Колис 30 во, кыдзи помасис матö дас во мунысь Афганистанса война. Миян зонъяс, Афганистанын кындзи, вöлiны Кореяын, Вьетнамын, Кубаын, Египетын, пöртiсны воин-интернационалистлысь мог. Чужанiнö бергöдчöм бöрын став сьöкыдсö кутiсны ас пианыс. Эз батьясныс, а найö лоисны войнаса ветеранъясöн. 
Югыдъягысь Афганистанса би улын вöлiны квайтöн, талун ловъяöсь куимöн. На йылысь юöръяс чукöртiсны «Югыд яг» котырö пырысь велöдчысьяс. 
Анатолий Николаевич Матвеев 
Армияö босьтiсны 1980-öд вося ноябрын. Веськалiс пограничникъяслöн войскаö. Служитны велöдiсны Казахстанын, Киргизияын да Таджикистанын. Афганистанын вöлi 1982-öд вося январсянь 1983-öд вося январöдз. Рядöвöй, радиостанцияса старшöй телеграфист. Вичмöдiсны «Отличник пограничных войск» пас. Анатолий Николаевич висьталö: 
— Эз висьтавны, мыйла миянöс вертолётöн «шыбитöны» орчча Афганистанö, сöмын шуисны: «Сьöкыд олöм». Мунiм Кундуз да Талухан каръясöд, кöнi сулалiсны миян салдатъяс. Олiм блиндажъясын да палаткаясын. Кор лыйсьöмöн матыстчылiсны талибъяс да пуштунъяс, пыравлiм му чомйö. Сэтчöс йöз, торйöн нин гöль шурави, миянкöд сёрнитiсны бура. Пыр бур кывъясöн казьтыла командирöс — майор Петренковöс, кодi кулiс 2018-öд воын Одессаын. Афганистанын ми, салдатъяс, «весалiм» бандитъясысь кишлакъяс. Чужанiнö бергöдчи 1983-öд воын. 
Виталий Хрисанфович Козлов 
Афганистанын вöлi 1980-1981-öд воясын. Вöлi дизеля машина вылын старшöй водительöн. Ефрейтор. Пасйисны медальясöн да пасъясöн. Кувлiс 1997-öд воын. 
Николай Васильевич Ильин 
Афганистанын воин-интернационалистлысь мог олöмö пöртiс 1986-1987-öд воясын. Вöлi Памирын Горно-Бадайскöй районса Базай-Тумбатын, кодi войвыв Пакистанса границакöд орччöн. Казьтылö: 
— Ме вöлi пограничникъяслöн Ошса отрядын БМП-са механик-водительöн. Заставаса начальникöн вöлi майор Говоров. Сэтчöс йöзкöд эг сёрнитöй. Сэки сизим во нин мунысь война дырйи найö эз эскыны ни миянлы, ни афганечьяслы. Застава вылын öти жырйын вöлiны миян да Афганистанса президентъяслöн снимокъяс. Сэнi ми аддзысьлiм-сёрнитiм Афганистанса йöзкöд. Застава вылö сёян-юан вайлiсны вертолётъясöн. Вайöм 10 тонна пызьысь джынсö сетлiм сэтчöс олысьяслы. Найö олiсны скöтöн, рöдмöдiсны якъясöс. 
Николай Васильевич цинкысь гортйын ёртсö колльöдiс-вайис бать-мамыслы Ухтаö. Ефрейтор Н.В.Ильинлöн эмöсь нимöдан пасъяс. öнi сiйö «Мондиын» механик. 
Александр Ремович Кудряшов 
Гортас локтöдз мамыс эз и тöдлы, мый пиыс вöлi Афганистанын. Письмöын гижлiс: «Чолöм Германиясянь!» Афганистанын служитiс 1984-1985-öд воясын сынöдса десантлöн войскаын боевöй машина зарадитысьöн. Пасйисны «За боевые заслуги» да мукöд медальясöн. Кöть и вуджис уна сьöкыдлун, сьöлöмыс эз чорзьы, пыр вöлi дась отсавны. Вöр овмöс академияын велöдчöм бöрын уджалiс леспромхозын. 1992-öд воын лоис кувмöныс мыж вöчысьлысь öружие мырддигöн. Югыдъягсаяс оз вунöдны, пыр казьтылöны повтöм мортöс. 
Владимир Александрович Карманов 
1979-öд воын, кор Афганистанö пырисны миян медводдза часьтъяс, медводдзаяс лыдын вöлi и В.И.Карманов. Кувлiс 1993-öд воын. Гöтырыслы да пиыслы гижлöм письмöясысь юкöнъяс: «Чолöм Афганистансянь. …Став полкöн сувтiм границасянь 120 километр ылнаö Афганистанса муяс вылö. Дасьöсь тышъяс кежлö. Некор эг чайтлы, мый аддза татшöм серпас. Йöз ветлiсны пуысь вöчöм кöмöн. Сёй керкаяс, öшинь пыдди розьяс. Пач йылысь и сёрни абу. Эмöсь озыръяс, найö бур паськöмаöсь, олöны бур керкаясын. Ми олам палаткаясын на. Кöкъямысöд лунö миян машинаяслы колö мунны Союзö да вайны сэтысь финн керкаяс, крöватьяс, кöлуй-вольпась да мукöд коланторъяс. Кутам овмöдчыны йöз му вылын. Дыр-ö олам, абу тöдса. Кывзы радио, видзöд телевизор, сэнi юöртасны. Эн шогсьöй ме вöсна, ставыс лоас бур. Видз асьтö да Диманымöс…» 
«Чолöм Афганистансянь. …Тöрыт дасьтiм танкъяс. Рытнас висьталiсны, мед ми танкö пуктам шоныд кöлуй, кос сёян. Вермас лоны, мый пырам Иранö, кодi зыксьö Пакистанкöд. Ми дасьöсь. Иран кö шыöдчас отсöгла, мунам сэтчö. Армияысь арся петысьясöс эз на лэдзны, кöть эськö декабр шöрас налы колö мунны нин, локны выльяслы. 
Гижлi тай тэныд, мый менам танклöн оз лыйлы пушкаыс. Лыйлiсны öти танкö да тшöктiсны миянöс сэтысь перйыны пушкасö. Ключьяс абуöсь, а колö вöчны куим лунöн. öнi пукала танкын да гижа тэныд письмö, а зонъяс мунiсны корсьны ключьяс. Иранö кö нуасны, пушкатöгыд пыр жö лоас лёк. Кык пулемётнас ёна бурджык. 
Вöлöмкö, танi абу кокни, абу Союзын служитöм кодь. Медся ляпкыдiнысь воöм бöрын став полккöд кытшовтiм гöгöрсö, а коймöд лунас петiм асланым танкöн. Кытшлалiм кык вежон… Тöрыт локтiм да сувтiм караулö. öнi час вой, а ме век на ола, гижа тэныд письмö. Аски бара петам туйö да лоö некор. Вöлi зэв сьöкыд, лыйлiсны став танксö, куимыс жугалiс дзикöдз. Миян батальонлы эз ёна сюрав…» 
«Кыкысь нин петавлiм, кытшлалiм и пыр жö мунiм гöраяс визьын медся ляпкыдiнö. Танi март 19-öд лунсянь нин. Кöсйи гижны тэныд да эг эшты. Корсюрö лыйсьöны да войбыд дежуритам, луннас узям. Гортö мунöм йылысь приказ петiс март 26-öд лунö, а миян кык батальон во джын кежлö петiсны рейдö, да абу на тöдса, кор лэдзасны. Июльысь водзджык оз артмы. Эн гажтöмтчöй. Кута локны да сета телеграмма, мед ломтiнныд пывсян. Сетiсны 45 шайт, локны тырмас. Аддзысьлытöдз. Кутла, окала. Володя». 
Николай Анатольевич Павлючков 
Служитiс Киргизияын пограничникъяслöн войскаын. Афганистанö нутöдз велöдiсны Таджикистанса Пянджын. Афганистанын вöлi 1986-1987-öд воясын. 500 салдатöс Афганистанö пыртiсны Имам-Сахиб кар пыр. Вöлi пулемётса наводчикöн. Автоматъясöн да артиллерияöн видзисны душманъясысь кишлакъяс, куталiсны дурмöдчанторъяс да öружие нуысь-вайысьясöс. Н.А.Павлючковлöн эмöсь медальяс да пасъяс. öнi «Шоныд сетан Коми компанияын» ломтысьысь. 
Татьяна Митина. 
Югыдъяг.