Танi быдöнлы радöсь

— Интернетыд некор оз веж книгатö. Библиотекаö волöны садиксянь нин, котырнас и бать-мамыскöд. Быдсикас ворсöмöн, конкурсöн да викторинаöн и чужтам книга дорö да лыддьысьöмö муслунсö. Ёна уджалам и школаын велöдчысьяскöд. Найö урокъяс бöрын окотапырысь котöртöны миян дорö. Торъя уджтасъяс дасьтiм ичöт класса велöдчысьяслы да гырысьджыкъяслы и гожся каникулъяс кежлö. Ме, позьö шуны, ачым быдми библиотекаын, став каникул коллявлi танi, ёна лыддьыси, петкöдчи конкурсъясын, вöлi медся бур лыддьысьысьöн. Кöсъя, мед танi и талун пуис олöм, — сёрнитiс Помöсдiнса библиотекаöн веськöдлысь Юлия Михайловна Душевская.
Öтлаын уджалысь Татьяна Ивановна Игнатовакöд ыджыд тöдчанлун сетöны чужан му туялöмлы, лыддьысьысьяс аддзысьлöны Помöсдiн вожса гижысьяскöд, тöдмасьöны коми гижысьяскöд, эксурсиияс пыр тöдмöдöны В.Т.Чисталёвлöн олан туйöн, сылöн уджъясöн, сиктлöн аслыспöлöслунöн. Юлия Михайловна олöма йöзöс велöдö вöдитчыны компьютерöн. И налы котыртöны быдпöлöс уджтас. Водзмöстчöны и сиктса олöмын.
Ань помалiс В.Т.Чисталёв нима культура колледж, Помöсдiнса библиотекаын 2015-öд восянь. Уджысь öтдор бöръя во велöдчö Сыктывкарса канму университетын.
2018-öд воын библиотекаыс лоис медбурöн экскурсияяс нуöдан уджтасъяслöн «Чужан му» районса конкурсын, 2019-ас вермис республикаса конкурсын да шедöдiс медся бур библиотекалысь ним. Таво Юлия Михайловна пырöдчис «Библиотекаса медся бур том уджалысь» республикаса конкурсö. Сиам аньлы шедöдны ыджыд вермöмъяс, мед налöн лыддьысянiн пыр вöлi медтöдчанаöн сиктса олысьяслы.
Марина Дадашова.
Снимок Юлия Душевскаялöн чукöртöмысь.