Кольöм вося июньсянь Немдiнса бурдöдчанiнö «Бурдöдан» национальнöй балалöн «Земский доктор» уджтас серти уджавны локтiс терапевт Татьяна Владимировна Булышева. Тайö сэтчöс олысьяслöн дыр виччысянатор, öд врачыс сэнi эз нин вöв уна во. Öти сайын зiльö сiйö и Югыдъягса бурдöдчанiнын.

Ачыс сiйö Емдiн районса Айкатылаысь. Сiйö школаын велöдчöмсянь нин мöвпалiс лоны бурдöдысьöн. Мöд ног и эз вермы лоны, öд примерыс вöлi син водзас: мамыс уджалiс фельдшерöн, батьыс тэрыб отсöг сетан юкöнын водительöн, сёрöнджык и чойыс на лоис акушеркаöн. Ань 1983–öд воын Перымса медицина институт помалöм бöрын бöр бергöдчис ас районас да пыр уджалiс сэтчöс районса шöр бурдöдчанiнын терапевтöн, кутшöмкö кадö и медшöр врачöн да сiйöс вежысьöн.
– Терапевтлöн уджыс, мукöд специалистъяслöн серти, ёна сьöкыдджык: колö ыджыд сям, мывкыдлун, унатор тöдны, кужны уджавны йöзкöд, – пасйис Татьяна Владимировна. – И тайö кужöмлуныс шедö сöмын этша вылö вит-дас во зiльöмöн.

Та серти кö, аньлöн сямыс ёна ыджыд нин, öд йöзлöн дзоньвидзалун вöсна тöждысьö 42 во. Та йылысь висьталöны и Россия да республика тшупöда бурдöдан министерствояссянь вичмöдöм почёт грамотаяс да ошкана гижöдъяс. Татьяна Владимировна кöть и шойччöг вылын нин, но ырыштчис на уджавны мунны мöд районö. Челядьыс олöны асланыс семьяясöн нин-а, и локтiс татчö верöсыскöд, кодi рöднас Смолянкаысь. Артмö, сылöн чужанiнö. Воöм мыстиныс налы Югыдъягысь вичмöдiсны оланiн. Уджалö ань, позьö шуны, лун и вой. Луннас места вылас, Югыдъягын, примитö висьысьясöс. Вежоннас öтчыдысьöн ветлывлö Смолянкаö, Белоборскö либö Немдiнö, овлö, и Тимшерö, дерт, водзвыв индöм график серти. Ыджыд тöдчанлун сетö диспансеризация нуöдöмлы. Орчча сикт-посёлокъясö ветлöм могысь эм кык машина, кык водитель: öтиыс туйö петö луннас, мöдыс, колiгöн – войнас. Да, тшöкыда на ковмылö висьысьяс дорö ветлыны и войнас. Но Татьяна Владимировна велалiс нин, оз майшась таысь, медшöрыс, сы серти кö, мед сöмын отсавны йöзлы, личöдны налысь висьöм-дойсö.
Галина Нестерова.
Снимок Татьяна Булышевалöн.