Коми белоруска

[ A+ ] /[ A- ]

Ирина Васильевна Мишариналы Кулöмдiн лоис мöд чужанiнöн. Чужанiнас, Белоруссияö, ветлö да кык вежонысь дыр оз нин вермы овны, сьöлöмыс кыскö бöр. Татчö, кöнi верöсыскöд кыпöдiсны ыджыд керка, кöнi паськыд öшинь улын кык ыджыд картупель му, быдмö и мукöд градвыв пуктас. Татчö, кöнi ставыс нин ас.
Ань Могилёвск обласьтса военнöйяслöн Быхов карысь. Сэки сэнi вöлi ыджыд аэродром, кöнi служитiсны и морскöй авиацияса матросъяс. Ылi Коми муысь Сергей Александрович Мишаринкöд тöдмасисны карсянь 15 километра ылнаын вад дорын, кытчö гожся жар лунö уялыштны локтiс ныв чукöр да сэтчö жö кежис матросъяслöн машина. Нывъяс мöдöдчисны нин гортас, зонъяс вöзйисны мунны машинаöн. Кор коми мортöс лэдзлiсны гарнизонысь, сiйö пыр жö тöвзьылiс кельыдлöз синъяса Ирина дорö. Коркö да и пышйылiс. Служитiс да пыр виччысис, кор нин аддзысяс кыпыд ловшыа авъя нывкöд, кодi вöрзьöдiс сылысь сьöлöм.
Ирина Васильевна эз дзеб мамсьыс, мый тöдмасис да аддзысьлö матроскöд. Волiсны и гортас. Мамыс пусьылiс лётчикъяслöн нуръясянiнын. Уджаланiныс вöлi бокын, пуöм-пöжалöмсö вайлiсны аэродром вылö, лётчикъяс кындзи, вердiсны и матросъясöс. Позьö шуны, нывсьыс тшöкыдджыка аддзылiс зонмöс, пыр сёрнитöдiс, юасис öтитор да мöдтор. Сергей эз вöв варов, но воссьылiс шань сьöлöма аньлы, висьтавлiс войвылын быдмöм-олöм, бать-мам да мукöдтор йылысь.
Матрослöн матыстчис гортö мунан кад, но сiйö эз кöсйы янсöдчыны муса нывкöд, эз нин аддзы сытöг аскиа лунсö да корис лоны сылöн гöтырöн, öтлаын мунны сылöн чужанiнас. Ныв воштiс юрсö шудысла, эз бöрыньт корöмсö, эз повзьы тöдтöм ылi муысь. Весиг эз кывзы мамсö, кодi кöсйис, мед зятьпу ветлас чужанiнас да, збыльысь кö радейтö сылысь нывсö, сыла волас тулыснас. 1988-öд вося декабрын томъяс петiсны нин туйö. Сергей Александрович водзвыв юöртiс бать-мамыслы, мый локтö гöтырпукöд, да найöс виччысисны. Весиг дасьтiсны асланыс ыджыд керкаын томъяслы жыр. Локтöмöн пыр жö пырисны уджавны, Сергей трактористöн ПМК-ö. Ирина чужанiнас велöдчылiс калбас вöчысьö. Танi сэки эз вöв сэтшöм уджыс, да босьтiсны воспитательлы отсасьысьöн коймöд номера садйö. 1989-öд вося февральын ворсiсны кöлысь.
Том гозъя шуисны овны торйöн, кöртымалiсны керка. Сергейлöн бать-мамыс вöзйисны пыр жö аслыныс кыпöдны керка, лöсьöдны овмöс, да ёна отсалiсны лэптысигöн.
— Ме карын быдмöм морт, и унатор эг куж да эг тöд. Сьöлöм вылö воис коми йöзлöн öтувъялуныс. Керка кыпöдiгöн ме быдтыси нин, дзоля кагаöн отсасьны эг вермы. Уджавны локтiс Сергейлöн ыджыд рöдвужыс, мамыс налы пусис быд лун. Кольöм нэмся сьöкыд 90-öд вояс. Уджйöзалiм банкысь. Сетiсны эз сьöм, а чекъяса книга. Сiйöн и ньöбасьлiм да чекъяссö бöр сдайтлiм сбербанкö. öти воöн и кыпалiс. öти вевт улö лэптiсны тшöтш гид. Сергейлöн бать-мамыс пыр и шуисны, мый коми йöз век олöны скöтöн да ас овмöс лöсьöдны быть. Буретш сэки миянöс видлыны волiс мамöй. Сылы лоис нимкодь, мый петi бур морт сайö верöс сайö, мый айка да инька ыджыд тöждаöсь пи вöснаыс, мый быд керкаын пöся вочаалiсны ылi муысь воöм мортöс, — казьтылiс ань.
1991-öд воын пырисны нин выльлаö. Пыр жö босьтчисны видзны порсьöс, мед яй кындзи пыр вöлi солалöм ас гос (белорусъяслöн тайö радейтана сёян), сэсся баляясöс, кроликъясöс. Ыжъясöс шырлiсны асьныс. Вурун печкыны-нистыны сетлiс йöзлы. Ань кужыштiс кысьыны, а сэсся велöдчис кыны кепысь-носки, жилет да мукöдтор. Уджалiгöн удждон сеталiсны и пызьöн. Быть велöдчы пöжасьны. Карын быдмысь эз тöдлы му удж. Танi ковмис велöдчыны пуктысьны, вöдитны градвыв пуктас, соласьны-консервируйтчыны тöв кежлö. Картупельсö пуктöны 30 сайö ведра.
— Белорусыдлöн пызан вылын век гос да картупель либö сыысь вöчöмтор. öти лунö пражита, мöдö пуа весавтöг, коймöдö ныра пуöмсö. Но менам семьяын (Елена ныв бöрын кöкъямыс во мысти чужис Виктор), медся ёна радейтана — зыртöм картупельысь пöжалöм оладдьö, белорусъяслöн сёянтор, — водзö сёрнитiс ань.
Верöсыс «висьмöдiс» и чери кыйöмöн. Гожöмын пыжöн, тöлын лым вывтi ветлан техникаöн. Медводдза ветлiгас аньлы пыр и шедiс 20 чери. Верöсыс эз виччысь, мый гöтырыслöн татшöм шуда киыс. А кор чери эз пысасьлы сылöн шатинö, весиг скöрмылiс, некор пö сэсся ог босьт ва вылö, весиг пö чериясыд менö вузалiсны. Но öнöдз на кыйсьöны öтлаын. И чериыд, и сыысь вöчöмторйыд лоис радейтана сёянöн. Олöмыс пö велöдiс унаторйö.
öнi Ирина Васильевна сёрнитö комиöн. Кык воöн пö и велалi. Дерт, водзын ёна дöзмис, кор сы дырйи сёрнитiсны комиöн, а сiйö нинöм эз гöгöрво. Пыр юасис верöсыслысь, кывлiс кö выль коми кыв. Да и садйын сэки челядь сёрнитiсны комиöн, эз рочасьны бать-мам. öтчыд ичöт нылыс öшиньö видзöдöмöн шуалiс: «Чибö, чибö!». Ань видзöдлiс тшöтш, аддзис йирсьысь вöлöс да чаньöс. Но кутшöм чибö йылысь висьталiс нылыс, эз гöгöрво. Лун джын жуглiс юр, мый али код сэтшöм чибöыс. Рытнас юалiс верöсыслысь, чибöыс пö сiйö чань.
Коркö Сергей Александрович йöрын кодйысигöн лэптiс кельыдлöз сёй. Виктор пиыс юалiс мамыслысь, мый пö тайö. Сiйö и вочавидзис, сёй пö. Эз и казяв, а пиыд сёйтö сёйис збыльысь. Тэ пö тшöктiн, а абу пö чöскыд да.
Челядь быдмисны. Елена велöдчис Сыктывкарса технологическöй колледжын. Шудсö аддзис Кебанъёльысь. Паша верöскöд быдтысьöны нин. Артур пиыс таво пырис медводдза классö. Виктор велöдчис автоэлектрикö. Бергöдчис чужанiнö да уджалö керкаяс кыпöдысь-вöчысь асшöр уджалысь дорын. Быдмигас пыр вöлi батьыскöд орччöн, отсасис, велöдчис да сяммö вöчны быдтор.
Ирина Васильевна дорö томдырйиыс волiс Дмитрий вокыс да Кулöмдiнö и кольччис, вужъясис. Оз вунöдны чужанiн. Ань ветлö кык вонас öтчыд, нулö челядьсö. Татчö корö и 75 арöса мамсö. Сiйö мöдысь петавлiс верöс сайö. Арлыдаöсь нин да пöлыслöн нёльысь нин вöлi инсульт, оз кöсйы кольны сiйöс. Но воас кад, и чоя-вока мамнысö бытьысь ваясны Кулöмдiнö. Мишаринъяслöн ыджыд да шоныд керкаын сiйö лоас виччысянаöн да зэв коланаöн, тырмас чоя-вокалöн, зятьлöн, внук-внучкаяслöн тöждыс.

Марина ДАДАШОВА.
Снимок: И.В.Мишариналöн чукöртöмысь.

Комментарии:

Добавить комментарий

Свежий выпуск: за 14 ноября