Йöз вöсна тöждлунöн

[ A+ ] /[ A- ]

18-öд нэмын, кор Россияын лоис полиция, котыртiсны юкöн, кытчö позис шыöдчыны лун кöть вой. 1782-öд воын вынсьöдiсны полициялысь устав да йöзкöд уджавны урчитiсны бур оласног вöсна кывкутысь управалы. Сылы колiс уджавны пыр, чукöртчывны, кор колö. Устав серти карлöн юкöнын мед уджалiс асшöр пристав, кодлöн керка восьса лун и вой. Öнiя дежуритан юкöнын уджалысьяс моз пристав босьталiс йöзсянь шыöдчöмъяс да юöръяс, юасис вайöдöмъяслысь, йöршитiс мыж вöчысьясöс. Быд асыв висьтавлiсны управалы, кутшöм лоöмторъяс вöлiны суткиöн. 
1918-öд вося март 28-öд лунö котыртчис милиция. Йöзлысь шыöдчöмъяс да юöръяс босьтлiсны уголовнöй розыскса уджалысьяс, участокъясса уполномоченнöйяс да милицияса мукöд уджалысьяс, кодъяс дежуритiсны урчитöм кадын. 30-öд вояс пансьöмсянь ыджыд управлениеясын да юкöнъясын лоисны дежуритысьяс. 
1973-öд воöдз дежуритан юкöнын, öта-мöднысö вежлалöмöн, уджалiсны сöмын кыкöн. Найö эз петавлыны лоöмторъяс вылö. 1979-öд воын тайö юкöнлы ньöбисны радиостанция, сетiсны машина. 2009-öд воын милиция лоис полицияöн, сэтчö жö пырис дежуритан юкöн. 
Дежуритан юкöнын уджалысьяс оз петны кыйны мыж вöчысьясöс, но ставсö вöчöны сы могысь, медым лючки артмис мыж вöчысьясöс корсьöм да кутöм, мыж эрдöдöм. Юöр воöм бöрын дежуритысь пыр жö ыстö туясьысьяслысь да оперативникъяслысь котырöс. Колö кö, корö «тэрыб отсöг сетан» юкöнöс либö нöшта службаöс. Йöз эскöны полициялы, мыйкö лоöм бöрын звöнитöны «02» номерö. Юöртöны öзйöм, гусясьöм, семья пытшкын зык-вен, мортöс виöм, весиг каньпилöн пу вылö кайöм йылысь. 
Миян юкöнын уджалöны нёль дежуритысь, сы мында жö налы отсасьысь, кык водитель (колö нöшта öти). Быд асыв локтöны дежуритысь, сылы отсасьысь да водитель. Воддза уджалысьяс висьталöны, кыдзи колис сутки, кутшöм лоöмторъяс вöлiны, мый вылын уджалöны на, кытчö эз на удитны петавны. Сутки чöж шыöдчöмъяс да юöръяс босьтöны телефон, 112 система пыр. Воöны и письмöяс, юкöнö йöз локтöны асьныс. Став юöрсö пасйöны да найö мунöны и республикаын пытшöкöсса делöяс кузя министерстволöн дежуритан юкöнö. 
Сьöкыд мыж вöчöм йылысь дежуритысь пыр жö юöртö пытшкöсса делöяс кузя министерстволöн юкöнса начальниклы, сiйö сиктö либö посёлокö, кысянь воис юöр, пыр жö ыстö участокса уполномоченнöйöс, туясьысьöс либö дознавательöс, оперуполномоченнöйöс, экспертöс, кинологöс. Овлö, мый туйö петö уджалысьяслöн кык да унджык котыр. Дежуритысь телефон, радиостанция пыр веськöдлö налöн уджöн. Котырын кö эм старшöй следователь, сiйö и юöртö, мый вöчисны. Асывнас мыж вöчöм кузя уджалöм йылысь висьталö начальниклы. Став лоöмтор йылысь юöртö и асывнас став уджалысьлöн чукöртчылiгöн. 
Дежуритысьяс веськöдлöны и ГИБДД-лöн юкöнса да патрульно-постöвöй службаса котыръясöн, йитчöны телефон пыр. Видзöдöны, кымын гижöд лöсьöдiсны торкалöмъяс кузя. Инспекторъяс кö сувтöдiсны машина, дежуритан юкöн пыр тöдмалöны, абу-ö гусялöмъяс лыдын техникаыс, торкавлiс-ö водитель водзтi урчитöмторъяс. Патрульсаяс кö сувтöдiсны телефона мортöс, тöдмалöны, абу-ö сiйö гусялöмъяс лыдын. Тадзи жö, мортыс кö вöлi бензопилаа. Гусялiсны кö, найöс вайöны юкöнö. Торъя жырйын найöс видлалöны туясьысьяс. «Тшапкöны» кö код юра мортöс, сiдзжö вайöны татчö. Снимайтам сылысь вöрöм-легöдчöм, нулам бурдöдчанiнö да вöлисти лöсьöдам гижöд. Танi вермам видзны кык суткиöдз, судын видлавтöдз. Суд кö урчитас «шойччыштны» кад кежлö йöршитанiнын, нуам сэтчö. Морт кö дзик код, торъя жырйын видзам палявтöдзыс. Татчö веськалöмъяслысь босьтам и чунь туй да ыстам юркарса öтувъя видзанiнö. 
Овлö, мый звöнитöны, элясьöны ылöсас либö шыöдчöны вежöрöн торксьöм йöз либö код юраяс. Дежуритысьяс быть ыстöны полициялöн юкöнъясса уджалысьясöс. 
Дежуритан юкöнö пырö и пост, кöнi полицияса уджалысьяс лэдзöны могöн локтысьясöс. Видзöдöны документ, сумка пытшкö пуктöмторъяс, юасьöны, кутшöм юкöнö локтiсны, да вöлисти лэдзöны пырны. 
Дежуритысьяс да налы отсасьысьяс — ыджыд сяма уджалысьяс, татчö локтiсны полициялöн мукöд юкöнъясысь. 
Медся дыр уджалö Сергей Владимирович Морозов. Милициялысь школа помалöм бöрын 1996-2003-öд воясын вöлi участокса уполномоченнöйöн. Сэсся вуджис татчö. Лоис оперативнöй дежуритысьöн. Людмила Анатольевна гöтырыскöд быдтö куим челядьöс. 
Дежуритысь Александр Иванович Ульныров пытшкöсса делöс кузя юкöнын 1994-öд восянь. Уджавлiс патрульно-постöвöй службаын, ГИБДД-лöн юкöнын. Дежуритан юкöнын 2006-öд восянь. Вера Николаевна гöтырыскöд быдтöны куим челядьöс. 
Владимир Александрович Чувьюров пытшкöсса делöяс кузя юкöнын 1999-öд восянь. ГИБДД-лöн юкöнсянь дежуританiнö вуджис 2007-öд воын. Ольга Анатольевна гöтырыскöд кык челядь. 
Константин Александрович Нестеров юкöнын 1998-öд восянь. Вöлi патрульно-постöвöй службаын командирöн, уджавлiс пытшкöсса делöяс кузя министерстволöн ОМОН-ын. Дежуритö 2015-öд восянь. Юлия Алексеевна гöтырыскöд кык челядь. 
Анатолий Николаевич Пименов юкöнын 1998-öд восянь. Патрульно-постöвöй службасянь дежуритан юкöнö вуджис 2011-öд воын. Сiйö дежуритысьяслы отсасьысь. Любовь Алексеевна гöтырыскöд кык челядь. 
Анатолий Александрович Третьяков 1998-öд восянь уджавлiс патрульно-постöвöй службаын, кад кежлö йöршитанiнын. Дежуритан юкöнын 2017-öд восянь, дежуритысьлы отсасьысь. Анна Владимировна гöтырыскöд быдтöны куим челядьöс. 
Андрей Дмитриевич Жикин пытшкöсса делöяс кузя юкöнын 2011-öд восянь. Патрульно-постöвöй службасянь дежуританiнö локтiс 2017-öд воын, дежуритысьлы отсасьысь. Надежда Олеговна гöтырыскöд куим челядь. 
Дмитрий Васильевич Булышев 1997-öд восянь уджалiс патрульно-постöвöй службаын, ГИБДД-лöн юкöнын, кад кежлö йöршитанiнын. 2014-öд восянь дежуритан юкöнын вöлi водительöн. Кольöм вося сентябрсянь дежуритысьлы отсасьысь. Наталья Рустамовна гöтырыскöд быдтö-велöдö сизим челядьöс. 
Уна вося бур уджысь ставнысö пасйылiсны почёт грамотаясöн, аттьöалан гижöдъясöн. 
Евгений Викторович Пименов дежуритан юкöнын водителялö 2014-öд восянь. Регыд на босьтiсны водительöн Дмитрий Николаевич Поповöс. 
Бур кывъясöн пасъя воддза уджалысьясöс: А.А.Морохинöс, В.А.Гичевöс, В.А.Сундуковöс, Э.В.Вахмянинöс, И.И.Ногиевöс, Д.А.Чалановöс, Г.И.Кочановöс, М.Ю.Воробьёвöс да мукöдöс. 
Дежуритан юкöн ёрта котыр. Уджалöны öта-мöдлы отсасьöмöн. Öтув пасъям праздникъяс. Сиа аслам уджалысьяслы ён дзоньвидзалун, семьяын шань олöм, удж кузя быдмöм, вермöмъяс. 
Елена ОВЧИННИКОВА, 
дежуритан юкöнса начальник. 
Снимокъяс пытшкöсса делöяс кузя министерствоысь 
районса юкöнлöн.

Комментарии:

Добавить комментарий

Свежий выпуск: за 17 октября