Шоныда казьтылö армияö ветлöм Носимысь Василий Кочанов. Сэнi аддзис выль ёртъясöс, босьтiс выль тöдöмлунъяс. 
Армияöдз уджыштiс Сыктывкарса ресторанын, Санкт-Петербургын вузасян шöринын. Армияö босьтiсны 2016-öд вося ноябрын. Веськалiс военно-морскöй флотö. Велöдiсны Северодвинскын. Куим ротаын джын салдатыс вöлi Коми республикаысь. Ёна ёртасис Емваысь К.Леоненкокöд, Микуньысь А.Кызъюровкöд да Кулöмдiнысь К.Башуринкöд. Ёна отсасисны öта-мöдлы, лоисны ёртъясöн. Найöс новлöдлiсны заводö, кöнi вöчисны корабльяс да ваувса пыжъяс. Дерт, вöлi сьöкыд, торйöн нин медводдза тöлысьяссö, но кутчысисны. Велöдчöм бöрын мöдöдiсны корабльяс вылö Черноморскöй, Каспийскöй, Тихоокеанскöй, Балтийскöй да Севернöй флотъясö. Ёртъяслы мойвиис: найö веськалiсны Севастопольö öти корабль вылö. 
Служитiс стöрöжитан «Ладный» корабль вылын мотористöн, быд лун велöдчисны венны сьöкыдлунъяс. Тшöкыда кыпöдлiсны видзчысьтöг. Кодсюрööс нулiсны Сирияö, Василий сэтчö эз веськав. Быд лун мыйкö да вöчисны: дзоньтасисны, краситчисны. Пыр вöлi жар да сьöкыд вöлi узьны. 
— Ме серти, быд зонлы колö ветлыны армияö. Сэнi верстямман, босьтан уна бур, мый отсалö водзö олöмын. Аддзи зэв бур ёртъясöс, кодъяскöд кута йитöдъяс. Ме кö эг ветлы армияö, гашкö, некор эг и веськавлы лунвылö, эг аддзыв ыджыд боевöй корабльяс да сэтшöм кар, кыдзи Севастополь. 
Гижöд да снимок 
Галина Клюжевалöн.