Федерация да республика тшупöдын уджалöны унасикас программаяс, сетöны грантъяс, мед мичмöдны сикт-посёлокъяслысь чужöмбан, мед миянлы овсис кыпыдджыка да гажаджыка. Сöмын колö водзмöстчыны кывкутысь йöзлы да и олысьяслы. Тадзи уна во нин вöчö «Кулöмдiн» овмöдчöминса администрация, дасьтö балаяс да пырöдчö программаясö. Бурланьö вежсьöмъяссö аддзöны юрсиктсаяс да Кулöмдiнö волысьяс. Мый урчитiс вöчны таво, январ 30-öд лунö республикаса юралысьлöн общественнöй примитанiнысь районса службаын йöзлöн юалöмъяс вылö вочавидзис «Кулöмдiн» овмöдчöминса администрацияöн веськöдлысь Виктор Петрович Игнатов.

-Пырöдчим программаясö, вичмисны грантъяс да субсидияяс, кутам пöртны олöмö йöзöн вöзйöмторъяс да мöвпыштöмторъяс. Кольöм воын республикаса юралысь А.С.Гапликов районлöн тшупöда паса лунö сетiс 20 миллион вылö грант. 15-сö веськöдам бурмöдны туйяс. Из сора лыаöн лöсьöдам выль уличаяс Аэропортын. Тадзи жö вöчам катыдпомын вомöна туйсянь Мелиораторъяслысь, Средньöй, Севернöйлысь кык визь, Южнöй уличаяс. Вит миллион вылас урчитiм югзьöдны госстандартъяс серти Стрöительяс, Сöветскöй, Гагарин да Ленин уличаяс. Öнiя лампаяссö вежам диодаяс вылö.
«Гöгöртас бурмöдöм» программа серти районса культура керка водзö вольсалам асфальт, югзьöдам: öшöдам кöкъямыс лампа. Та вылö республикасянь вичмас нёль миллион куимсё сюрс шайт, овмöдчöминса администрация пуктас витсё сюрс шайт.
«Йöзкостса бюджет» бала серти лöсьöдам Ручейнöй улича вылын 0,5 километр туй, Весенньöй улича вылын вöчам öзйылöмъясысь ва видзанiн.
Видз-му овмöс министерстволöн эмöсь программаяс, кытчö балаясö пырöдчöны водзмöстчысь йöз да налы мöвпыштöмторъяс олöмö пöртны вичмö грант. Содтö и овмöдчöминса администрация. Паспомысь томъяслöн «Паспомчане» котырöн юрнуöдысь Ирина Дмитриевна Зезегова дасьтiс ывла вылын ёнмöдчанiн вöчöм кузя бала. Вичмис 302 сюрс шайт грант. Уджаласны асьныс, ми отсалам. Тайö жö туйвизьын шедöдiм грант лöсьöдны юрсиктын Великöй Отечественнöй война вылын усьöмъяслы казьтылан пас сайын шойччанiн. Кералам пуяс да кустъяс, кык тшу-пöдын вöчам лабичьяс, Сöветскöй улича вывсянь Шöр улича вылö лоас пуысь пос. Уджаласны ас окотаöн отсасьысьяс, вермасны пырöдчыны и йöз. Став уджсö колö эштöдны октябр 30-öд лунöдз. Министестволöн программа пыр кöсйöны пöртны олöмö мöвпыштöмтор и Носимса том войтыр, но локтан воын нин. Кöсъям видлыны пырöдчыны тайö жö программаас, мед югзьöдны Пятигорскса уличаяс.

—Аэропортын уна челядя том семья. Позьö сэнi лöсьöдны челядьлы ворсанiн, томъяслы ёнмöдчанiн?

-Колö водзмöстчыны йöзлы. Вермасны гижны бала да пырöдчыны видз-му овмöс министерстволöн программаö. Шыöдчасны кö миян дорö, отсалам.

-Юрсиктса катыдпомын шойна вылын сувтöдiсны Великöй Отечественнöй вылысь воысьяслы да чужанiнын нин кулöмъяслы казьтылан пас. Сэтчö пыр кежавлöны локтысьяс. Бур эськö вöлi потшны кö гöгöрыс да вöчны лабичьяс.

-Тiян шыöдчöмöн шойна гöгöрыс кöсйим лöсьöдны «Йöзкостса бюджет» бала серти, но таво вылö эз артмы. Ог сувтöй, конкурсас пырöдчам нöшта на.

—Юрсиктын овны шогмытöм, киссьöм-пöлыньтчöм уна керка, кöнi некод оз ов, да найö мисьтöммöдöны юрсиктлысь чужöмбан. Колö уджавны кöзяинъясыскöд.

-Сiйö йöзлöн эмбур да, закон серти ми нинöм вöчны ог вермöй. Катыдын кык лёк керка, гöгöрыс тырöма азьгумöн. Тöдмалiм, кöзяинъяссö пуксьöдiсны дыр кежлö.

—Шöр школаса велöдчысьяс физкультура урок вылö быд лун котралöны «Олимпик» ёнмöдчанiнö. Аддзан, кыдз найö мунöны ас кежысь, туй вылын ворсöмöн да абу ылын неминучаöдз. Колö вöчны моски.

-Тайö мытшöдсö тöдам. Ми ставсö артавлiм, дасьтылiм бала да пырöдчылiм öти программаö, но сьöм абутöм вöсна программаыс эз и уджав. Овмöдчöминса администрациялöн кö лишалас сьöм да лоас позянлун, то босьтчам уджö.

—Водзö вылö кытi кöсъянныд лöсьöдны-бурмöдны программаяс серти?

2021-öд во вылö видз-му овмöс министерстволöн программа серти, кöнi водзмöстчöны йöз асьныс, мöвпалам вöчны челядьлы нёль ворсанiн. Кыкыс лоас катыдын, öтиыс Пожегодскöй, мöдыс Западнöй уличаяс вылын. Лöсьöдам и кывтыдын, öтиыс лоас Дорожнöй уличкостын, мöдыс Лодыгинлöн улича вылын. «Гöгöртас бурмöдöм» программа серти йöз вöзйисны вöвлöм öтувъя пывсян местаö вöчны машинаяслы сулаланiн, потшны гöгöрыс. Корисны вöчны автобус виччысянiн, кöнi лöсьöдны и асмогасянiн. Кутам сёрнитны асшöр уджалысьяскöд, кодi кöсйысяс кутны вöчöмсö. Вöзйисны и водзö бурмöдны-лöсьöдны культура керкасянь сбербанклöн керкаöдз костсö. Тайö программаыс уджалö 2024-öд воöдз да вермам вöчны уналатi да унатор на.
Марина Дадашова.
Гижысьлöн снимок вылын: В.П.Игнатов.