Районса школаяс пыр водзö вежöны ассьыныс чужöмбан. «Модернизация школьных систем образования» федерацияса программа серти кольöм воын вужвыйöн дзоньталiсны Улыс Вочса школа. Тайö жö программа сертиыс февраль шöрсянь босьтчисны дзоньтавны Ручын. Кыдз и медводдзаас, танi зiльö «ПОЛИКОМ» котыр. Дзоньталасны джодж, стенъяс, йирк. Выльмöдасны и би провод да öшиньяс. Вежасны кильчö.

Программаö пырö и велöдчысьяслысь пызанулöс выльмöдöм, физика, химия, биология, технология да ОБЖ классъясын öнiя корöмъяс серти оборудование ньöбöм. Велöдчысьяслöн нуръясянiнын сiдзжö лоас выль пусян-пöжасян оборудование. Локтан выль велöдчан воын нин челядь пырасны мичаммöм школаö, классъясö.

Пасъям, уджъяс вöчигкосттi 5-11–öд класса нывкаяс да зонкаяс велöдчöны орчча сиктын, Дереваннöйса школаын. Асыв и рыт велöдысьясöс да челядьöс новлöдлö автобус. Медым ставнысö ас кадö нунывайны, отсöг вылö ветлывлö и Дереваннöйса школалöн автобус. Урокъяс нуöдöны асланыс велöдысьяс. Нуръясьöны ставныс сэнi жö. Ичöт класса челядь велöдчöны Ручса школаö пырысь садйын.

Апрельын вужвыйöн босьтчасны дзоньтавны нöшта Кулöмдiнса шöр школа. Уджъяс олöмö пöртасны «Устойчивое развитие сельских территорий» федерацияса программа серти.
Татьяна Чувьюрова.
Снимокъяс öтуввезйысь.