Небыд нюмбана, кыпыд лола

Кулöмдiнысь Домна Петровна Липиналöн кольöм воыс вöлi тöдчана — регыд на, декабр 26-öд лунö сiйö кыпыда пасйис 85 арöс. Олöма ань вылö видзöдан да та мындасö сылы весиг он на и сет: пыр на тэрыб вöраса, кыпыд лола, олöмсö радейтысь, матыссаясыслы мыйöнкö да отсавны зiльысь, пыр небыд нюмбана, шань сьöлöма. Гашкö, тайö шаньлуныс да бурланьö пыр сюртчöмыс и отсалöны мортыдлы кутчысьны олöмас. Да сы вылö видзöдтöг, мый ковмылö вуджны и сьöкыдсö.
Домна Петровна ачыс Кужйысь, чужис ыджыд семьяын: бать-мамыслöн вöлiны кöкъямысöн, кыкыс кувсисны ичöтöн на. Челядьсö быдтыны, кок йылö сувтöдны медсясö ковмис мамыслы öтнаслы. Великöй Отечественнöй война пансис, кор аньлы вöлi сöмын на арöсöнджынйöн, медiчöт Галя чойыслы матö во джын. Батьсö босьтiсны фронт вылö, 1943-öд воын усис нин.
— Мам уджалiс-мырсис лун и вой, мед вердны миянöс кыдзкö, — синвасорöн казьтывлiс важсö Домна Петровна. — Вой кежлас волiс сöмын, кор узям нин вöлi. Гортгöгöрса удж бергöдiс да видзис миянöс медыджыд чойным. Бергöдчим сьöкыда, тöдлiм тшыгъялöм. Школаöдз пукалi гортын, садйö эг ветлы. Сизим класс велöдчи Кужйын, гожöмъяснас, быдмыштöм мысти, уджалi колхозын видз вылын, мед содтöд чукöртны трудодень. Дасöд классö помалi Кулöмдiнын.
Нывка ичöтсяньыс мöвпалiс лоны велöдысьöн. Но Сыктывкарса педучилищеö пыригöн, сiйö воас, босьтiсны сöмын воспитательö велöдчысьясöс. И быть ковмис пырны. Но эз жалит, мый лоис дзолюкъясöс видзысь-велöдысьöн. Велöдчöмсö помалöм бöрас медводз нёль во уджыштiс Кужса садйын, а сэсся Кулöмдiнса мöдöд номераын нёль во жö да витöд номераын — пенсия вылö петтöдзыс. Бöръяас вöлi на тшöтш и веськöдлысьöн. 39 во садйын уджалiгöн эз öти кöлена челядьыс сы пыр мун. Öнiöдз на казьтывлöны сiйöс бур кывйöн помтöм шаньлунсьыс, челядьöс сьöлöмсяньыс радейтöмсьыс, олöманыс медводдза воськовъяс вöчны туйдöмысь. Уна вося бур уджсö сылысь пасйисны «РСФСР-ысь народнöй просвещениеса отличник» нимöн, «Уджвывса ветеран» медальöн да почёт грамотаясöн.Домна Петровналöн медся ыджыд тöждыс вичмис, дерт, аслас семьяыслы. Кулöмдiнö вуджöм бöрын сьöлöмсö йитiс радейтана мортыскöд, Борис Дмитриевичкöд, кодкöд велöдчис öти классын. Школаö котралiгас нывка и мöвпыштлынысö эз куж, мый коркö тайö зонмыскöд йитас олöмсö. Школа помалöм бöрас нин виччысьтöг ыпнитiс на костын муслуныс. Семйитчисны, овмöдчисны верöсыслöн бать-мамыскöд тшöтш. Вочасöн чужисны челядь, куим ныв-пиян. Велöдiсны найöс, бордсьöдiсны, петкöдiсны асшöр олöмö. Внукъясыс нин нимкодьöдöны. Водзö овны да овны эськö, да пыр на шогалö ань верöсыс водз кувсис да, кызь во нин таво лоас. Матыссаясыс сетöны сьöлöм гажсö.
Со и тшупöда пассö ыдждöдлыны да чолöмавны Домна Петровнаöс волiсны керка тырыс йöз — челядьыс, внукъясыс, рöдвужыс да нывъёртъясыс. Олöмаяслöн Кулöмдiнса котырöн веськöдлысь Валентина Петровна Нестеренко, «Кулöмдiн» овмöдчöминлöн администрацияöн веськöдлысь В.П.Игнатов, ветеранъяслöн районса котырöн веськöдлысь Е.А.Сазанович да сиктса олöмаяс нимсянь висьталiс пöсь чолöмалан кывъяс да вичмöдiс козинъяс. Сьöлöм шонтана кывъяс юргисны и матыссаяссяньыс. Быдöн сиисны, мед дыр на олiс да нимкодьöдiс найöс бурö велöдöмнас да ышöдана сёрнинас.
Галина Нестерова.
Снимок гижысьлöн.
Комментарии: