Тöдмавны тайö нывбаба йывсьыс миянлы артмис зэв этша. Öнi сiйö абу нин ловъя, но сiйöс помнитöны и тöдöны.
Лидия Петровна Фомина чужлiс 1925–öд вося март 14–öд лунö Кривой Рог карын.
1941–öд вося гожöмын, кор немечьяс уськöдчисны миян страна вылö, сылы тырис 16 арöс. 17 арöсын киас босьтiс нин оружие.
Заводитiс ассьыс военнöй туйсö Кубань карсянь. 1942–öд вося сентябрь 20 лунсянь 1943 вося ноябрöдз вöлiс Кубань карын зенитнöй артиллерийскöй батальонын.

Лидия Петровна волiс Майкопö да повтöг тышкасис вöрöгкöд Киевын.
Вöлiс Кишинёвöс мездöм кузя нывбабаяслöн 218–öд зенитнöй батареяын. Будапешт кар вöлi оккупируйтöма 1944–öд вося мартын, а 1945–öд вося февраль 13–öд лунö сiйöс мездiс мöдöд Украинскöй фронтса войска, кöнi вöлiс и Лидия Петровна.
1944–öд во помын сетiсны ефрейторлысь чин. Война дырйи сiйö вöлiс и санитаркаöн.

17 арöса ныв Кубаньсянь Будапештöдз вуджис зэв сьöкыд туй. Эз ранитчылы. Войнаыс сылы помасис Будапештын.
Лидия Петровнаöс пасйисны боевöй орденъясöн да медальясöн: «Орден Отечественной войны II степени»; «За победу над Германией в Великой Отечественной войне 1941– 1945 гг.»; «За взятие Будапешта»; «За отвагу»; «20 лет победы над Германией»; «30 лет победы над Германией»; «50 лет Вооружённых сил СССР» да с.в.

Война помасьöм бöрын олöмыслöн визулыс вайис сiйöс Дiасёръя посёлокö, кöнi олiс да уджалiс Помöсдiнса леспромхозлöн Вöльскöйса лесопунктын. Лидия Петровналöн эм ныв. Бöръя вояссö олiс öтнас, ачыс на бергöдiс ставсö. Кувсис 1991–öд вося март 27–öд лунö.
Нина Шатохина.
Снимок гижысьлöн чукöртöмысь.