«Керчомъя» сикт овмöдчöминса став олысь нимсянь висьталам пыдди пуктана Вячеслав Иванович Худяевлы ыджыд аттьö бур уджысь, водзмöстчöмысь, Кулöмдін районса олысьяс вöсна тöждысьöмысь. 1990–öд воын Керчомъя сиктсянь Худяевöс бöрйисны Коми АССРса Верховнöй Сöветö депутатöн. Сылöн бöрйысьöм водзвывса программаö пырисны сиктын асфальта туй вöчöм да би визь нюжöдöм. Вячеслав Иванович веськöдліс туй юкöнöн, вöлiс генеральнöй директорöн республикаса архитектура, стрöитчöм да энергетика министерствоö пырысь туй департаментын, а бöрынджык – республикаса туй овмöсöн веськöдлан комитетса председательöн.

Сійö кытшовтіс республика пасьта, командировкаясын колляліс вонас 100-120 лун. Видзöдіс республикаын туйяс да посъяс стрöитöм. Республикаса туй овмöсöн веськöдлан комитетын В.И. Худяевöн кывкутiгöн 8 воöн уджö пыртiсны 1235 километра автомашина туй, 83 пос.Вячеслав Ивановичлöн водзмöстчöмöн, удж бура да кывкутöмöн котыртöмöн 1990-1991–öд воясын босьтчисны вöчны Керчомъяса туй: вайисны из да гравий, подулас кисьтiсны из. Уджалiс «Тиман» кооператив. Туйлысь баласö лöсьöдiс Евгений Фёдорович Катаев, а Вячеслав Иванович пöртіс сійöс олöмö. Керчомъя сикт кузя туй вöчигöн öттшöтш балатöг стрöитiсны кытшола туй, карта вылын серпасалöм чертёжъяс серти. Туй дзоньталöм кузя уджсö вöчисны бура да дженьыд кадöн асшöр уджалысь А.А.Коротаев дорын зiльысьяс Юрий Владимирович Коротаев, Николай Константинович Лебедев. Та дырйи найö шыльöдiсны тайö туй вылас лыдтöм-тшöттöм став гурансö, мыльксö. Мургисны КамАЗ машинаяс, экскаваторъяс, сöвтчан техника, каток. Но СССР-лöн киссьöм бöрын «Тиман» кооператив дугдiс уджавны, и стрöитчöмсö эз эштöдны.
Но 1992–öд воын кутiсны корсьны пöдрадöн уджалысь выль котырöс. Бöрйисны Чебоксарыысь МУМ-1 (механизациялöн мобильнöй управление), коді и эштöдіс туйсö 1994–öд воын.

Керчомъяса бурдöдчанiн сулалö кыр йылын, да Вячеслав Иванович отсаліс, котыртiс удж, будждöмысь кырсö дорисны плитаясöн, дзоньталiсны больничадорса (Катша шорпос) да Лентыкерöсö мунiгöн вуджанін дорö ветлыны шогмытöм посъяс. Сэки сикт сöветöн веськöдлысь Андрей Александрович Тарабукинлöн казьтылöм серти, Вячеслав Иванович шулывліс: «Вöлі кö эськö война кад, ме эськö суткиöн дзоньталі поссö». И сійö збыльысь вöчис тайöс некымын лунöн.

Вячеслав Иванович Худяев, сылöн уджъёртъяс да туй юкöнын уджалысьяс отсöгöн Керчомъя сиктын олысьяслöн лоис позянлун мытшöдтöг ветлыны юрсиктö да Сыктывкарö. Ми бур кывйöн казьтылам ставнысö, кодъяс вöчисны Керчомъяса туй. Зэв ыджыд аттьö тіянлы да улöдз копыр!
Пыдди пуктöмöн – «Керчомъя» овмöдчöминса олысьяс.
Снимокъяс Анатолий Тарабукинлöн.
Снимокъяс выльмöдiс Евгений Нестеров.