Февраль 15 лунö онлайнын мунiс «XXI нэм — роботъяслöн нэм» паса робототехникаысь районса витöд ордйысьöм. Пырöдчисны национальнöй бала серти Кулöмдiнса школаын лöсьöдöм цифра отсöгöн велöдчан «IT — куб» шöринын да Пожöг да Озъягсаын «Быдмöмлöн подув» кабинетъясын 1-5 классъясса велöдчысьяс. Босьтöм тöдöмлун да сям веськöдiсны вöр-ва видзöмлы.
Быд котырлы 60 минутöн колiс чукöртны да лöсьöдны робот, мичмöдны, а сэсся петкöдчыны вöчöмторнас. Уджалiсны зэв азыма, тыдалö кыдзи тайö программаыс ыззьöдö миянлысь челядьöс, ышöдö сöвмыны водзö. Öти часöн артмис компьютер отсöгöн уджалысь 4 да ас вынöн ветлан 2 роботлöн модельяс.

Кулöмдiнса школаысь петкöдчис нёль котыр. Нывкаясöс да зонкаясöс велöдö Олег Олегович Коноплёв. «Зотар» котырын сюсьлунсö петкöд-лiсны 4 «г» классысь Алексей Дёмин, Роман Ерчин, Амелия Липайкина да Тимофей Сладкоштиев. Шыблас мунö конвейерлöн лента кузя, датчик «аддзö» кутшöм тайö лöп-ёгыс. Мыйысь оз позь вöчны мыйкö мöдтор, сiйöс лэдзöны медбöрын, да веськалö контейнерö. Шыблассьыс кö артмас мыйкö, сiйöс лэдзасны торъя контейнерö. Тайö уджыс лоис медся бурöн да вермис «Медся сьöкыд техническöй бала» нимпасын.

«Миндроб» котырлöн, кытчö пырöны 3-öд «г» классысь Дмитрий Овсянников да Павел Ракин, артмис шыблас посньöдлан робот. Лöп-ёгыс веськалö посньöдланiнö, тайöс «казялiс» датчик, да роботыс босьтчис уджавны. Водзö шыблассö «сотöны» лазерöн да чукöртöны коляссö. Кык зонкалöн вöчöмыс босьтiс мöд места да медвылö донъялiсны «Медся аслыссяма бала» нимпасын.

«Спутник» котырö öтувтчисны 3 «б» классысь Богдан Сидоренко да 4 «а» классысь Артемий Корчевный да Константин Рассыхаев. Найö вöчисны шыблас автоматическöя чукöртан контейнер. Сiйö ачыс «кылö», да морт матыстчигöн воссьö вевтыс. «Лего-идеи» котырö 5 «а» классысь пырысьяс Иван Ужицкий, Григорий Савельев да Владимир Чисталёв вöчисны пу садитысь роботöс. Сiйö мунö да лöсьöдöм кост мысти ачыс сюйö муö пу. Тайö кык котырыслöн уджъясыс шедöдiсны коймöд места
«Молния» котыр чуймöдiс гортын пелькöдчысь, посни да гырысь ёг чукöртысь роботöн. Эм весиг стрела сьöкыда веськаланiнö сибалöм могысь. Пожöгысь Василий Михайлович Сенькинöн веськöдлöмöн 2-öд классын велöдчысьяс Вениамин Сенькинлöн да Виталий Мартюшевлöн тайö уджыс вермис «Сюсь керка» нимпасын.

Шензьöдiсны и Озъягысь «Робики» котырö пырысьяс Глеб Логинов, Марина Гевейлер да Николай Кузич. Ольга Степановна Скляр веськöдлöмöн вöчисны ас вынöн шыблас чукöртан, эм бергалысь шöтка, кодi пелькöдö контейнер да сы гöгöр. Тайö уджыслы «Медся тöдчана бала» нимпасын вичмис медводдза места.

Тайö ордйысьöмлöн вöлi медводдза тшупöд, да коронавируслöн ыджыдалöмöн эз позь чукöртчыны уналы, мунiс онлайнын. Мöд тшупöдын лоас «Роботофутбол» ордйысьöм, кöнi ковмас велöдчысьяслы чукöртчывны да ворсны ас вöчöм роботъясöн, да кадсö нюжöдiсны мартöдз.

Дасьтiс Марина ДАДАШОВА.  
Снимокъяс Мария Емангуловалöн.