъяс Тамара Вахниналöн чукöртöмысь.