Висьталöны карточкаяс

«Юргы да нимав, районканым!» — выставкалöн татшöм мича юрнимыс нин чуксалö матыстчывны сы дорö. Нöшта на газетнымöс ыдждöдлöма «районкаöн», выннас да коланлуннас пуктöма районса чинаяскöд орччöн.

Выставка вылö петкöдöма зэв уна снимок. Абу на ставыс тöрöма. Чукöртысьыс, журналист ветеран Нина Ивановна Буткина висьталiс, мый кутшöмкö юкöн босьтöма редакциялöн музейысь (лöсьöдлiс сiйöс ачыс жö), уна вайисны редакцияын да райтипографияын вöвлöм уджалысьяс, налöн рöдвуж да тöдсаяс. Сгöдитчис и аслас архивö чукöртöмыс. Ставыс сэсся коляс музейö.

Снимок кöть абу варовитысь, но серпаснас висьталö унатор. Медводз, йöз йывсьыс, кодъяс пуктöмаöсь да öнi на сетöны пай «Вöр фронт», «Ленин туйöд» да «Парма гор» газет вöчöмö. Тайö корреспондентъяс, район пасьтала сиктъяс-грездъяс гызмалöмöн юöръяс корсьысьяс да гижысьяс, фотокорреспондентъяс, серпасъясöн гижöдъяс тöдчöдысьяс да с.в. Торйöн колö пасйыны типографияын уджалысьясöс – наборщицаясöс, линотиписткаясöс, печатникъясöс. Öтувъя уджöн и петлiс газетлöн номер бöрся номер. А сэсся олöмö воськовтiс компьютерлöн нэм. Компьютеръяс воисны и редакцияö. Районканымöс печа-тайтны вуджöдлiсны Кировö, уна во сайын босьтiс юркарса типография. А вот Кулöмдiнса полиграфистъяслöн уджыс бырис да ковмис тупкысьны.

Видзöдалi выставка вылысь снимокъяссö. Со печатайтчан машинка, кодöс редакцияö вайлöмаöсь ылöсалöмöн 60 во сайын. Öнi сiйö музейын. Сэтысь жö снимайтöма уна воясся карточкаяс, газет подшивкаяс, а мöд снимок вылын – кöрт шыпасъяс да кöрт вылö вуджöдöм снимокъяс: типографияын газет вöчöмлы найö вöлiны медся коланаторъясöн. Донаöсь серпасъяс важ уджалысьяс йылысь. На пиысь öтиысь аддзи нималана гижысь Виктор Егорович Напалковöс (уджавлöма 60-öд воясын редакцияын ответственнöй секретарöн), сыкöд орччöн: детдомсянь 17 арöсöн типографияö пырöм да пенсияöдзыс öти местаын пыр уджалысь Клавдия Александровна Чисталёва, редакцияын уна вояс чöж бухгалтералысь Мария Александровна Липина, газетлы кöрт шыпасъяс чукöртысь Нина Александровна Русинова. Бара жö зэв важся карточкаяс: «Вöр фронт» газет вöчысь Мария Ракина (1937 во), типографияын 1940-1970-öд воясын уджалысь Александра Александровна Тимушева, 1936-öд воын типографияö комсомолсянь волöм Александра Ефимовна Мингалёва. Выставка вывса карточкаяс тöдмöдöны разнöй воясся редакторъяскöд, редакциялöн да типографиялöн уджаланiнъясöн, «Вöр фронтлöн» (Молодцовскöй шыпасъясöн на лэдзöм 1934 вося номер), «Ленин туйöдлöн» да «Парма горлöн» чужöмбанъясыс…

Ставсö лыддьöдлыны он вермы: колö волыны да видзöдлыны ас синъясöн. Та могысь быть пыравлöй шöр библиотека бердын юöръяс сетан шöринö. Содта сöмын, мый выставкасö сиöма Коми печатьлöн лунлы.
Марина Дадашова.
Снимокъяс Ольга Мехоношиналöн.