Апрель 15 лунö тырис 15 во, кыдзи Иван Витальевич Тимушев босьтчис фермеравны. Сiйö Дереваннöй сиктын да и районын медводдзаяс лыдын лöсьöдiс крестьянин овмöс. Овмöсыс абу ыджыд, но сöвмö зумыда. Öнi видзö вит мöс да тшöгöдö квайт юр куккунаньöс. 2024 воын яй вылö быдтiстшöгöдiс 1,8 тонна скöт, сы лыдын и начкöм вылö, лысьтiс 15 тонна йöв. Скöтсö начкöм да яйысь вöлöга вöчöм могысь иналö «Усть-Куломский» кооперативö, кытчö пырö и ачыс Иван Витальевич, а йöвсö вузалö Дереваннöйса олысьяслы. Таысь кындзи фермер быд во 3000 квадрата метра му вылö пуктö картупель, урожайсö сiдзжö вузалö Дереваннöйса да юрсиктса олысьяслы.

Крестьянин овмöсъяслы государствосянь отсöгын вежсьöмъяскöд йитöдын Иван Витальевич кöсйö вуджны яя скöт видзöм вылö.
Иван Витальевич районын дзик öти фермер, кодi уджъяссö бергöдö дзоля «Синдай» кык тракторöн, сы дорö гöран, ытшкан, мудъян, куртан агрегатъясöн. Ас вынъясöн и вöчöны ставсö. Ыджыд отсöг сетöны нывъясыс да пиыс.

Иван Витальевичлöн семьяыс уна челядя. Алла ыджыдджык нылыс помалiс Сыктывкарса университет, лоис экологöн. Но босьтöм специальносьт серти эз сюр уджыс, да зiльö офтальмология асшöр компанияын, öнi содтöд велöдчö медицина туйвизьын. Елена шöркост нылыс помалö Сыктывкарса университетысь педагогика факультет. Алексей пиыс велöдчö 11 классын, кöсйö босьтны инженерлысь специальносьт, зiля дасьтысьö öтувъя экзаменъяс кежлö, ыджыд тöдчанлун сетö информатикалы да математикалы.
Чолöмалам Иван Витальевичöс, сиам ён дзоньвидзалун, семьяын лада олöм, сöвмыны водзö.
Анастасия Ярова, видз-му овмöс юкöнöн веськöдлысь.
Снимокъяс гижысьлöн чукöртöмысь.