«Ленин туйöд», 1970 вося февраль 21-öд лун
Видзöны зонъяс граница

Граница. Заставаын пуö салдатскöй олöм. Служитöны танi зонъяс Арменияысь, Карелияысь, ылi тундраысь, Сибирысь… Танi эмöсь и коми зонъяс. Ме кöсъя висьтавны нёль пограничник йылысь.
Мöдöд во служитö рядöвöй Анатолий Лопырев. Сiйö бура велöдiс сылы дöверитöм техника, Анатолийлöн бульдозерыс пыр стройын. Кольöм во Анатолий государственнöй границалöн участокын бура тыртiс инженерно-техническöй оборудование кузя план. Командование сетiс сылы отпуск.
Анатолий — авъя, шань зон, бур ёрт. Коллективын гöлöсыс сылöн оз и кыв, но та пыдди сёрнитöны зонлöн делöясыс. Командование унаысь нин ошкывлiс Анатолийöс бур боевöй да политическöй подготовкаысь. Анатолийöс радейтöны салдатъяс кыдз бур ёртöс. Сöмын сiйö судзöдö заставаö письмöяс, свежöй газетъяс, журналъяс, кинофильмъяс.
Николай Логинов служитö ылi горнöй пограничнöй заставаын. Ас арлыдаяс пöвстас сiйö первойöн кутiс веськöдлыны пограничнöй нарядъясöн. Николай сьöлöмсяньыс велöдö пограничнöй мастерствоö том воинъясöс. В.И.Ленин чужан лунсянь сё во тыригкежлö Николай Логинов босьтiс аслыс обязательство — лоны боевöй да политическöй подготовка кузя отличникöн. А öнi Николай — Ленинскöй вахта вылын передовик.
Кыдз кывзысьысь да уджач воинлы, командование сылы некымынысь нин сетлiс поощрениеяс. Николай уна уджалö ассьыс идейнöй уровеньсö кыпöдöм вылын.
Рядöвöйяс Николай Кочанов да Виталий Турьев пограничнöй частьö локтiсны 1968 вося ноябрын. Зонъясöс тöдöны кыдз шань да бур воинъясöс. Николайöс первойöн индiсны пограничнöй заставаса старшöйöн. Татшöм дöвериесö том воинъяслы шедöдны абу кокни. Кыдз частьса медбур воинлы, Николай Кочановлы дöверитiсны видзны боевöй Краснöй знамя. Öнi сiйö активнöя участвуйтö В.И.Ленин чужан лунсянь100 во тырöмлы сиöм социалистическöй ордйысьöмын, тöждысьö сы вöсна, медым подразделение лоис отличнöйöн.
Виталий Турьев судзöдö границаса подразделениеясö медся коланторъяссö. Виталий гажöдö ёртъяссö прöст кадö: ок и мичаа вермö сiйö ворсны гудöкöн. Сiйöс пыр позьö аддзыны и границаын, и пограничнöй заставаын художественнöй самодеятельностьса участникъяс пöвстысь. Виталий Турьев — Ленинскöй вахтавывса передöвик, участвуйтö Ленинскöй зачётын.
И.Иванов,
майор.
Киргизскöй ССР, Н-скöй часть.