1970-öд воын Носимса культура керкаö локтiс уджавны Зоя Александровна Кочанова (öнi Пафикова). И пыр жö сиктсаясöс ышöдiс-öтувтiс да лöсьöдiс сьылан котыр. Медводдзаысь петкöдчим В.И.Ленинлы 100 во чужан лунлы сиöм гажын.

 Чукöрмис 20 сайö морт. Баянöн ворсiс Анатолий Александрович Гилев. Том йöз пуктiсны зэв ыджыд концерт: сьылiсны, йöктiсны, лыддисны кывбуръяс. И тасянь пансис том «артистъяслöн» туйыс-могыс — гажöдны сиктса йöзöс. Гожöмнас ветлывлiм видз вылö, сьылiм турун пуктысьяслы, тöвзьылiм и орчча сиктъясö.

 1993-öд воын асланым котырлы бöрйим «Йöлöга» ним. Вурöдiм мича сарапанъяс. Миянöс корисны шылад да драма театрö Тима Веньлöн тшупöда паслы сиöм ыджыд гаж вылö. Сэнi сьылiм да йöктiм миян районысь воöм котыръяскöд.

 Сiйö кадсянь котырным ёна нин вежсис. Локтiсны выль сьылысьяс. Баянöн гажöдiс Василий Александрович Лодыгин. Ок и мичаа вöлi ворсö.

 Сы бöрын душ-мöд во миянкöд уджалiс нималана гижысь да композитор Василий Григорьевич Лодыгин. Сы мында мича, мыла сьыланкывъяс гижис да велöдiс миянкöд. Районын ми медводдзаöн и сьылiм сылысь став выль сьыланкывсö. Василий Григорьевичкöд ветлiм сылöн чужанiнö, Габовö, олöмаяслöн да вермытöмъяслöн Зимстанса керкаö. И, дерт жö, ветлiм Иван лунö Дереваннöйö да Илля лунö Ручö.
Öнi миян сьылан котырын 10 морт. Кадöн артасьтöг ветлам культура керкаö, дасьтысям гажъяс кежлö. Велöдам выль сьыланкывъяс да йöктöмъяс. Баянöн ворсö Пётр Магометович Гилев, гитараöн Анатолий Николаевич Турьев. Танецъяс миянлы бöрйö да велöдö культура керкаöн веськöдлысь Анна Витальевна Кочанова.

 Меддыр, 60 во нин, сьылö Зоя Александровна Пафикова, ме 50 во. 20 воысь дырджык Гилев гозъя, Пётр Магометович да Мария Ипполитовна, Дина Юрьевна Лодыгина, Зина Александровна Турьева.
Локтiсны выльяс Людмила Васильевна Расова, волöны весиг Паспомысь Валентина Васильевна Генрих, Антонина Амвросиевна Зезегова. Öнi лöсьöдчам ветеранъяслöн районса фестиваль кежлö, кодöс сиасны районлы 95 во да семьялöн волы.

 Ог сöмын сьылöй. Олам сикт вöсна тöждöн, петалам субöтникъяс вылö, пелькöдам муса чужанiннымöс. Пырöдчам библиотекаöн нуöданторъясö, викторинаясö да конкурсъясö. Öтув пасъям чужан лунъяс.
 Наталья Зезегова.
Снимок гижысьлöн чукöртöмысь.