Гожöм помасис. Пуксис ар. Кык тöлысь на позьö вотчыны вöрын да чукöртны öшинювса быдмöгъяс.

Гожöм йылысь кывкöртöдъясöн юксисны Донын олысьяс. Унаöн пасйисны, мый таво гожöмыс шензьöдiс кос да жар поводдяöн. Кодкö весиг лыддис. Зэрсö муыс эз аддзыв июнь помсянь август шöрöдз. Дерт, киськалöмыд отсалö жö, но оз сiдз кыдз колö. Тадзи ваыс тюрö да пыдöдз оз йидж. Зэрыд бура кöтöдö. Уна ва босьтöм вöсна кодсюрöлöн весиг косьмылiсны юкмöсъясныс. Кос поводдялы нимкодясисны скöт видзысьяс, жарыс бура лэдзис тöв кежлö заптыны турун. Сёрнитны кö öшинювса быдмöгъяс йылысь, ставныс тöдчöдöны, мый таво воис зэв уна сэтöр, вишня, öмидз, крыжовник, льöм да пелысь. Уналысь капустанысö сёйис гаг. Кöть и киськалiсны химия сорасъясöн, жар поводдя вöсна гаг да бобувъяс сёрöдз тшыкöдiсны быдмöгъяснысö.

Вöрса тусьяс петiсны зэв омöля, а йöзлöн öшинюлъясыс зэв озырöсь, да тшак-вотöс примитысьяс таво медводдзаысь босьтiсны сэтöр, льöм, вишня, öмидз да пелысь. Öти семья шуис, мый 100 килограмм сэтöр найö сёйисны да заптiсны тöв кежлö, а мöд 100-сö сдайтiсны. Вöрö ветлысьяс пасйисны, мый гожöмнас весиг нитшкыс чегъясис кок улад. Татшöм жар да кос поводдя вöсна и тшакыд петiс сёрöн…
Водзö лыддьöй сентябр 5-öд лунся газетысь.
Наталья Тимушева.
Снимокъяс гижысьлöн.