Выльысь рази видзöдлыны важöн кодь нин тубрасö гартыштöм бумаг чукöр, ог нин помнит мый сэтчö кольöдсьöма да. Син улö усисны ручкаöн да карандашöн лист помъясас мыйкö гижалöмъяс. Менам эм сэтшöмторйыс, мый коланаторъяс коркö дум вылö уськöдöм могысь пасйыштала ки улö веськалöм бумага торъясö либö газет пельöсъясö. Татчö гижсьöма: «Ноябр 3 лунö, праздник водзвылын вöлi субöтник, типографиялы отсасим пелькöдчыны».

Водзтi типографиялысь кöть редакциялысь удж котыртысьнас вöлi редактор. Öти коллективын олiм öтувъялунöн. Полиграфистъяслöн удж вöсна кывкутiс бригадир, кодöн меддыр вöлi Клавдия Александровна Чисталёва. А сэсся 1968–öд вося гожöмсянь типография лоис асшöр предприятиеöн, медводдза заведующöйöн Евстолий Александрович Попов. Кадысь кадö веськöдлысьяс вежласисны, 10 воöн районса полиграфиялысь вöжжисö босьтлiс 6 морт. 1978–öд воын локтiс Москваса полиграфическöй институт помалысь том ныв Елена Александровна Попова да директоралiс типографиясö тупкытöдз 20 сайö во.

Но йöзлöн öтувъялуныс колис пыр кежлö. Уджаным öд вöлi öткодь могъясным, медым лыддьысьысьяслы вöчны, кыдз шулiм, кампет кодь чöскыд газет: редакциясаяс – асланыс гижöдъясöн, типографиясаяс – бур качествоöн мича газет лэдзöмöн. Öтув шойччим праздникъяс пасйöмöн, ёртасим семьяясöн, петавлiм вöр-ваö. Ковмывлiс кö, öтув жö отсасьлiм бергöдны кутшöмкö удж. Ставсö лыддьöдлыны ог вермы, казьтышта некымынöс, мый дум вылö усис. Типографиялы бумаг вайлiсны ыджыд да сьöкыд тубрасъясöн. Ректысьöм бöрын складыс тырлiс да вештавнысö быть ковмывлiс чукöртчывны. Мужичöй отсасьысьясöс чукöстлiсны и бумага вундалан машина вылö гырысь тюк лэптыны да с.в. А редакцияса нывбабаяс öтувтчылiм типографиясаяскöд уджаланiннысö пелькöдiгöн. Некод эз вöв идöртöм, но газет лэдзанiнын сьöд краскаöн уджалiгöн чунь туйясыд тай кольлiсны öтилаын и мöдлаын. Отсасьöмысь миян некыт эз зырт ни эз чин. Зато субöтник луныс кольлiс кыпыд шмоньöн да дыр казьтывланаöн.

Бумаг чукöрö кольöм нöшта öти пас, кодöс гижсьывлöма 1984–öд воын, дум вылö уськöдiс типографияса уджалысьяс йылысь нимкодьлун: бур уджысь коллективсö пасйисны республикаса почёт книгаö. А та войдöр, 1982–öд воын типография вобыд кутiс республика пасьта ветлысь Гöрд Знамя. «Коммунистическöй уджвывса ударник» паса гöрд вымпел, кодi ветлiс типографиялöн цехсянь цехö, талун видзам редакцияын лöсьöдöм районнöй газетлöн история музейын.

Мыйкö со бара гижсьöма карандашöн, кадысла кытсюрö шыпасъясыс вушйыштöмаöсь нин. Кытшö босьтöма лыдпас да гижöд: «Перестройка. Воим корысьöдз. Нянь вылö удждi!!!»

Помнита тайö кадсö, öти пöръя зырöдлiсны учредителявны, районнöй газет вылын ыджыдöн пуксьыны да веськöдлыны петавлiсны витöн: «Ленин туйöд» газет редакциялöн коллектив, районса Сöвет, КПСС райком, Сыктывкарысь газет-журналлöн издательство, да весиг «Эжватас» общественно-политическöй организация. А сьöмнас некодлы отсавны: кöшельныс куш. Тöлысьясöн газет вöчысьяслы эз сетавны удждон. Со и ковмис удждысьны ёртъяслысь да тöдсаяслысь, медым семья эз виньгырт.

Висьтавтöг ог вермы кольны и тайö гижöдсö. «Эн вунöд аттьöавны Виталий Васильевичöс небöгысь». Вель дыр мöвпалi-дум вылö уськöдi… Сэсся мöвпъясöн кослi тайö лунас. Редакторöс вежысь Виталий Васильевич Уляшевöс коралöмаöсь уджавны КГБ-лöн Кулöмдiнса юкöнö да вуджöм водзвылас гортса библиотекасьыс редакциялы сетiс зэв уна небöг. Патераыс редакциясянь матын, вайнысö ветлiм некымынöн подöн. Чайöн на юктöдiсны. Сэк меным мыччис «Цыган» небöг. Тэныд пö, öтлаын дыр уджалысьлы казьтывлöм вылö.

Аслам шкап тыр небöг, но татшöм козин эг бöрыньт. И öнi на сiйö мем дона. КГБ-са ыджыд чинöдз воис, но нырсö эз лэпты, колим бур ёртъясöн. Жаль, мый водз мунiс тайö олöмсьыс. Татшöм казьтывлöмъяс чужтiсны эновтöм бумагъясысь аддзöм пасйöдъяс. Листалышта на водзö.

Чолöмала гижысьясöс, газет вöчысьясöс, редакцияса да типографияса ветеранъясöс «Парма горлöн» чужан лунöн! Сиа став бурсö.

Нина Буткина, Россияса журналистъяс котырö пырысь, журналист ветеран.

Снимок «Парма гор» редакциялöн чукöртöмысь.