Бурдöдысьяс эз эскыны, чуймисны: татшöмыс пö оз овлы, ми пö сiйöс лэдзим кувны нин, а сiйö со ас кокöн локтiс миян дорö. Михаил Анатольевич Мингалёвлöн мамыс кувсис томöн на, батьыс эз вöв, чой-вокöс енмыс эз жö сет. Быдмис ыджыд мамыскöд. Сылöн кувсьöмöн том морт шогсö заводитiс пöдтыны курыдторъясöн, крукасис вина гагйö. Тадзи олiгад и ёртъясыд сэтшöмöсь жö сюрлiсны. Михаил дзикöдз усис кок йывсьыс да лоис вермытöмöн. Сэки и нюжöдiс сылы кисö Степан Геннадьевич да Алёна Ивановна Мингалёвъяслöн семья. Сiдзкö, позьö шуны, гозъялöн ыджыд тöждöн кытшалöмыс Михаил Анатольевичöс перйис мöдар югыдсьыс. Бур киад и мортыд бурмö. Абу кокни видзны-дöзьöритны вермытöм морт бöрся. Но век жö ыджыд сьöлöма, зiль йöзыд эмöсь тай быд сикт-грездын, тшöтш и Кекурын. 12 во нин Мингалёвъяс орччöнöсь.

Асланыс вöлi кык посни челядь, но сьöкыдлунысь эз повзьыны, кор йöзлы социальнöй отсöг сетан шöринсянь вöзйисны контракт серти босьтчыны видзны айловöс. Ёна дзудзисны, новлöдлiсны бурдöдчанiнъясö, лэччöдлiсны и Сыктывкарö. Öкмыс арöса Аня тшöтш жö бергалiс-отсасис бать-мамлы. Орчча керкаын олысь Михаил Анатольевичлы петкöдiс сёян-юан да чышкис-мыськис джодж. Кык арöса на Алёша бергавлiс орччöн, а сэсся, быдмыштiс да кутiс пыртлыны пес да ва. Лун и вой Степан Геннадьевич да Алёна Ивановна сьöрсьöн-бöрсьöн олiсны сы дорын. Дзоньталiсны керка вевт, мавтiсны-мичмöдiсны пытшкöссö, ньöбисны выль диван-улöс.
Нывбаба пыр гöгöрвоöдiс, мый колö овны аскиа лунöн, эскыны ас вынъяслы, бурдас, ставыс лоас бур. Легöдчыны-вöрöдчыны и аслыс Михаиллы. И со артмис.

Алёна Ивановна уджалö бокиын. Сэки Степан Геннадьевич пусьö-пöжасьö, мыськасьö, дöзьöритö скöт да видзöдö вермытöм бöрся. Öнi Михаил Анатольевич надзöникöн пыртö пес да вайö нин ва. Сиктса морттö и вöрад на кыскö. Ветлывлö вотчыны, кöть эськö видзысь-дöзьöритысьяс öлöдöны.

Казьтылам, 2010-öд восянь уджалö олöмаяслы да вермытöмъяслы отсöг сетöм йылысь республикаса закон. Налы позьö шыöдчыны йöзöс социальнöя доръян шöринö. Бурдöдысьяслöн кывкöрталöм серти налöн эм позянлун мунны олöмаяслöн да вермы-тöмъяслöн керкаö либö корны отсасьысьöс. Олöма морт либö вермытöм бöрся видзöдысьлы воны кутас сьöма отсöг, артавсьö и уджалан кад.
Татьяна Чувьюрова.
Снимок вылын Степан Геннадьевич да Михаил Анатольевич.