Талунъя гижöдöс заводита В.В.Тиминлöн «Коми нимъяс йылысь» кывбурсянь, сы вöсна мый вывті стöча гижö: «Ми огö нимъяс сöмын воштöй – ми ньöжйö воштам чужан му».

Ак, кыдзи коми нимъяс дзугам!
Ми быттьö йöз муын нин нач:
Туй мортлы керка –
Лыддям «Югэр»,
Сьöдкыркöтш пыдди – Седкыркач.
Озъёль – Озёлöн лои важöн,
Помоздиноöн – Помöсдiн…
И татшöм вежсьöмыс оз гажöд,
Оз нимкодьтöд ни пель, ни син.

Коськ пöри каньö –
Лои «Кошки»,
Чедьюöн шуöны Чöд ю…
Ми огö нимъяс сöмын воштöй –
Ми ньöжйö воштам чужан му.

Поэтыс тöждысьö коми кыв да коми му вöсна оз прöста. Мыйла нимъяссö дзугöмаöсь? Ми тадзисö став олысьыслы, рочьяслы лэдзам асьным шуавнысö!!! Накöд тшöтш бырöдам ассьыным бурсиан, шуд ваян, ловзьöдан, бурдöдан мам кывнымöс. А миянын олöны сёысь унджык национальносьта йöз, колöкö налы окота лоö аски шуны татара ног либö суйöрсайса моднöй кывъясöн. Юркарса Коммунистическöй уличті тай мунан да он дугдывлі дивуйтчынысö. Унджык вузасяніныс шусьöны мукöд кывъя гöгöрвотöм кывъясöн. Со каям кытшсянь вывлань: француз кывйöн L’Etoile «Л’Этуаль» — звезда, англия кывйöн Discount «Дисконт» – скидка, вычет, разница), Yves Rocher «Ив Роше» — тадзи шулöмаöсь мичмöдчанторъясöн вузасянін подулалысь французöс, француз кывйöн жö Rivegauche «РИВ ГОШ» — шуйга берег, английскöйöн — 585 Gold «Голд» — небыд металл либö англичанинлöн овыс, Bristol «Бристоль» английскöйöн еджыд слöн, Zenden «Зенден» Германияын кар ним, сідз жö Нидерладса ов, O’STIN «Остин» — вежöртö английскöйöн идея, Zara «Зара» арабскöйöн асъя югдöм. А кöні нö коми нима вузасянінъясыс? Ме öд КОМИ ЮРКАРÖД муна! «Аврора» вузасян шöриныслöн весиг вежöртасыс француз кывйысь пö. Туйсö вуджигöн кылі кык том мортлысь сёрнисö. «Ты идёшь сегодня на Пати Сейшен (рытпук)?» Мöдыс шуö: «Как там кислотное движение на кухне». Нинöм эг гöгöрво, рочнас нин сёрнитнысö весиг оз кужны. Но медбöръя тешнас лои аслам урокöй.
Велöдöмлöн сюрöсыс — Чужан му. Кар юкöнъяс. Челядь юалöны: «Давпоныс – тайö задавили собаку али мый? А Кöчпоныс – заяц с собакой?» Дав кывйыс вежöртö рас сяма места, кöні быдмöны джуджыд кыдзьяс, поныс – пом. Кöчпоныс — Кöдж пом, но роч анбурын дж шыпасыс абу, и найö шуöны дж пыддисö ч. Со и котралö нин сэні кöч. Ой, дзикöдз шогöдіс. Öні ті гöгöрвоанныд коми кывбуралысьлысь кывъяссö: «Ми огö нимъяс сöмын воштöй – ми ньöжйö воштам чужан му»? Вай ог кутöй вунöдны, мый Аймутö вузалöмысь, вежöмысь, кыв вуджöмысь, пöръялöмысь мыжтö оз лэдзны некор, мортыслы тайö лыддьысьö медыджыд грекöн. А öд бöръя кадас кывлывла, мый бать-мамыс челядьыслы оз сетны велöдны чужан кывсö. Дугдöй дурнытö. Шунысö весиг сэсся нинöм эг куж.
Жанна СИЗЕВА.