Андрей Викторович Тимушев бура тöдö аслас чужанiнысь олысьясöс, кодi олö шаня, кодöс вермас «шыбöлитны», кодi сяммö лёктор вылö. Сiйö Керчомъяса участокын уполномоченнöй. Уджалысьяс оз тырмыны, да полицияса капитан лöнь олöм вöсна тöждысьö и уна сикт-грездъяса «Зимстан» да « Улыс Воч» овмöдчöминъясын. 
Помавлiс Сыктывдiн районса Выльгортысь видз-му овмöс техникум, лоис ветеринарöн. Но сiйö кадын киссисянвыйынöсь нин вöлiны совхозъяс. Видз-му овмöс министерство том специалистлы вöзйис веськöдлыны «Керчомскöй» совхозöн, кöнi уджыс дудiс жö нин, да бöрыньтiс. 2005-öд воын пырис пытшкöсса делöяс министерстволöн Сыктывдiнса юкöнö патрульно-постовöй службаö. Сэсся вуджисны Виктория Ивановна гöтырыслöн чужанiнö, Изьва районö, кöнi уджалiс ГИБДД-лöн юкöнын. Но висьмис батьыс, да 2011-öд вося ноябрын бергöдчис районö. Водзвыв шыöдчис пытшкöсса делöяс кузя юкöнö, кöнi вöзйисны участокса уполномоченнöйлысь удж буретш сылöн чужанiнын. Эз бöрыньт. Туйдысьнас вöлi сэки уполномоченнöйяслöн юкöнса начальникöс вежысь А.Ф.Гуляев, кодi велöдiс, кыдзи дасьтыны гижöдъяс, кутшöм кадöн да кытчö ыстыны. Öтлаын кытшлалiс сикт, туйдiс ыджыд сяма уполномоченнöй М.П.Жикин. 
Лöнь олöм вöсна тöждысьысь дорö сиктсаяс локтöны лун кöть вой, но тшöкыдджыка войнас. Ачыс кö абу гортас, висьталöны бать-мамыслы либö гöтырыслы, корöны, мед погона морт волас на дорö. Звöнитöны и телефонö, дежуритан юкöнö. Сiйö видлалiс медся уна шыöдчöм да элясьöм, сылы эскöны. 
Андрей Викторович урчитöм лунъясö ветлö Зимстанö, кöнi овмöдчöминса администрацияын эм уджалан жыр. Кайлö Улыс Вочö. Регыд на пыралiс Габовö, кытчö волöны бокиысь йöз, сёрнитiс олысьяскöд. Тайö ичöт грездын олöны шаня, гежöда овлö, мый зык-вен бöрын таксофон пыр звöнитöны дежуритан юкöнö да бытьысь колö разьны гöрöд. 
Пыр кытшовтö видзöдлас улö веськалöмъясöс, ветлö школаясö, видзöдö, мед колана ногöн видзисны öружие. Уджалö и туясьысьяслöн да оперативникъяслöн котыркöд. Андрей Викторович унаысь нин петкöдчылiс «Медся бур уполномоченнöй» конкурсын. 
Гижöд да снимок Марина Дадашовалöн.