Кебанъёльын
Кебанъёльса народнöй дружинникъяслöн котыр республикаын медбуръяс лыдын. Кольöм вося дас кык тöлысьöн полициялы ас окота серти 14 отсасьысь пырöдчисны общественнöй пöрадок видзöмö, петавлiсны посёлокö да эрдöдiсны административнöй мыжъяс вöчöм. Сiдзжö, найö вöлiны пöнятöйясöн. Пытшкöсса делöяс кузя министерстволöн районса юкöнкöд öтув дежуритiсны 43-ысь. Тайö удж нуöдiгöн ветлöдлiсны уна йöзаинъясö, сёрнитiсны йöзкöд, тöдмöдiсны Россияса Федерациялöн да Коми республикалöн оланпасöн, нуöдiсны öлöдан удж тыр арлыдтöмаяскöд. 2019-öд воын дежуритiгöн эрдöдiсны квайт административнöй мыж вöчöм.
Ас окота серти полициялы отсасьысьяс пелькöдчисны посёлокын, шойна вылын, ю дорын, ветлiсны Ульянаса манастырö видзны пöрадок службаяс дырйи, восьлалiсны «Кувлытöм полкын», гажъяс нуöдiгöн тöждысисны лöнь олöм вöсна Кебанъёльса клубын. Мукöдысь торъялöны ки вылын кöртöдöн да морöс вылын пасöн. Ас окота серти полициялы отсасьысьяс петöны служба вылö би улын югъялысь паса жилетъясöн да удостоверениеясöн. Кодалысьясöс корöны овны лöня, дугдыны юны, тшöктöны мунны йöзаинысь. Сёрнитöны челядькöд асьнысö видзöм да лёк йöзысь видзчысьöм кузя. Петкöдчисны ордйысьöмъясын. Вежоннас кыкысь дон босьттöг налы позьö ветлыны пытшкöсса делöяс кузя юкöнлöн ёнмöдчанiнö. Матысса йöзыс гöгöрвоöны, мый шойччан лунъясö да гажъяс дырйи налöн верöс либö гöтыр петöны посёлокö. Котырын кык чой, тайö Ирина Ивановна Алексеева да Светлана Ивановна Николайчук.
Н.И.Савиналы да Д.Р.Тарабукинлы сетiсны ГТО-лысь торъялан пас. Коми республикаса юстициялöн министерство полициялöн лун дырйи Н.И.Савинаöс да И.В.Шаховöс пöрадок бура видзöмысь пасйис аттьöалан гижöдöн.
«Кебанъёль» овмöдчöминса администрациялöн индöдöн шуöма отсавны сьöмöн. Котырлы торйöдiсны 10 сюрс шайт. Сiйö мунас дружинникъяслы дежуритöмысь вештысьöм вылö.
2019-öд вося октябрын Ухтаын мунiс студентъяслöн регионъяскостса «Форум неравнодушных» чукöртчылöм. Том йöз висьталiсны асланыс удж йылысь, унатор босьтiсны тöд вылö. Коми республикаса юстициялöн министр А.И. Осташов Кебанъёльса ас окота серти полициялы отсасьысьясöс пасйис аттьöалан гижöдöн да козинöн.
Некымын во нин котырнас веськöдлö Дарья Васильевна Аверьянова.

Помöсдiнын
Помöсдiнсаясöс дыр кад майшöдлiс, мый эз вöв участокса уполномоченнöй. Асьныс и кыпалiсны да во сайын лöсьöдiсны полициялы ас окота серти отсасьысьяслысь котыр. Веськöдлö зэв водзмöстчысь Илона Артеева, кодi сiдзжö юрнуöдö «Аскиалун» томъяслöн öтмунöмöн. Илона Александровна висьталiс, мый вöчисны воöн.

• Миян котырын талун кежлö 21 морт, кодкö локтö, кодкö мунö. Найö уджалöны лесничествоын, овмöдчöминса администрацияын, школаын, челядьлöн енби сöвмöдан керкаын, лыжи котраланiнын да мукöдлаын. «ВКонтактеын» миян эм асланым котыр. Сэтчö вермас гижны быд окотитысь. Неважöн шыöдчис öти айлов да юасис, кыдзи лоны дружинникöн. Вöчим став документъяссö и öнi В.Ф.Алтыхов медся нырччысь. Котырысь быдöнöс позьö пасйыны бур кывйöн. Пыр мунöны воча, кывкутöмöн вöчöны став уджсö. Кодкö кö оз вермы петны индöм лунö, вежсям öта-мöдкöд. Котырын водзмöстчö семья. Тайö Галина Сергеевна да Михаил Анатольевич Шомысовъяс да налöн Алексей пиыс.
  Кольöм воын 60-ысь петавлiм сиктö, на пиысь 37-сö полицияса уджалысьяскöд. Эрдöдiм куим административнöй мыж вöчöм. Топыда уджалам школакöд. Видзöдам, мед 22 час бöрын челядь эз ветлöдлыны ас кежысь. Öлöдам, мый налы оз позь лоны ывла вылын сэтшöм сёрöн. Öлöдам, мед эз видлавны курыдтор, эз ышмыны. Казялам кö татшöм ныв-зонмöс, звöнитам бать-мамлы, мед нуасны гортаныс, сёрнитам. Йитчам школаса директоркöд да висьталам татшöм челядь йывсьыс. Öнi гежöда позьö кодöскö аддзыны дас час бöрас, челядь кывзысьöны, сы вöсна, мый тöдöны нин миян йылысь. Сиктын, позьö шуны, лоис тöдчымöн лöнь.
  Водзтi тшöкыда позис аддзыны, кыдзи улич пасьтала туплясис ёг. Öнi серпасыс вежсис бурланьö. Уджалам и том йöзкöд да верстьöкöд, мед эз юны йöзаинъясын. Кор аддзам найöс, öлöдам, мый тадзи вöчны оз позь. Найö кывзысьöны, оз пинясьны. Сиктö петам би улын югъялысь паса жилетъясöн, йöзыс матыстчöны миян дорö да юасьöны, кодъяс ми, кутшöм удж вöчам. Миянöс пыдди пуктöны. Унаöн шыöдчисны шöйтысь понъяс кузя. Ветлiм кöзяинъяс дорö да корим домавны. Тайö туйвизьын уджалам водзö.
  Таво содтöд ньöбим би улын югъялысь паса жилетъяс. Öнi сiйö тырмымöн.
  Пытшкöсса делöяслöн районса юкöн полициялöн лун кежлö сетiс общественнöй пöрадок бура видзöмысь аттьöалан гижöд.
  Водзö вылö миян уна кöсйöм да мöвп. Колö, мед локтасны мукöд уджалан котыръясысь йöз. Миянлы нимкодь быд выль мортлы.
  Галина КЛЮЖЕВА.