Уджалöны кийывсöн

[ A+ ] /[ A- ]

«Коми энергосбытöвöй компания» котырлысь Кулöмдiн юкöнса керка позьö öткодявны мавзолейкöд. Быд лун танi зэв уна йöз. Мед веськавны, колö виччысьны кык-куим час. Автобусъяс бöр мунöны водз да быдöн пыравны оз веськав, лоö волыны некымынысь. Тадзи артмис сы вöсна, мый öти квитанцияын öтувтiсны биысь, ваысь, шоныдысь да шыблас петкöдöмысь донъяс. Тавосянь счётчикъясысь лыдпасъяс быд тöлысь юöртам «Энергосбытö» да сiйö и ыстö квитанцияяс. Уналöн синъясныс чашкавлiсны, кор тайö квитанцияяссьыс аддзисны ыджыдсьыс-ыджыд донъяс. Та мындаыс абу на сувтлöма некор. Январын ва арталан счётчикъяслысь лыдпасъяс юöртлiм «Шоныд сетан Коми компаниялöн» Кулöмдiнса юкöнö, кодлы колiс найöс сетны «Комиэнергосбытö», но сэтчö абу воöма. Ыстысисны öта-мöд выланыс. Арталiсны эз счётчикъяслöн лыдпасъяс, а олысьяслöн лыд да нормативъяс серти. Абу гöгöрвоана, кыдзи юкöмаöсь йöзöн вештысьöмсö. Кодлыськö став донсö босьтöмаöсь шоныдысь, кодлöнкö мунöма биысь. Кодкö да мыйыськö кольöма уджйöзöн. Либö компьютеръясыс «дурöны», либö уджалöны кийывсöн. 
Йöзкöд уджалö öти-кык морт. Кузь да векни коридорын этша пуклöс. Лоö виччысьны весиг ывлаын. А öд виччысьысьяс лыдын уна олöма йöз. Тадзи уджалöмöн «Энергосбыт» торкö йöзлысь шыöдчöмъяс видлалöм кузя закон. 
Выль ногöн уджавны босьтчытöдз колiс дасьтысьны водзвыв. Кодi тöдiс, мый росреестрысь либö мöдлаысь колiс босьтны кутшöмкö да справка? Водзвыв эз юöртны, кыдзи да кытчö юöртны лыдпасъяс. Эз висьтавны, мый «Комиэнергосбыт» оз уджав йöзкöд четвергын. Йöзöс тайö дöзмöдö, весиг ёрччöны. 
Овмöдчöминъясса администрацияясысь специалистъяслы колö отсавны йöзлы, аддзысьлыны накöд да гöгöрвоöдны ставсö. 
Г.А.Третьякова, А.С.Шахов, М.А.Левчук, Ю.И.Чеченадзе, В.Е.Рассыхаева — 
ставыс район пасьтаысь 22 кырымпас. 
Редакциясянь: Ми йöзöдлiм нин, кыдзи юöртны биысь, ваысь, шоныдысь лыдпасъяс. Юöртам нöшта. Позьö «Комиэнергосбытöвöй компаниялöн» Кулöмдiнса юкöнö волöмöн босьтны логин да пароль, восьтны компьютерын «Личнöй кабинет», код пыр быд тöлысь юöртны лыдпасъяс. Позьö сетны налöн сайт пыр, сöмын колö пасйыны договоръяслысь номеръяс. Позьö лун кöть вой СМС отсöгöн 8 912 967 15 20 либö 8 912 951 08 84, 94-143 телефонъяс пыр. Пасйыны и договоръяслысь номеръяс. Став юöрыс вештысян квитанциялöн мыш вылас. 
Позьö юöртны почталöн быд юкöнö. Босьтöны быд тöлысь 18-23-öд лунъясö, но сöмын вештысьысьяслысь. 
Эскыссьö, йöзлысь майшасьöмсö кывкутысь йöз босьтасны тöдвылö да отсаласны.


Комментарии:

Добавить комментарий

Свежий выпуск: за 16 мая