Мед юргас коми кыв

[ A+ ] /[ A- ]

Мед юргас коми кыв
«Коми кывйыс -меным вотöс,
Мыйöн тырта сьöлöм доз».
Г.Юшков.
Неважöн пасйим Чужан кывлысь ставмирса лун. Талун мирын 6000 сикас кыв, на пöвстын и коми кыв.
Душ-мöд во нин Джеджимса библиотекаын тайö лунас чукöртчылöны сёрнитны чужан кыв йылысь. Медводдзаысьсö аддзысьöмыс мунiс «Ов да выв, Коми кыв!» нимпас улын. Сёрнитiсны коми кыв чужöм, коми гижöдö да кывлöн сöвмöмö ыджыд пай пуктöм йылысь. Коми кывйыд ёна важся. Учёнöйяслöн висьталöм серти, финн-йöгра кывъяс коркö петлöмаöсь öти вужйысь. В.В.Тимин казьтылö: «Важысянь нин йöз олöны Коми муын. Куим сюрс во сайын тайö инъясас кутiс овмöдчыны финн-йöгра кывъя войтыр. Паськöдчисны найö вочасöн, кузь да дыр кад чöжöн посни да гырысь юяс пöлöн пыр водзö и водзö – войвылö, рытыввылö, асыввылö…» Кывлысь уна нэмчöжся олöмсö, сылысь вужъяссö да мукöд кывъя йöзкöд йит-öдъяссö видлалiсны коми учёнöйяс: Георгий Степанович Лыткин (1835–1907), Алексей Семёнович Сидоров (1892–1953), Василий Ильич Лыткин (1895–1981), Евгений Семёнович Гуляев (1928–1977), Адольф Иванович Туркин (1936–1996) да мукöд. Найö тöдчöдiсны, мый чужан кыв – мортлöн озырлун, медся радейтанатор. Мый дыра олö кыв, сы дыра олö и войтыр. Бырö кö войтыр, бырö и кыв. Коми гижöда кывлöн историяыс нюжалö важысянь нин да йитчöма Стефан Храп нимкöд. 1372-öд воын Перымса Сьтэпан лöсьöдiс важ перымса 24 шыпаса азбука. Эм мöвп, мый Сьтэпан коми анбурсö лöсьöдöма важ славяна да грекъяслöн азбука вылö мыджсьöмöн. Профессор В.И.Лыткин тöдчöдö, мый Сьтэпан пыртiс анбурас и важ коми пасъяс. А вöлi-ö коми йöзлöн Сьтэпанöдз кутшöмкö гижöд? Араб гижысь Ибн Фадлан 922-öд воын Волжско-Камскöй Булгарияö волöм бöрын пасйöма, мый «Булгарияса хан гижöма Вису нима войтырлы» и найö вочавидзöмаöсь. Тайö Вису нима йöзыс овлöмаöсь кöнкö Войвыв Двина бердын, сэнi овлiсны и коми войтыр. Сiдзкö, кутшöмкö гижöд отсöгöн найö вермылöмаöсь нин кутны йитöдъяс асланыс суседъяскöд. Сёрнитiм Иван Алексеевич Куратов-медводдза коми поэт, литературалы подув пуктысь, ХIХ нэмса тöдчана учёнöй–лингвист йылысь. Йöзöс велöдöм йылысь поэтлöн эм татшöм пасйöд: «Когда есть народ, то ему нужно образование; познания же можно передать ему через его же язык…, он теперь — то есть единственный орган распространения знаний между зырянами…». Сiйö вöлi велöдчöм мортöн, тöдiс 14 сикас кыв. Миян Джеджимса библиотекаын кольöм во мунiс Иван Куратов творчество серти вомгорула лыддьысьöмлöн «Открой рот» чемпионат, нуöдiм мöдысь нин. Сiдзжö сёрнитiм Виктор Алексеевич Савинлöн, коми сöветскöй литературалы подув пуктысьлöн, творчество йылысь. Нёбдiнса Виттор шулiс: «Я считаю себя обязанным перед коми народом, партией и советской общественностью и впредь работать, сколько хватит сил и умения, над созданием коми литературы, театра и коми музыки». Сiйö велöдчытöг тэчлiс шылад. 15 воöн гижис 73 сьыланкыв, лöсьöдiс 39 сьыланкывлы текст да шылад. В.Савинлöн тшупöда чужан лун кежлö библиотекаын мунiс «Лыддям Савинöс» акция. Ас му туялысьяс лыддисны И.Куратовлысь, В.Савинлысь, Г.Юшковлысь, В. Напалковлысь, А.Лужиковлысь, В.Лодыгинлысь коми кыв йылысь кывбуръяс. Мöд вонас аддзысьлöм мунiс «Кыв — войтырлöн ловъя лов» нимпас улын. 19 нэм помын 20-öд нэм заводитчигöн коми йöзкостса культураын петкöдчис К.Ф.Жаков (1866-1926) – туялысь, этнограф, велöдысь, гижысь. К.Ф.Жаков лыддис кывсö историяын ловъя памятникöн, мый отсöгöн позьö тöдмавны войтырлöн важ олöм йылысь. К.Жаков вöзйис школаясын коми челядьлы велöдны ас чужан кыв, лыддис, мый кывйыд войтырлöн ловъя лов. «Быд нациялы колö видзны оз сöмын ассьыс, но и мукöд кывъя йöзлысь кывсö и быд мортлы кыдз мый верман колö кывкутны öнiя ловъя кывъяс да вошöм нин кывъяс вöсна». Лыддим «Биармия» поэмаысь юкöн, кöнi паныдасьлö Джеджим парма йылысь пасйöд. Библиотекаöн веськöдлысь Надежда Николаевна Напалкова тöдмöдiс гöсьтъясöс Андрей Андреевич Цембер (1874-1959) — коми му туялысь да медводдза небöгъяс лэдзысь, кыв туялысь, музей да архив удж котыртысьлöн олöмöн да творчествоöн. А.А.Цембер волöма Джеджимö 1932-öд вося январ 31-öд лунö. Та йылысь сiйö гижлöма аслас дневникын: «Мунi Джеджим пыр. Меным висьталiсны, мый Джеджим артмöма Керчомъя-ысь водзджык». А йöзкостса творчество туявны А.А. Цемберлы вöзйöма профессор К.Ф. Жаков. Лыддим и мойдъяс «Коми мойдан кывъяс» небöгысь да «Коми мойдан и сьылан кывъяс» сборникысь. Тöдмалiм, мый А.А.Цембер 1910-öд воын лэдзöма 4000 кывъя «Русско-зырянский словарь». Индöм небöгъяс йöзöдöмыс коми йöзлöн культураын лоис тöдчанаöн. Видзöдiм М.А.Плосковалысь «Цембер А.А. и сылöн быдтасъяс» видеофильм. Коймöд аддзысьлöм мунiс «Шондiбанöй, олöмöй!» нимпас улын. Сёрниыс мунiс коми фольклор йылысь. Фольклор вужъясьö йöз костö дыр кежлö пуксьöм мифологияын. Юргис В.Савинлöн «Шондiбанöй, олöмöй!» сьыланкыв. Коми фольклорын тайö сьыланкывйыс лоис медся тöдсаöн. Коми фольклор чужис, сöвмис йöз костын, йöзлöн быдлунъя олöмын, “сьöкыд уджъяс бертігöн, сьöкыд шог суöм бöрын, шойччан здукъясö, рöдвужкöд да тöдсаяскöд рытпукалігъясöн, челядь быдтіг-руйкöдігöн, олöмын тöдчанатор пасйигöн”. Пыр юргисны да öнöдз юргöны йöз пöвстын гажа либö шог сьыланкывъяс, мойдъяс, серамбана нöдкывъяс, кöленаысь кöленаö вуджысь висьтъяс, шусьöгъяс, удждырся сьылан-бöрдöмъяс, вöвлöмторъяс-висьтъяс, лöсявтöмторъяс-небыличаяс, лыддьысянкывъяс, дженьыдик сьыланкывъяс-частушкаяс. Фольклорын йöз олöм петкöдчö морт чужöмсянь да морт кулöмöдз. Эм че-лядьлы фольклорын уна жанр. Вель дыр, ХХ-öд нэмöдз, фольклор вуджлiс вомысь вомö пöль-пöчсянь, ай-эньсянь, велöдiс, гажöдлiс, сöвмöдлiс. Вочасöн йöзкостса творчествоöн тöдмöдысьясöн лоисны велöдысьяс да небöг лэдзысьяс. Тайö жö рытас верстьö да челядь петкöдлiсны В.Савинлысь «Тутуруту» шмонь.
2020-öд вося февраль 21-öд лунö Джеджимса библиотекаын мунiс «Мед юргас коми сьыланкыв» конкурс. Могыс сылöн вöлi кыпöдны да сöвмöдны чужан кыв. Конкурсын сьылiсны-вермасисны 10 морт, весиг роч нывбаба Светлана Климентьевна Напалкова сьылiс комиöн. Юргис öкмыс сьыланкыв. Нимкодь, мый конкурсö пырöдчисны и томъяс — Олеся Напалкова да Ксения Зезегова. Ас му том туялысьяс лыддисны коми поэтъяслысь сьыланкыв йылысь кывбуръяс. Сьылысьясöс донъялiс пыдди пуктана жюри. Медводдзаöн лоис Антонина Степановна Ульянова, сьылiс «Чöскыд эськö коляозыс» сьыланкыв (кывъясыс В. Лодыгинлöн, шыладыс Б.Тюрнинлöн), мöдöн — «Ен да бур йöз» сьыланкывйöн (кывъясыс и шыладыс И.Чувьюровалöн) Галина Александровна да Галина Дмитриевна Напалковаяс, а коймöдöн — Анна Емельяновна да Нина Егоровна Напалковаяс, сьылiсны «Öти сиктын олам-вылам» (кывъясыс В.Г.Лодыгинлöн, шыладыс В.Я.Гущинлöн) сьыланкыв. Видзöдысьяслы медъёна сьöлöм вылас воис «Ен да бур йöз» сьыланкыв, налы вичмисны козинъяс, мукöдъяслы-грамотаяс да аттьöалан гижöдъяс. Призъяс вылö ас киöн вöчöмторъяс вайисны 9 морт: Анна Алексеевна, Галина Александровна, Нина Егоровна, Анна Емельяновна, Мария Николаевна, Зоя Степановна, Нина Михайловна, Надежда Николаевна Напалковаяс да Ульяна Ульянова. Вöчöмаöсь уна да колисны мукöд петкöдчöмъяс кежлö. Библиотекаöн веськöдлысь Надежда Николаевна Напалкова приз вöчысьяслы сетiс аттьöалан гижöдъяс да лыддис видзöдысьяслы Алексей Семёнович Безносиковлысь да Марина Семёновна Фединалысь коми йöзлы зэв мöрччана кывъяс. А.С.Безносиков 1993-öд восянь 1999-öд воöдз Коми Республикаса культура министрöн уджалiгöн шулiс: «Оз сöмын кынöм пöтöн ов мортыс, сьöлöм пöтыд сiдзжö колö, а гашкö, и ёнджыка, сы вöсна мый кынöмпöтыд тырмö и тöрöканлы, а мортыдлы сiйö оз тырмы, мортыдлы колö сьöлöм-пöт. Ме лыддя, мый культура сэтшöм жö колана и сэтшöм жö кывкутана, кыдзи и экономика водзö сöвмöдöм да с.в. Став мирас миян культура — сiйö öти культура. Миянлысь коми культура некöн оз кыпöдны, некöн оз кутны тöждысьны сiдз, кыдзи колö тöждысьны, кыпöдны да сöвмöдны миянлы». М.С.Федина, кыв технологияяс сöвмöдан шöринöн веськöдлысь, юксьö аслас мöвпъясöн, мыйла колö велöдны да тöдны коми литература кыв: «öтувъя литература кыв öтувтö йöзсö, коми литература кыв сідзжö. Быд район-сиктын сёрниыс миян торъялö и кывъясöн, и öднас, и шуанногнас. Но миян эм öтувъя подув, кодöс колö видзны да сöвмöдны. Тайöс зэв бура гöгöрвоисны миян пöль-пöчьяс, кор 1918-öд воын чукöртчисны да ыджыд вензьöмъяс бöрын шуисны вöчны öнія коми литература кыв. Оз кö ло öтувъя коми гижöд кыв, кутам кö ми сыысь öтдортчыны, сiдзкö, ас киöн пуктам пом коми нациялы. Колö велöдны школаын чужан кыв, медым тöдны грамота». Кöсъя пасйыны, мый чужан кыв сöвмöдöмö ыджыд пай пуктöны миян землякъяс — В.Г.Лодыгин да В.Е.Напалков. Найö, кад да дзоньвидзалун жалиттöг, пырöдчöны ас кыв паськöдöмö да йöз костö йиджтöмö. Миян сиктса кывбур лыддьысь аньяс Нина Егоровна да Анна Емельяновна Напалковаяс «Видза, Войвыв кодзув!» республикаса конкурс-фестивальын Г.А.Юшковлысь «Олöм кö лоö» теш пуктöмысь босьтiсны приз.
Ставмирса Чужан кывлöн лун нуöдам медводз кывъяс видзöм да дорйöм вöсна, öд мирас быд тöлысь вошö кык кыв. Ставныслы, кодъяс тöждысьöны, кыпöдöны да сöвмöдöны ассьыныс чужан кывнысö, абу веськодьöсь сы дорö, кöсъя висьтавны зэв ыджыд аттьö да муöдз копыр!
Зоя Напалкова
Джеджим.
Снимокъяс гижысьлöн да Андрей Стрельниковлöн.

Комментарии:

Добавить комментарий

Свежий выпуск: 28 марта

Осторожно — мошенники!