Кольöм шойччан лунö, буретш артмис том йöзлöн лунö, Дереваннöйса посни войтырлы вöлi зэв гажа. Татчöс нывкаяслы да зонкаяслы, а сiдзжö пöль-пöчьяс дорö гожöм кежлö воысьяслы бур козинöн лоис сикт помын, кывтыдын, «Йöзкостса бюджет» бала серти «Öшкамöшка» ворсанiн восьтöм.

Пуксис тайö öшкамöшка рöмъяса, ас дорас чуксалысь да ставнысö гажöдысь мичлуныс вöвлöм школа инö. А медводдза воськовсö да мöвпсö чужтiс, кыдз пасйис Дереваннöйса юралысь Елена Васильевна Булышева, Александр Николаевич Гуляев. Е.В.Булышева корис ставныслы видзны да бура дöзьöритны ворсанiнсö, а казяласны кö жугалöм, висьтавны бать-мамлы либö звöнитны администрацияö, медым öдйöджык бырöдны нелючкисö.

Балаыслöн доныс 444 сюрс шайт, 384 сюрс вичмис стрöитчöм, жилищно-коммунальнöй овмöс министерствосянь, 44 сюрс пуктiс овмöдчöминса администрация, 16 сюрс чукöртiсны бать-мам, сиктса олысьяс.
Мыйыс сöмын абу ворсанiнын: и качай, и исласянiн, и канатöн каянiн, чукыль-мукыльöн котраланiн, баскетболысь ворсöм вылö сетка да мукöд ёнмöдчантор. Бать-мам вöчисны торъя шойччанiн, пуктiсны дзоридзьяс, кодъяс гаж дырйи нимкодьöдiсны нин мичлуннас. Став челядь гораа аттьöалiсны ворсанiн вöчысьясöс. Гöрд лента вундiсны гырысьджык нывкаяс Олеся да Юля, а сы бöрын ставныс гузьнитiсны-котöртiсны ворсны.
Шуда челядь вылö видзöдöмöн аслым окота жö босьтiс кытчöкö пуксьывны, но став ворсан, исласян, качайтчан да мукöд ёнмöдчанiн вылын сьöдöн еджыд вылö гижисны, мый нелямын килограммысь сьöкыдджыкъяслы пуксьыны оз позь. И тайö тшöктöмас колö кутчысьны. Чайта, öнi позьö быд гаж коллявны кывтыдсалы öтлаын, пуктыны ворсöмъяс да весиг пасйыны чужан лунъяс. Мед водзö юргас челядьлöн гажа серам да ворсанiныс лоас пыр уна йöза.
Гижöд да снимокъяс Татьяна Чувьюровалöн.