Дереваннöйын «Йöзкостса бюджет» бала отсöгöн буретш велöдысьяслöн лунö помалiсны вöчны аслыссяма Паметьлысь аллея.
Дасьтöм подув вылö вольсалiсны брусчатка. Артмöм öтъяин öтар помас сувтöдiсны важ школалöн мыгöрöн ыджыд панно, бокъясас — тöдчана йöз йылысь гижöдъяса аншлагъяс да ставсö югзбöдiсны мича лампаясöн. 1900-сянь 1984-öд воöдз буретш серпасалöм школаас велöдчылiсны дереваннöйсаяс.

А октябрь 13-öд лунö сиктсаяс чукöртчылiсны сёрнитны выль культура керка кыпöдöм йылысь. Сиктса юралысь Елена Васильевна Булышева кындзи волiсны и районöн веськöдлысь С.В.Рубан да районса администрацияысь кывкутысь йöз.
Сергей Владимирович петкöдлiс 100 морт вылö сиктса культура керкалы бала, висьталiс, кытчö да мыйысь арталöны кыпöдны сiйöс, кутшöм жыръяс лоöны пытшкас. Юöртiс, мый стрöйба улö öнiя клубкöд орчча му юкöнсö межуйтасны да колананогöн пасъясны. Индöм местаыс лöсялö талунъя став санитрнöй да стрöитчан корöмъяслы. Артыштасны и матыстчанiнъяс, пыранiнö пандус да перилöяс, машина сувтöданiнъяс.
Культура да национальнöй политика управлениеöн веськöдлысь А.В.Голайдо пасйис, мый клублöн öнiя сртöйбасö кыпöдлöмаöсь 1969 воын, да видлалöм бöрын комиисия шуис сiйöс ёна нин важмöмöн. Выль культура керка кыпöдöм бурногöн мöрччас сиктсаяслы. Содас творчествоö пырöдчысьяслы занимайтчöм да концертъяс нуöдöм жыр лыд, торъя жыр лоö сиктса музейлöн, лоö позянлун паськöдчыны творчестволöн выль туйвизьясын, вужвыйöн вежсяс уджаланног.
Стöч да бура подулалöмöн вочавидзисны тайö местаас культура керка кыпöдöмлы паныд мунысьяслы.
Сёрни сигöртiгöн Сергей Владимирович вöзйис восьсöн гöлöсуйтны öнiя клуб дорö выль культура керка кыпöдöм вöсна. Локтысьяс пиысь 53-öн шуисны кыпöдны индöминö, 8-öн сувтiсны талы паныд.
Стрöйба кыпöдöм могысь бала дасьтiгöн тöд вылö босьтасны матысса керкаясын олысьяслысь видзöдлассö да корöмъяссö.
Администрациялöн сайт вылысь.