Олöмаяслöн отсöгöн

[ A+ ] /[ A- ]

Ручса школаын М.В. Пименова да Е.М.Адамова 1-5 класса челядьлы нуöдöны вöчасьны велöдан кружок. Отсасям и ми, олöма йöз: А.И.Адамова, А.М.Зезегова да ме. Гоз-мöд лун нин урокъяс бöрын зонпосникöд вöчалiм кольясысь, кöчвöньысь, нитшкысь дзоридз чукöръяс. Медводз кольяс мавтiм еджыд рöмöн, косьмöм бöрас содтöд мичмöдiм гöрд, лöз, виж рöма краскаясöн. Пластмассысь ичöтик дозмукъяс гартлiм уна рöма сунисъясöн, артмисны чача кодь мича вазаяс. На пытшкö пуктышталiм нитш, а сы вылö дзоридз пыдди мичмöдöм кольяс, кодъясöс нöшта вöччöдiм кöчвöньöн. Ок и мича козинъяс артмисны!
Школаын дзоньвидзалунлы сиöм лунö ми, олöмаяс, челядькöд жö петалiм вöр-ваö. Найö котралiсны, пуктiсны петкöдчöмъяс, пусисны бипур вылын, пöжалiсны печенча, öти сайын жуглiсны юр. Велöдысьяслы ставсö тайöс нуöдны отсалiсны Н.М.Подюкова, А.И.Адамова да К.Г.Есева. Поводдяыс кöть эз вöв ёна бур, но челядьлöн лов вылын вöлi кыпыд, сьöлöмсяньыс вöчисны став индöмторсö. Торйöн нин чöскыда артмис бипур вылын шыдыс. Зэв азыма сёйисны и печенча.
Луныс колис öдйö, бур вöчöмöн и шмонитöмöн.

Екатерина УЛЬНЫРОВА.
Руч.
Гижысьлöн снимок вылын: вöр-ваö петалöм.

Комментарии:

Добавить комментарий

Свежий выпуск: за 14 ноября