Бöрйис ачыс

Анастасия Николаевна Курочкинаöс матыссаясыс öлöдлiсны, мый пытшкöсса делöяс министерстволöн юкöнын уджыс зэв кывкутана, сьöкыд, лун и вой колö лоны дасьöн петны туйö, туявны мыж. Нывлы тайö озджык лöсяв. Но эз кывзысь. Москваса финанс-юридическöй университетлöн Кировса филиалын юристö велöдчöм бöрын Кировас жö муртса уджыштiс суд приставъяслöн юкöнын, а сэсся бергöдчис республикаö, пырис пытшкöсса делöяс министерстволöн Ухтаса юкöнын дознание юкöнö. Сизим во зiлис старшöй дознавательöн. Мойвиис, корисны ас районö, да тавося майын танi нин петiс удж вылö.

– Бур, мый службаöй пансис уна йöза да предприятие-организацияса ыджыд карын, медводдза лунсяньыс велöдчи венны сьöкыдлунъяс. Тайö бурöн тöдчис, отсалiс öдйö пырöдчыны уджö. Карын кö матö быдлаын видеокамера, кокньöдö туйясьöм. Ас районын сиктъяс ылынöсь öта-мöдсьыныс, видеокамераыд лыда, но коми йöзыдкöд сибыдджыкöсь, прöстджыкöсь, кокниаджык воссьöны юасигад, йöзкöд сёрнитiгöн и тöдмалан, – öткодялiс карын да районын уджсö Анастасия Николаевна.

Туялö мыж вöчöм. Воас кö дежуритан юкöнö кутшöмкö лоöмтор йылысь юöр, туясьысьяслöн да оперуполномоченнöйяслöн котыркöд пыр жö петö туйö. Öти сиктын кушöдз сотчис керка. Сэтчö войшöр кадын мунiгöн потiс машина кöлесаыс, воча локтiс да водзö нуис участокса уполномоченнöй. Шы ни тöв, некод абу, ставныс нин узьöны. Видзöдiсны-донъялiсны, босьтiсны туясьны аддзöмсö, эз сюрны кокниа öзйысь торъяс. Сёрнитiсны сиктса юралыськöд, кусöдчысьяскöд, сöмын асывнас ветлöдлiсны керкаысь керкаö да сёрнитiсны йöзкöд. Ёна пö отсасьöны участокса уполномоченнöйяс, бура тöдöны ассьыныс сикт-посёлокъяс да йöзсö, на дорö и шыöдчöны колiгöн.

– Чолöмала уджъёртъясöс удж кузя праздникöн. Сиа ён дзоньвидзалун, зумыд да кыпыд ловшы и уджын, и гортын, мед гöгöрвоисны да пыр виччысисны матыссаясныд. А йöзлы овны бурöн, шаньöн, пыдди пуктыны закон, – кывкöртiс полицияса капитан Анастасия Николаевна.
Марина Дадашова.
Снимок Анастасия Курочкиналöн.