Ноябр медводдза лунö пансис армияö нуан кад. Таво миян районысь служитны босьтасны 40 зонмöс. Ноябр 1-öд да 5-öд лунъясö уджалiс зонъясöс донъялан комиссия. Быд во велöдан управлениеысь том йöзкöд уджалан юкöн öтув ас кöсйöмöн отсасьысьяслöн шöринкöд нуöдö «Армияын служитöм — зэв коланатор» удж. 
Районса военнöй комиссар О.В.Ватанский висьталiс войскаяс йылысь, кöнi зонъяс кутасны служитны, кыдзи колö асьтö кутны воинскöй часьтын. Афганистан войнаса ветеран В.В.Литвинов висьталiс зонъяслы, мый быд айловлы быть колö ветлыны армияö. Кулöмдiнса культура керкаысь Андрей Третьяков козьналiс мича сьыланкыв. Ветеранъяслöн районнöй сöвет чöсмöдлiс пöжасъясöн. 
Донъялан комиссия дырйи зонъяслы сетiсны «Теле2» сим-картаяс, мед найö вермисны звöнитчыны матыссаяслы. Сiдзжö сетiсны и повесткаяс, мед тöдiсны, кор колö мунны армияö. Кыдзи висьталiс Олег Владимирович, призывникъяс сувтласны Княжпогостö кык лун кежлö. Сэнi найöс выльысь видлаласны бурдöдысьяс. Мöд лунас сетасны салдатлысь паськöм. Ассьыныс кöлуйсö зонъяс вермасны мöдöдны почта пыр бöр гортас. Налы сетасны ВТБ банклысь карта, кытчö кутас воны быд тöлысь кык сюрс шайт. Ставныслы вичмас электроннöй карта, кöнi лоö колана юöр, шуам, кытысь воöма зонмыс. Аскöд нинöм оз ков босьтны, туйö сетасны став коланаторсö: бритва, мыссянторъяс да с.в. Мöдöд лунас мунасны служитанiнö. 
Зонъяс веськаласны служитны Североморскö, Ярославль, Брянск, Псков, Белгород обласьтъясö да Москва дорö — кодкö саридзса флотö, кодкö военно-космическöй, кодкö сухопутнöй войскаясö. 
Медводдзаясыс мунiсны ноябр 10-öд лунö. Зонъясöс донъялан комиссия уджалас декабр помöдз. 
Асланыс мöвпъясöн юксисны армияö мунысьяс. 
Игорь Дмитриевич Мингалёв, Югыдъяг: 
— Ме сöмын таво помалi школа. Стöча тöда, мый армияö колö мунны быть. Водзö вылö менам зэв ыджыд кöсйöмъяс: велöдчыны да помалöм бöрын да уджавны полицияын. А военнöй билеттöг сэтчö некыдз он веськав. Мунан лунсö тöда нин, ноябр 16-öд лунö и веськала Архангельскö военно-космическöй войскаö. Окота, эськö, вöлi саридзса флотö. Менам кык воча вок ветлiсны нин армияö да зэв шоныда висьталiсны служитöм йылысь. Шуöны, бытьысь колö ветлыны. Мамöй меным отсалö быд босьтчöмын. Армия йылысь мöвпалiгöн син водзын сувтö, кыдзи кута котравны да лыйсьыны. 
Александр Фёдорович Чудов, Паспом: 
— Матысса кадö нин муна армияö. Колö ветлыны быть. Дерт, тырвыйö ставсö эг на гöгöрво, мый менö виччысьö, но эска, мый воыс коляс зэв öдйö. Армия — тайö олöмлöн школа. Ёртъяс унатор висьтавлiсны армия йылысь. 
Семён Андреевич Глушков, Кулöмдiн: 
— Меным 18 арöс. Школа бöрын велöдчыштi 20-öд номера техникумын, во бöрын шуи аслым, мый медводз ветла армияö. Сэнi эм позянлун восьтны асьтö, велöдчыны водзö, воссясны уна туйяс. Мöвпала кольччыны контракт серти. Ёна кöсъя саридзса флотö, эска, босьтасны сэтчö. Ёртъяс унаöн нин ветлiсны армияö да ме, дерт, юаси налысь. Быдöн висьталö ас нога. 
Казьтыланаöн коляс, кыдзи О.В.Ватанский да В.В.Литвинов висьталiсны кыпыд кывъяс, туйдöдiсны водзö олöм вылö, юим чай. Эска, ставыс лоас бур. 
Галина Клюжева. 
Наталья ЛЕВЧЕНКОЛÖН снимок вылын: донъялан комиссия.