Со сэсся и вöч буртö

[ A+ ] /[ A- ]

Май 26-öд лунö Пожöгö воліс нылöй верöсыскöд, гожöм кежлö вайисны сиктö шойччыны челядьнысö ыджыд бать да ыджыд мам дорö. Рытланьыс петісны туйö. Медводз надзöникöн, а сэсся вель ёна зэрмис, но машинаад он кöтась. Кулöмдінса заправитчанін ордйöдöм бöрын нырвизь босьтісны гортлань, Сыктывкарö. Видзöдöны – туй бокын кисö лэптöма 16-17 арöса кымын нывка, кучик куртка, капюшона. Тыдалö – ёна нин кöтасьöма, кынмалöма. Дерт, жальыд босьтас да, пуксьöдасны машинаад пикö воöм морттö. Тіралысь нылöс весиг пыртасны Ульянаöдз, оланінöдзыс, кöнкö. Кад кольöм мысти, сійö жö рытас 6 час 40 минутын, зятьлы телефон вылас воас смс-юöр: тіян карта вылысь муніс сьöм. Видзöмаöсь нин сюрс джын мында. Медводз босьтасьöмаöсь «Светлана» лавкаысь, а сэсся Ульянаса мöд вузасянінысь. Тайö кадö зять удитас блокируйтны картасö, мед водзö эз вермыны шепавны сьöмсö. Карточкаыс зятьлöн вöлöма куртка зептас, коді куйлöма машиналöн бöръя пукаланінас. 
Со сэсся и мыччы отсöга ки пöгибö воöмалы. А кымын татшöм мортыс сулалö туй бокын. Но найöс босьттöдз рулитысьыдлы ковмас чорыда мöвпыштлыны, медым ачыд дьöбö эн коль. А Ульянаыд абу ыджыд сикт, ставныс öта-мöдсö тöдöны, да кузь киа нылыд пыр и лоö тöдса. Да и вузасьысьясыдлöн паметьыс ньöбасьысьяс вылад зэв жö бур. 
Владимир Шомысов. 
Пожöг.

Комментарии:

Добавить комментарий

Свежий выпуск: за 14 ноября