Быд во, январ 27-öд лунö, Воинъяслöн слава лунö, кор Лениградöс мездiсны кытшысь, Югыдъягса олöмаяслöн котыр да овмöдчöминса администрацияысь волiсны Нина Ивановна Решетова дорö.
Вит арöсын Нина Ивановна колис бать-мамтöг, тшыгъялöмысла семьяыс кулiс вöрöгöн кытшалöм Ленинградын. Мукöд челядькöд тшöтш нывкаöс нуисны Новосибирск обласьтö. Быдмис детдомын, война бöрын Ленинградö эз мун, да и вöлi некод дорö. Олöмас венiс уна сьöкыдлун. Ань веськалiс миян республикаö. Дыр кад чöж олiс да уджалiс Кулöмдiн районса Смолянкаын. Танi быдмисны Андрей пиыс да Алла нылыс. Нина Ивановналöн бöръя воясыс лоисны вывтi сьöкыдöсь. Сiйö эз кут аддзыны да эз вермы ветлöдлыны. Нылыс тöждысис мамыс вöсна, кодi нимкодясис внукъясöн да правнукъясöн.
Кыпыд сьöлöмöн ань вочаавлiс олöмаяслöн посёлокса котырö пырысьясöс, социальнöй уджалысьöс, овмöдчöминса администрацияысь кывкутысь йöзöс да посёлокса олысьясöс. 2019-öд вося январ 27-öд лунö Нина Ивановнаöс ыдждöдлiсны олöмаяслöн районса котырöн веськöдлысь Г.А.Кравченко, республикаса юралысьлöн общественнöй примитанiнысь районса службаöн веськöдлысь А.А.Кузнецова, посёлокса юралысьöс вежысь Т.А.Варварук, Югыдъягса олöмаяслöн котырöн веськöдлысь В.И.Юшкова да сетiсны Ленинградöс кытшысь мездöмсянь 75-öд вося тшупöда паслы сиöм медаль. Нина Ивановна видлалiс медальсö, небыда да лöня аттьöалiс пыдди пуктöмысь да козинъясысь. 2020-öд вося январ 1-öд лунö 83 арöсöн Нина Ивановна Решетова колис таладор югыдсö.
Тшыгъялöм, кынмалöм, бомбитöм, матыссаяслöн кулöм — ставыс тайö кольö бöрö. Этшанöсь нин найö, кодъяс тöдлiсны татшöмторсö. Мед некод эз вунöд блокада кадся Ленинград да сэнi олысьяс йылысь, кодъяс колисны ловйöн, колö висьтавны, петкöдлыны киноясын, телевизор пыр мунысь петасъясын.
Январ 31-öд лунö Югыдъягса культура керкаын ворсöмöн петкöдлiсны кытшалöм Ленинградын öти семьялысь олöмсö. Петкöдчöмын водзмöстчисны школаса велöдысь С.В.Мальцева, олöмаяслöн посёлокса котырöн веськöдлысь В.И.Юшкова, школаса велöдчысьяс Каролина Шолдя, Виктор Яремчук, Егор Игнатов, Алина Галич. Ворсысьяс вöлiны война кадся паськöмаöсь, юргис Шестаковичлöн шылад, видзöдысьяс сьöлöм тiпкöмöн кывзiсны бомбаяслысь жугласьöмлöн да метрономлысь шыяс, сынöдсянь тревога йылысь висьталöм. Петкöдчöм бöрын видзöдысьяс дорö шыöдчис культура керкаöн веськöдлысь Н.А.Журавская да висьталiс, мый оз ков вунöдны Айму дорйысьясöс да налöн подвиг йылысь, кутны вежöрын и Ленинградöс кытшысь мездöм. А сэсся видзöдысьяслы сетiсны «няньлысь 125 грамма пай», кодi 1942-1943 воясö уналысь видзис олöмсö. Чайта, мый петкöдчöмыс вöрзьöдiс сьöлöмсö быдöнлысь: верстьöлысь и томъяслысь. Квайтöд класса велöдчысь Г.Дубицкий шуис: «Видзöдiгöн ме сэтшöма майшаси, мый доршасьлiс синваöй». Сiдзкö, миян челядь ставсö гöгöрвоисны бура, вермöны кывны сьöлöмöн.
Аттьöалам бура петкöдчöмысь культура керкаысь ворсан котырöн веськöдлысь А.И.Ковальчукöс, Л.В.Денисоваöс да мукöд уджалысьöс.
Валентина Юшкова,
олöмаяслöн Югыдъягса котырöн юрнуöдысь.
Снимокъяс Анастасия Брантовалöн чукöртöмысь да Ангелина Ковальчуклöн.