Ас кадö петны чигаркалöн тшынысь 

Куритчöм — кадысь водз кувсьöмлöн да уджавны вермöмлун воштöмлöн медшöр помка. Мирын сыысь быд 6-8 секундаöн кулö öти морт, а вонас тайö матö 5 миллион. 
Россияын, мукöд странаын серти, куритчöны медъёна: айловъясысь 60, нывбабаясысь 30 гöгöр процентыс. Челядь босьтчöны 10-11 арöссянь и школа помалiгöн тшынсö кыскалöны зонъяслöн матö 50, нывъяслöн 40 процентыс. Такöд йитöдын миян странаын быд во кувсьö 300 сюрсысь унджык морт висьöмъясысь, кодъяс йитчöмаöсь куритчöмкöд. 
Куритчысь мортлöн тыясöн висьмыны позянлуныс квайт пöв унджык, тыяслöн ракöн — дас пöв. Шпуткысь морт олöмсö чинтö шöркодя 10-15 во вылö. 
Табак тшынын эмöсь лёк сорасъяс, кодъяс артмöдöны лёк пыкöсъяс. Никотин — табаклöн медшöр юкöнъясысь öти, кодi мортöс сюйö куритчöмлöн налькйö да бöрсö оз лэдз петны. 
Куритчöм лоö сьöлöм-сöн, лолалан, кынöм-сюв юкöнъяс, сюрса лы да мукöд висьöмъяслöн медшöр помкаöн. Сiйö тшыкöдö и вир сöнъяс. Табаккöд ёртасьысь йöзлöн кокас вир сöнъяс висьмöны, куритчытöмъяслöн серти, матö дас во водз. Тшынöдчöм тöдчö и айловъяслöн дзоньвидзалун вылö: никотин чинтö айлов вын. 
А мый тi верманныд вöчны, медым видзны дзоньвидзалуннытö да нюжöдны олöм — тайö шыбитны куритчöм. Онö кö тшынöдчöй, то эн нин и босьтчöй, ылiтi кытшлалöй куритчанiнъяс. Тшын дукалöм сiдзжö вайöдö сьöлöм-сöн, лолалан да пыкöса висьöмъясöдз. 
Гöгöрвоана, куритчöм шыбитны абу кокни. Та могысь колöны тöдчана помка да медицина отсöг. Бöръясö талун вичмöдöны öткöн и котыръясöн, содтöд бурдöдчанторъяс индöмöн. 
Мöвпыштiнныд кö збыльысь шыбитны тшынöдчöм, чорыда шуöй аслыныд «Ме шыбита куритчöм», и мед тайö лоö тiянлы козин. Бумага вылö гижöмöн лыддьöдлöй, мый эськö тi кöсйинныд водзöссö, гижöдсö кутöй син уланыд. Вермас лоны, мый кадысь-кадö кутас кыскыны сигарет дорö. Медым вунöдны сiйöс, асьнытö ылöдлöй сьöлöм серти уджöн, спортö сетчöмöн да дзоньвидзалун ёнмöдöмöн, аслыныд козин ньöбалöмöн. Индöй кад, кор дзикöдз эновтчанныд тшынöдчöмысь. Сэк кежлö сайöдöй син водзсьыныд пепельничаяс, зажигалкаяс да с.в. Табак тшынысь тöлöдöй оланiн, машина пытшкöс. Быд лун этшаникаöн ки-кок песöмöн вир-яйысь öдйöджык петасны никотинлöн колясъясыс. Ёнмöдчöм могысь нуръясьöй С, В1, В12, Е, РР витаминъясöн озыр вöлöгаöн, градвыв пуктасъясöн, фруктыöн, рокъясöн, чериöн да йöла сёянöн, юöй унджык ва, сокъяс. Эновтчылöй крепыд чайысь да кофеысь, спирта юанторъясысь, а сiдзжö сола, переча, ёсь вöлöгаысь. Колö кö тiянлы матыссаяссянь отсöг, висьталöй та йылысь, медым отсалiсны куритчöм шыбитiгöн сьöкыд здукъясö. Да и асьнытö ошкöй, мый тi бур туй вылынöсь, мый сигаретысь колö быть лэдзчысьны, сiйö бурö оз вайöд. Эскöй асланыд вынъясö, и тiян ставыс артмас! 

Анна ШЕБЫРЕВА, 
психиатр-нарколог.