[ A+ ] /[ A- ]
- Кор эм кад, ветла техникумлöн машинаяс видзанiнö, кытчö карсаяс вайлöны дзоньтавны ассьыныс. Сюся видзöда да отсала верстьöлы, — висьталiс Великопольеысь Алексей Шахов, кодi мöдöд во велöдчö Сыктывкарса политехническöй техникумын автомеханикö.
Кольöм вося декабрын мастер Иван Александрович Иевлевкöд ветлiс Омскö, кöнi тöдöмлунöн да сямöн петкöдчисны аскиа автомеханикъяс, да лоис коймöдöн. Таво февраль 18-22-öд лунъясö петкöдчис республикаын. Вöлiны Сыктывкарса школаясысь, колледжъясысь да техникумъясысь велöдчысьяс, ставыс 198 морт. Урчитöм кадöн колiс разьны-тэчны машиналысь двигатель, передачаяслысь кöрöбка, лöсьöдны жугалöм электрика. 12 морт пöвстысь лоис коймöдöн.
Алексейлöн Николай Михайлович батьыс 30 во механикалiс Пожöгса совхозын, а сэсся кооперативын. Ачыс чукöртлiс-тэчлiс трактор. Пиыс пыр вöлi орччöн. Котралiс и ыджыд бать дорас, кодi туйö петтöдз да локтöм бöрын гöгöрбок видлалiс машинасö, кыткö да зэлöдыштлiс, мыйкö да вежлiс, ачыс жö и дзоньтавлiс.
17 арöса Алексейлы колис велöдчыны во да джын. Сылöн матö став велöданторйысь «5». Лöсьöдчö армияын служитiгкежлö, сэсся уджавны. Чайтсьö, мый татшöм сюсь зонмöс окотапырысь босьтасны уджалан котырö.
Марина Дадашова.
Снимок Алексей Шаховлöн чукöртöмысь.
Комментарии: