Геннадий Тимушев — том да уджач, мывкыда да зiля олысь Донса том зон. Служитiс моряк-десантникöн Саридзвывса военнöй флотын. Армия бöрын уджтöг некор эз пукавлы. Пуджлiс сой стрöйкаяс вылын, кисьтic пöсь тьöс-плака пилитчанiнын. Зэв ёна радейтö пырöдчыны спортö, та вöсна век видзöдчö ёнöн, кыдзи и колö мужичöйлы. Со и мöвпыштiс, мый колö корсьны удж, кöнi эськö век колiс петкöдлыны ассьыд винёвлун. Бöрйис видзчысьтöм лоöмторъяс да йöзöс доръян туйвизь. Кусöдчысьяслöн гарнизонын уджалö матö нёль во. Дыр нырччис, медым веськавны сэтчö. Ставсö венic, да коймöд во нин сiйöс ыстöны карö ордйысьöмъяс вылö кыдзи медбур уджалысьöс. Кыдзи висьталö ачыс Геннадий Андреевич, татшöм уджад колö лоны ён да эбöса мортöн.

 Зонлы мусмис самбо вермасьöм. Миян районын кыкысь шедöдлiс мöдöд местаяс, кольöм воын республикаын лоис коймöдöн. Сылöн тренируйтчöм оз помасьлы — ки-кок ёнмöдöм мунö вöрын да нюрын. Дон сиктыд озыр нюрнад. Майбыр, уна во нин воö тусьыд. И весиг вöр-ваö ветлiгöн Гена петкöдлö уджалан сям. Августын ёртъяскöд Дон тыын шойччигöн казялiсны тшын петöм да тэрыба веськöдчисны сэтчö. Вöр керкаыс сотчис нин, бур, мый вермисны петны вöралысьясыс. Гена тöдö ассьыс уджсö, да керка гöгöр кодйис гуран, медым биыс эз вудж водзö. Сэсся ёртъяскöд пыж вылö сöлöдiсны биö веськавлысьясöс, медым нуны найöс бурдöдчанiнö. Ты вылад бара лоис неминуча. Пыжыд уна йöзнад путкыльтчис. Геннадий эз шöйöвош. Медся сотчöмасö йöткалiс берег дорöдз да звöнитiс кусöдчысьяслöн гарнизонö. Би пыр öти мунысь век на карса больничаын, а мöдыс бурдiс да вотö нин турипув.

 Ветлic Геннадий Андреевич и Изьва районö, кöнi черöн лыйсьöмысь босьтiс коймöд места. Сiйöс ёна шензьöдiс, мый сэнi дзик ставныс сёрнитöны комиöн, весиг челядь. Нöшта сэнi пö ставныс восьса сьöлöмаöсь. ГТО-лы урчитöмторъяс кузя Геналöн эзысь пас. Кусöдчан службасянь волейболысь республика орйдысьöм вылö ветлiгöн Геннадийлöн котыр босьтic нёльöд места. Неважöн на кусöдчан службаын уджалысьяс ветлiсны аслас ордйысьöмъяс вылö, кöнi колic петкöдны сотчан стрöйбаысь мортöс. Геннадий Андреевич и танi эз шöйöвош.

 Донса зон олö Пятигорскын. Ньöбис велосипед, медым воöдчыны чужанiнöдз бать-мам керкаö. Педальяс бергöдлöмöн пö пыр сöвмöда вынъяс.
 Наталья Тимушева.
Снимок Геннадий Тимушевлöн.