Тавося Туганöн лоис Помöсдiнысь Максим Игнатов. Вежавидзысь да раминик тайö зонмыслы 24 арöс. Скöрöдумын тренер, велöдö челядьöс котравны лыжиöн да ворсны пызанвывса теннисысь. Уджысь орöдчытöг коймöд во велöдчö Сыктывкарса университетын. Ёна радейтö вöр-ва да уна кад сэнi. Торйöн нин дона сылы Педöр Ёгор. Ыджыд батьыс вöлi вöралысьöн да кыйсян вирыс вуджöма и Максимлы. Гортас лöнь да лöсьыд, зон оз радейт уна йöза кар. Век отсасис нуöдны Помöсдiнын Успенньöса вузасьöм да сiйöс казялiсны томъяслöн «Аскиалун» котырысь Татьяна Карманова да Илона Артеева, корисны сюртчыны на дорö да сэнi некымын во нин. Котыртлöны челядьлы гажъяс, весалöны вöр-ва, петкöдчöны унапöлöс гажъясын да с.в. 
-«Туган» ордыйсьöмын петкöдчи медводдзаысь. Эз вöв сьöкыд, мудзыштi сöмын лямпаöн котралöмысь. Вöрöд мунiгöн колiс кыйны урöс, вöрса порсьöс, ошкöс, йöраöс, вуджны лёк туй, лыйны пöткаöс, öзтыны бипур, дасьтыны сёян да кыскыны став кыйöмторсö гортö. Мунiм талялöм лым вывтi, а колiс эськö лым пиöд. Ме эг тöд, мый ковмас венны. Синъяс водзö ордйысьöмыс сувтiс сэк, кор тöдмалi, мый колö босьтны чер, истöг да сюмöд. Колiс сiдзжö вочавидзны вöралöм йылысь юалöмъяс вылö. Вöчи кывкöртöд, мый важ коми кывъяс колö тöдны бурджыка, — висьталiс Максим. 
Галина КЛЮЖЕВА. 
Снимок Наталья Тимошиналöн.